ಜನೊಕುಲು ಅಯಿತ ಪ್ರಯೋಜನಗೆತೊನೊಂದಿತ್ತೆರ್. ಕಾಡ್ಡ್ ಬೋಡಾಯಿನಾತ್ ಕಾಡುತ್ಪತ್ತಿ ಆವೊಂದಿತ್ತ್ಂಡ್. ನೇರೊಲ್ದ ಪರ್ಂದ್, ತಂಪುದ ಪರ್ಂದ್, ಕೊಟ್ಟೆಮುಳ್ಳುದ ಪರ್ಂದ್, ಕುಂಟಲ್ದ ಪರ್ಂದ್, ಕುಕ್ಕು, ಗೋಂಕು, ಗುಜ್ಜೆ, ಇರೋಲು ಇಂಚ ಬೇತೆ-ಬೇತೆ ನಮುನೆದ ಪರ್ಂದುಲು ಕಾಡ್ಡ್ ತಿಕ್ಕೇದ್ಂಡ್. ಒರ್ಸೊಗು ಮೂಜಿ ಬುಲೆ ಕಂಡೊಡು ದೆಪ್ಪೇದೆರ್, ಕಂಗ್ ತಾರೆಲೆಡ್ ಒರ್ಸ ಇಡೀ ಪಲ ಬರ್ಪೇದ್ಂಡ್, ಕಾಯಿ ಕಜಿಪು ಬೋಡಾಯಿನಾತ್ ಬುಲೆಪದ್ ಪಟ್ದ್ ತಿನೊಂದಿತ್ತೆರ್. ಮರ್ಯೊಲೊಗು ಬೋಡಾಪಿ ತಿನ್ಪಿ ಸೊತ್ತೂಲೆನ್ ಅರೆಗಲೊಡೇ ದಾಸ್ತಾನ್ ಮಲ್ತ್ ದೀಪೇದೆರ್.
ಮುಖ್ಯವಾದ್ ಅರೆಗಲೊಡು ದಾಸ್ತಾನ್ ದೀತಿನ ತಿನಿಸ್ಲು ಮರ್ಯಲೊಡು ಎನ್ನ್ನಗ ಎನ್ನಿಲೆಕ ತಿನರೆ ಆಪೇದಿನವು, ಸಾಂತನಿ, ಪುನ್ಕೆದಬಿತ್ತ್, ಪೆಜಕಾಯಿದ ಬಿತ್ತ್, ಕೆರೆಂಗ್ದ ಪೂಲು, ಹಪ್ಪಳ, ರುಟ್ಟಿ, ಬಾಲ್ಗ, ಕುಮಂದ್ರ, ಇಂಚ ಮಾತಾ ಮಲ್ತ್ದ್ ದೀತಿನೆನ್ ಮರ್ಯಲೊಡು ತಿಂದ್ ದ್ ತೊಡು ದೆಂಗವೊಂದಿತ್ತೆರ್. ಅಂಚೆನೇ ತೌತೆ, ಕೆಂಬುಡೆ, ಕುಂಬುಡ ಮಾತಾ ಮರ್ಯಲೊಗುಂದ್ ಮಡಲ್ದ ಒಲಿಟ್ಟ್ ಕಟ್ ದ್ ಮಾಡ್ ದ ಪಕ್ಕಾಸ್ಲೆಡ್ ನೇಲದ್ ಕಟೊಂದಿತ್ತೆರ್ ದಾಲ ಕಜಿಪುಗು ದಂತಿನಪಗ ಒಂಜೆಂಜೆ ದೆತ್ದ್ ಕಜಿಪು ಮಲ್ತೊಂದಿತ್ತೆರ್.ದಾಂತಿನಕ್ಲೆಗ್ಲಾ ಕೊರೊಂದಿತ್ತೆರ್.
ಅಂಚೆನೇ ಕಾಯಿಗುಜ್ಜೆದ ಪಚ್ಚಿರ್ ಪೊರ್ಲುಡು ಬುಡ್ಪದ್, ಪೆಲತ್ತರಿ, ಕನ್ನೀರ್ ಮಾತಾ ದೆತ್ದ್ ಪಚ್ಚಿರ್ದ್ ತಿಗ್ತ್ದ್ ಎತೀಷ್ಟ ಉಪ್ಪಡುಪಾಡ್ಜ್ ನೇಲ್ನೇಲ್ಯ ಕರೊಕ್ಕುಲೆಡ್ ದಿಂಜಾದ್ ಗಟ್ಟಿ ಮಲ್ತ್ ಬಾಯಿ ಕಟ್ ದೀಪೆರ್ ನೆಕ್ಕಾ ನೀರುಪ್ಪಡ್, ಉಪ್ಪಡಚ್ಚಿರ್ಂದ್ ಲಾ ಪನ್ಪೆರ್. ಇಯೊಡುವ ಪಚ್ಚಿರ್ ರಡ್ಜ್ ಒರ್ಸಮುಟ್ಟಲಾ ಒರಿಯುಂಡು. ಅಯಿತ್ತ ಪೆಲತ್ತರಿಲ ಒಟ್ಟು ಮಲ್ತಾದ್ ಮಣ್ಣ್ಡ್ ಮೊರೆತ್ ದ್ ಕೊಟ್ಯದ ಒಂಜಿ ಮೂಲೆಡ್ ದೂಪೆ ಗೂರುದು ದೀಪೇದಎರ್. ಬೋಡಾನಗ ಉಪ್ಪಡಚ್ಚಿರ್ಲ ಪೆಲತ್ತರಿಲ ಪಾಡ್ದ್ ಕೋರಿ ಆಜಾಯಿಲೆಕ ಆಜವೆರ್ ಉನರೆಲ-ತನರೆಲ ಬಾರೀ ರುಚಿ.
ಗುಜ್ಜಿದ ರಚ್ಚೆ, ಗೂಂಜಿಲ ಅಂಚೆನೇ ನೇಲ್ಯ ಕರೊಕ್ಕುಲೆಡ್ ಬೋಡಾಯಿನಾತ್ ಉಪ್ಪು ಪಾಡ್ದ್ ದೀಪೇದಎರ್. ಅವ್ವತ್ತಂದೆ ಕೇನೆದ ದಂಟ್, ಪೆಜಕಾಯಿ. ಕುಕ್ಕು ಮಾತ ಉಪ್ಪು ನೀರ್ಡ್ ಪಾಡ್ದ್ ಕಡ್ಯೊಲೆಡ್ ದಿಂಜದ್ ಬಾಯಿ ಕಟ್ದ್ ದೀಪೇದೆರ್. ಅನಪತ್ಯೊಗು ದೆತ್ದ್ ಜೀರಿಗೆ ಮುಂಚೆ ನುರ್ತುದು ಗಂಜಿ ಉನ್ಪೆದೇರ್.ಬಾಯಿಗ್ಲ ರುಚಿ, ಬಂಜಿಗ್ಲ ತಂಪು. ಉಂದೆಟ್ಟೇ ಆರೋಗ್ಯ ಭಾಗ್ಯೊನು ಕಾಪಾಡೊಂದಿತ್ತೆರ್, ಸೀಕ್- ಸಂಕಡೊಲು ಬರ್ಪೇದಿನಿ ಕಮ್ಮಿ ಬತ್ತ್ಂಡಲ ತನ್ಕ್ ಲ್ಡನೇ ಮರ್ದ್ ಲಾ ರಡಿ ಇತ್ತ್ಂಡ್.
84
