ಮಂಚೂರಿ, ಚಿಕನ್ ಟಿಕ್ಕ, ಉಂದೇ ಇತ್ತೆದ ಜೋಕ್ಲೆಗ್ ಬೇಗ ಅರ್ಥ ಆಪುನ,ಬಾಯಿರುಚಿತ್ತ ತಿನಸ್. ಒಂಜಿ ಕೋರಿಗ್ ಏತ್ ನಮೂನೆದ ಏಸೊಲು. ದುಂಬುದ ಕಾಲೊಡು ಕೋರಿದ ಸಾರ್, ಕೋರಿ ಆಜಾದಿನ ಈತೆಟ್ಟ್ ವಾ ಮಲ್ಲ ಲೇಸ್ಲ ಮುಗ್ಯೇದ್oಡ್.
ಆರೋಗ್ಯಲಾ ಆತೇ ಒಂಜಿ ಸೀಕ್ಗ್ ಇಂಗ್ಲೀಷ್ಡ್ ಪದ್ನಾಜಿ ಪುದರುಲು. ಇರ್ವತ್ನಾಲ್ ಬಗೆತ್ತ ಮರ್ದುಲು. ಕಡೆಕ್ಕ್ ಆಯೆ ಮುಗ್ಗಿಯೆಂಡಲ ಆಯನ ಮರ್ದ್ ಮುಗ್ಯುಜಿ ವಾ ಕಸಾಯಲ, ಬೇರ್ ಮರ್ದುಲುಲಾ ನಾಟುಜಿ. ಬಲಿಪೊಡು ಪೇಂಟೆದ ಆಸ್ಪತ್ರೆಗ್. ಅವುಷ ಗಟ್ಟಿ ಇತ್ತಿನಾಯೆ, ದೈವ -ದೇವರ್ನ, ಗುರು ಹಿರಿಯೆರ್ನ ಆಶೀರ್ವಾದ ಇತ್ತಿನಾಯೆ ಒಂತೆ ಹೆಚ್ಚ ಕಾಲ ಬದೇಕೆ.
ಪಿರಾಕ್ದ ಹಿರಿಯೆರ್ನಕುಲು ಎನ್ಪ ಒರ್ಸ ಮುಟ್ಟಲಾ ಗಟ್ಟಿ ಮುಟ್ಟಾದಿತ್ತೆರ್. ಇತ್ತೆದ ಜವನೆರ್ ನಲ್ಪೋಡೇ ಗಂಟ್-ಗಂಟ್ ಬೇನೆಡ್ ನರಳುವೆರ್. ದುಂಬುದ ಪ್ರಕೃತಿದತ್ತವಾದ್ ನಂಕ್ ತಿಕ್ಕೊಂದಿತ್ತಿನ ನೈಸರ್ಗಿಕ ಸಂಪತ್ತ್ ಲೆಡ್ ನಮ ಏತ್ ಆರೋಗ್ಯವಂತೆರಾದಿತ್ತ. ಇತ್ತೆದ ಕೃತಕ, ಕಲಬೆರಕೆಲೆದ ಆಹಾರೊಲೆಡ್ ನಮ ಏತ್ ಮಟ್ಟ್ ಡ್ ಆರೋಗ್ಯವಂತೆರಾದ್ ಬದ್ಕೊಂದುಲ್ಲ.
ದುಂಬುದಕ್ಲ್ನ ಗಾದೆ ಇತ್ತ್ಂಡ್. 'ಕೋರಿಗ್ ಎನ್ನ್ ನಗ ಮರಣಗೆ' ಅವೆನ್ ಆಧುನಿಕ ಕಾಲದ ವಿಜ್ಞಾನ ಯುಗೊಟ್ಟು ಇತ್ತೆದಕುಲು ಪನೊಡಾಯಿನ ಪೊಸ ಗಾದೆ 'ನರಮಾನ್ಯಗ್ ಎನ್ನನಗ ಮರಣಗೆಂದ್ ಉಂದು ಆನಿಗ್ಲಾ ಇನಿಗ್ಲಾ ನಟುತೂವೊಂದು ಬತ್ತಿನತ್ತ್. ಅನುಭವಿತೊಂದು ಬತ್ತಿನ ಸತ್ಯ.
ಇತ್ತೆದ ಲೆಕ ಲಕ್ಷಗಟ್ಲೆ ನೋಟುದ ಕಾಲ. ಪಿರಾಕ್ದವು ಅತ್ತ್ ದಾದ ಇತ್ತ್ಂಡಲ ಆನಿದವು ರುಯಿ, ಆಣೆ, ಪೈಸೆ, ಒಟ್ಟೆ ಮುಕ್ಕಾಲ್ದ ಕಾಲ. ಏತ್ ಪೊರ್ಲು ಇತ್ತ್ಂಡ್. ಮಾತೆರೆಗ್ಲಾ ಸುಖ, ಶಾಂತಿ, ನೆಮ್ಮದಿ ಇತ್ತ್ಂಡ್. ನಂಬಿಕೆ ವಿಶ್ವಾಸ ಇತ್ತ್ಂಡ್. ಒಂಜಿ ಅರ್ಥೊಡು ರಾಮ ರಾಜ್ಯಂದೇ ಗೆರೆತ್ದ್ ಇತ್ತೆರ್.
ರುಯಿ ಪೋದು ರುಪಾಯಿ ಆನಗ, ಕಾಲ ಪೋದು ಕಲ್ಜಿಗ ಆನಗ, ರಾಮರಾಜ್ಯ ಪೋದು ರಾವಣ ರಾಜ್ಯ ಆನಗ? ಉತ್ತರ ನಿಕುಲು ಪನ್ಲೆ.
@@@@
86
