ಪರಿಹಾರ ಆವೊಡು.
ಕೆಲವು ಕಡೆಟ್ ನಲಿಕೆದಕ್ಲೆಗ್ ಕೊರ್ಪುನ ಸಂಬಳೊಡ್ಲಾ ಮೋಸ ನಡಪುಂಡು. ಶ್ರಮೊಕ್ಕು ಸರಿಯಾಯಿನ ಪ್ರತಿಫಲ ತಿಕ್ಕುಜಿ. ದುಂಬುದ ಕಾಲೊಡು ಕೊರೊಂದಿತ್ತಿನ ಮೂಜಿ ಮುಕ್ಕಾಲ್ದ ಕಾಸ್ನೇ ಇತ್ತೆಲಾ ಕೊರ್ದು ನಲಿಕೆದಕ್ಲೆನ ಬಾಯಿ ಮುಚ್ಚಾವುನಕ್ಲು ಉಲ್ಲೆರ್. ಮಾತಾ ಸಾಮಾನ್ದ ಬಿಲೆ ವರ್ಷೊಡ್ದು ವರ್ಷೊಗು ಎಚ್ಚೊಂದೇ ಪೋನಗಾ ಈ ನಲಿಕೆದಕ್ಲೆನ ಶ್ರಮದ ಬಿಲೆ ದಾನೆ ಎಚ್ಚಾಪುಜಿ? ದಿನ ಪೋಯಿಲೆಕ್ಕ ಪೊಸ ಪೊಸ ದೈವಸ್ಥಾನೊಲು ನಿರ್ಮಾಣ ಆವೊಂದುಲ್ಲ. ಅಜೀರ್ಣ ಸ್ಥಿತಿಟಿತ್ತಿನ ದೈವಸ್ಥಾನೊಲು ಜೀರ್ಣೋದ್ಧಾರ ಆವೊಂದುಲ್ಲ. ವರ್ಷಾವದಿ ನೇಮೋತ್ಸವೊಲು ಬಾರೀ ಗೌಜಿಡ್ ನಡತೊಂದುಂಡು. ನೇಮೋತ್ಸವದ ಲೆಪ್ಪೋಲೆಡ್ ದೈವಸ್ಥಾನದ ಆಡಳಿತ ಮಂಡಲಿದಕ್ಲೆನ ಪುದರ್, ದರ್ಸನದ ಪಾತ್ರಿನ ಪುದರ್, ಧಾರ್ಮಿಕ ಸಭೆ ಇತ್ತ್ಂಡಾ ವೇದಿಕೆಗ್ ಬರಿ ಗಣ್ಯೆರ್ನ ಪುದರ್, ಉತ್ಸವೊಗು ಧನ ಸಹಾಯ ಮಲ್ತಿನಕುಲ್ನ ಪುದರ್, ಜಾಹೀರಾತುದಾರರ್ನ ಪುದರ್ - ಇಂಚ ನೇಮೋತ್ಸವೊಗಾದ್ ಪುನೆಯಿನಕುಲ್ನ ಮಾತೆರ್ನಾ ಪುದರ್ಲಾ ಪ್ರಿಂಟಾದುಪ್ಪುಂಡು. ಆಂಡಾ ಭೂತ ಕಟ್ಟ್ ದ್ ಇಡೀ ರಾತ್ರೆ ಶರ್ರೊನು ದಂಡಿತ್ದ್ ಬೆನ್ಪುನ ನೇಮೋತ್ಸವದ ಕೇಂದ್ರ ಬಿಂದುವಾಯಿನ ನಲಿಕೆದಾಯನ ಪುದರ್ನ್ ದಾಯೆ ಲೆಪ್ಪೋಲೆಡ್ ಪಾಡುಜೆರ್? ಉಂದು ಮಾತಾ ಅಸ್ಪೃಶ್ಯತೆದ ಪರೋಕ್ಷವಾಯಿನ ಮೋನೆಲು. ಈ ಬಗ್ಗೆ ನಲಿಕೆದಕ್ಲು ಜಾಗೃತೆರಾವೊಡಾಯಿನ ಅನಿವಾರ್ಯತೆವುಂಡು.
ಪ್ರತಿವೊರಿ ಆಣನ ಗೊಂದೊಲಿಗೆದ ಪಿರವು ಪೊಣ್ಣನ ಶ್ರಮ ದೆಂಗ್ದುಪ್ಪುಂಡು ಪನ್ಪಿನ ಸತ್ಯ ನಲಿಕೆದಕಲೆನ ಕಲೆತ ಪಿರವುಡ್ಲಾ ತೂವೊಲಿ.
@@@@
52
