ಕೈಕ್ ದಂಡೆಕಾಜಿ ಕಾರ್ಗ್ ಕಡಗೊಲೆನ್ ದೀವೊಂದಿತ್ತೆರ್. ಒವ್ವಾಂಡಲಾ ಭೂತದ ಪುದರ್ಡ್ ಎಣ್ಣೆ ದೊತೊನಕುಲು ಕೈಕ್ ಬಲೆಕ್ಲೆನ್ ದೀಪೆರ್. ಈ ಬಲೆ ಬಂಗಾರ್ದ ಇಚಿಂಡ ಬಂಗಾರ್ದ ಕೋಟಿಂಗ್ ಆದುಪ್ಪುಂಡು. ಕೆಲವರ್ ರಡ್ಡ್ ಕೈಕ್ಲಾ ಬಲೆಕ್ಲೆನ್ ದೀಪೆರ್. ಭೂತೊಗು ಎಣ್ಣೆ ಕೊರಿನಕಲೆನ್ ಕೈಕ್ ದೀಪಿನ ಬಲೆಡ್ಡಾತ್ರ ಗುರುತಿಸಾವೆರ್. ಉಂದು ಸಮಾಜೊಡು ಘನಸ್ತಿಕೆದ ಅಂಶವಾದ್ದ್ ಅಕಲೆಗ್ ವಿಶೇಷ ಸ್ಥಾನಮಾನ ಸಲ್ಲುಂಡು. ತಿರುಪತಿ ವೆಂಕಟರಮಣನ ಪುದರ್ಡ್ ಕಾರ್ಗ್ ಸರಿಯ ದೀಪೆರ್. ಉಂದೆನ್ ಪೊಂಜೊವೊಲುಲಾ ದೀವೊನುವೆರ್. ಈ ಸರಿಯ ಪಾಡುನೆಟ್ಟ್ ವಿಶಿಷ್ಟ ಆಚರಣೆ ಸಂಪ್ರದಾಯೊಲುಂಡು.
ಮುತ್ತೈದೆತನದ ಲಕ್ಷಣೋಲಾಯಿನ ಕರಿಮಣಿ ತಾಳಿ, ಕಾಲುಂಗರ, ಮೂಂಕುತಿ, ಕೈಕಾಜಿ, ಕೆಬಿತ್ತ ಬೆಂಡೋಲೆ ನೆಟ್ಟ್ ಪೊಣ್ಣು ಜೋಕುಲು ಎಲ್ಯ ಉಪ್ಪುನಗಾನೇ ಮೂಂಕುತಿ, ಕಾಜಿ, ಬೆಂಡೋಲೆಲೆನ್ ದೀಪೆರ್. ಕರಿಮಣಿ ತಾಳಿ ಬಕ್ಕ ಕಾಲುಂಗುರೊನು ಮದಿಮೆದಾನಿ ದೀಪೆರ್. ಪಡ್ಡಯಿದ ಸಂಸ್ಕೃತಿದ ಪ್ರಭಾವದ್ದಾತ್ರ ಮದಿಮೆ ನಿಶ್ಚಯದಾನಿ ಬಚ್ಚಿರೆ ಬಜ್ಜೆಯಿ ಪಗತೊನುನ ಕಟ್ಟ್ಡ್ದಲಾ ಕೈಕ್ ಪಾಡುನ ಉಂಗಿಲ ಎಚ್ಚ ಸ್ಥಾನ ಪಡೆತ್ಂಡ್. ಅಂಚಾದ್ ಇಂಚಪ್ಪೊಗು ನಿಶ್ಚಯದ ಉಂಗಿಲೊನು ಎಚ್ಚಾದ್ ಕೈಡ್ದ್ ದೆಪ್ಪುವೆರ್. ಪೊಣ್ಣು ಕಂಡನಿ ಸೈತ್ಂಡ ಮಾತ್ರ ಮಾತಾ ಪದ್ದೆಯಿಲನ್ಲಾ ಬಲಾತ್ಕಾರೊಡು ದೆಪ್ಪುವೆರ್. ಉಂದೊಂಜಿ ಕ್ರೂರ ಸಂಪ್ರದಾಯ ಅತ್ತಂದೆ ಪುರುಷ ಪ್ರಧಾನ ವ್ಯವಸ್ಥೆದ ವಿಕೃತ ಮೋನೆಲಾ ಅಂದ್.
ದಿನ ನಿತ್ಯಲಾ ದೀಪಿನ ಕೆಬಿತ ಬೆಂಡಲೆ ಕೈತ ಕಾಜಿ, ಮೂಂಕುತಿ, ಕೆಕ್ಕಿಲ್ದ ಸರಕುಲತ್ತಂದೆ ಮದ್ಮಾದಾನಿ ಮದ್ಮಲೆಗ್ ವಿಶಿಷ್ಟವಾದ್ ಕೆಲವು ಪದ್ದೆಯಿಲೆನ್ ದೀಪೆರ್. ಮುಂದಲೆ, ಒಂಕಿ, ಕೆನ್ನೆ ಸರಪಳಿ ಕೊಪ್ಪು, ಕೊಪ್ಪು ಸರಪೊಳಿ, ಬುಗುಡಿ ಸರಪೊಳಿ, ಪುಚ್ಚೆ ಬಂಗಾರ್, ಸೊಂಟಪಟ್ಟಿ ಒಡ್ಯಾಣ ಅತ್ತಂದೆ ಕಂಠಾಭರಣೆಲೆನ್ ದೀಪೆರ್. ಈ ರೀತಿದ ಐತಬಲ್ಮನ ಪೊಣ್ಣು ಪೋದೆ ಪೊಂಜೊವಾನಗ, ಬಾಯಿಕೆದಾನಿ ಬಂಜಿನಾಲ್ ಪೊಣ್ಣಗ್, ಐತದ ಐಸಿರಿ ಮಲ್ಪುವೆರ್. ಒವ್ವಾಂಡಲಾ ವಿಶಿಷ್ಟ ಸಮಾರಂಭ ಬಕ್ಕ ಮದಿಮೆದ ಸಮಾರಂಭೋಗು ಪೋಪಿನ ಜನಕುಲಾ ದಿನನಿತ್ಯದ ಪದ್ದೆಯಿಲೆಡ್ ವಂತೆ ಎಚ್ಚರತೆದ ಪದ್ದೆಯಿಲೆನ್ ದೀಪೆರ್.
ಜಾತ್ರೆ, ಭೂತಕೋಲದ ದಿನ, ದೇವ ಮೂರ್ತಿ ಬಕ್ಕ ಭೂತೊಲೆಗು ನರಮಾನಿಲು ದೀಪಿನ ಪದ್ದೆಯಿಲೆಡ್ದ್ ಭಿನ್ನವಾದ ಕೆಲವು ಪದ್ದೆಯಿಲೆನ್ ದೀಪೆರ್. ಒಂಜಿ ನಿರ್ದಿಷ್ಟ ಕಾಲ, ಸ್ಥಳ, ಪರಿಸರಡ್ ಅವಾಹನೆಗೆ ಒಳಗಾಪಿನ ಅಲೌಕಿಕ ಶಕ್ತಿಯೇ ಭೂತ. ಭೂತದ
41
