ಇನಿ ಆರೋಗ್ಯೊಗು ಹಾಳಾಯಿನ ಕಳಿಗಂಗಸರೊನು ಭೂತೊಲೆಗ್ ಪರ್ಪಾವುನ ಅಗತ್ಯ ದಾನೆ? ಉಂದು ನೇಮ ಕೊರ್ಪುನ ಮೇಲ್ಜಾತಿದಕ್ಲು ಮಲ್ತಿ ಕ್ರಮನಾ? ಅತ್ತ್ ನಲಿಕೆದಕ್ಲು ಮಲ್ತಿನ ಕ್ರಮನಾ? ಉಂದು ಏರೇ ಮಲ್ತಿನ ಕ್ರಮ ಆಂಡಲಾ ಭೂತೊಗು ಕೊರ್ಪುನ ಗಂಗಸರ ಭೂತ ಕಟ್ಟಿನ ನಲಿಕೆದಾಯನ ಬಂಜಿಗೇ ಪೋಪಿನೆಡ್ದಾವರ ಭೂತಲಾ ಗಂಗಸರೊನು ನಿಷೇದ ಮಲ್ಪುನ ಅಗತ್ಯವುಂಡು.
ಭೂತೊಲೆಡ್ ಅಸುರ ಕಿರಿಯ ಬಕ್ಕ ದೇವಕಿರಿಯ ಪನ್ಪಿನ ರಡ್ಡ್ ಪ್ರಬೇದ ಉಂಡು. ಅಸುರ ಕಿರಿಯದ ಭೂತ ಗಂಗಸರ ಬಕ್ಕ ಮಾಸೊನು ಗೊತೊಂಡಡಾ ದೇವಕಿರಿಯದ ಭೂತೊಗು ಉಂದು ರಡ್ಡೆಲಾ ನಿಷಿದ್ದ. ಭೂತೊಲೆಡ್ ಈ ವ್ಯತ್ಯಾಸ ಎಂಚ ಪುಟ್ಟೊಂಡು? ಅಸುರ ಕಿರಿಯಾಂದ್ ಪನ್ಸುನಿ ಗಂಗಸರ ಬಕ್ಕ ಮಾಸೊನು ಗೆತೊನ್ನ ಇಚಾರೊಡು ಮಾತ್ರ. ಅಂಚಾಂಡಾ ದುಂಬುದ ಕಾಲೊಡು ರಕ್ಕಸೆರ್ (ಅಸುರೆರ್) ಮಾತ್ರ ಗಂಗಸರ ಬಕ್ಕ ಮಾಸೋನು ಗತ್ತೊಂದಿತ್ತಿನೆನಾ? ಖಂಡಿತಾ ಅತ್ತ್. ದೇವತೆಲುಲಾ ಗಂಗಸರ ಬಕ್ಕ ಮಾಸೊನು ಸೇವನೆ ಮಲ್ತೊಂದಿತ್ತೆರ್ ಪಂದ್ ಪುರಾಣನೇ ಪನ್ನುಂಡು. ಅಂಚ ತೂಂಡಾ ರಕ್ಕಸೆರ್ ಮಾಂಸಹಾರಿಲಾದಿತ್ತೆರೇ ವಿನಃ ಗಂಗಸರ ಪರೊಂದಿಜ್ಜಾಂಡ್. ಸುರೆನ್ (ಅಮಲ್) ಪರಂದಿನಕ್ಲಾಯಿನೆಡ್ದಾವರನೆ ರಕ್ಕಸೆರೆಗ್ ಅಸುರೆರ್ ಪನ್ಪಿ ಪುದರ್ ಬತ್ತ್ಂಡ್. ಸುರೆರ್ (ದೇವತೆಲು) ಸುರೆನ್ ಪರೊಂದಿತ್ತಿನೆಡ್ದಾವರನೇ ದೇವತೆಲೆಗ್ ಸುರೆರ್ ಪನ್ಪಿ ಪುದರ್ ಬತ್ತ್ಂಡ್. ಅಂಚಾದುಪ್ಪುನಗ ಈ ಭೂತೊಲೆಡ್ ದೇವ ಬಕ್ಕ ಅಸುರ ಪನ್ನಿನ ಭಿನ್ನತೆನ್ ಉಂಡು ಮಲ್ತಿನಕ್ಲು ಏರ್? ಬೊಕ್ಕ ಉಂದೆನ್ ಉಂಡು ಮಲ್ತಿನ ಉದ್ದೇಶ ದಾನೆ? ಈ ಇಚಾರೊಡು ನಲಿಕೆದಕುಲು ಚಿಂತನೆ ಮಲ್ಪುನ ಅಗತ್ಯವುಂಡು. ಬೊಕ್ಕೊಂಜಿ ಇಚಾರ ದಾದ ಪಂಡಾ ಬಿರನೆರ್ ಕೊರ್ಪುನ ನೇಮೊಡು ಭೂತ ದೇವಕಿರಿಯೊನು ಪಾಲಿಸೊಡು ಪನ್ಪಿನ ಕ್ರಮವುಂಡು. ಉಂದು ದಾಯೆಗಾತ್ರ? ಬಿರನೆರ್ ಕೋರಿ ತಿಂದ್ಜಿಡ ದಾನೆ? ಭೂತಲಾ ಕೋರಿ ತಿನ್ಯೆರೆ ಬಲ್ಲಿಯಾ? ಭೂತೊನು ತೃಪ್ತಿ ಪಡಿಸುನವ್ಲು ಪ್ರದಾನ ಪಾತ್ರವಹಿಸುನಿ ಬಾರಣೆ. ಬೇತೆ ಮಾತಾ ಸರಿಯಿತ್ತ್ಂಡಲಾ ಬಾರಣೆ ಸರಿಯಾಯಿಜಿಂದಾಂಡಾ ಭೂತೊಗು ಅತೃಪ್ತಿ ಆಪುಂಡು ಪನ್ಪಿ ನಂಬಿಕೆ ಉಂಡು. ಐಟ್ಲಾ ಕೋರಿ ಭೂತೊಗು ಬಾರೀ ಪ್ರಿಯವಾಯಿನ ಆವರ. ಅಂಚಾದ್ ಬಿರನೆರ್ ಕೋರಿ ಕೊರುಜಿಂದಾಂಡಾ ಭೂತೊಗು ಅತೃಪ್ತಿ ಆಪುಜಾ? ಬಾಕಿ ಜಾತಿದಕ್ಲು ಆವೊರೊಗು ಕೊರ್ನ ಕೋರಿ ಪನಿ ಎಲ್ಯವಾಯಿಸಾತ್ಗ್ ನೇಮ ಕೊರ್ನಕ್ಲೆನ್ ಕಣ್ಣ್ ಪುರೆಲ್ತ್ ದ್ ಪೊಡಿಪಾವುನ ಭೂತ ಬಿರನೆರ್ ಕೋರಿ ಕೊರ್ಜಿಂದಾಂಡಲಾ ಮನಿಪಂದೆ ಆಪುನಿ ದಾಯೆ? ಭೂತದ ನೇಮೊಲೆಡ್ ತೋಜಿದ್ ಬರ್ಪುನ ಇಂಚಿನ ಏತೋ ವ್ಯತ್ಯಾಸೊಲ್ ನಲಿಕೆದಕ್ಲೆಡ್ದೇ {center|51}}
