ಡಾ. ಪೀಟರ್ ಕ್ಲಾಸ್, ಡಾ. ಹೈಡ್ರನ್ ಬ್ರೂಕ್ನರ್, ಡಾ. ಮಾರ್ತಾ ಆಶ್ವಿನ್, ಡಾ. ಲಾರಿ ಹಂಕೊ, ಡಾ. ಅನೇಲಿ ಹೆಂಕೊ... ಇಂಚಿತ್ತಿನಕ್ಲೆನ ಅಧ್ಯಯನೊದ ಪಲ ನಂಕ್ ತಿಕೊಂದುಂಡು... ತುಳು ಸಾಹಿತ್ಯ ಪರಬಾಸೆಗ್ಲಾ ತರ್ಜುಮೆ ಆದ್ ಲೋಕೊಡು ಪಸೆರೊಂದುಂಡು. ತುಳು ಜನಪದ ಸಾಹಿತ್ಯ, ಸಂಸ್ಕೃತಿ ಸಂಶೋಧನೆ ಮಲ್ತ್ ಬೂಕು ಬರೆಪಿನ, ಡಾಕ್ಟರೇಟ್ ಪದವಿ ಪಡೆಪಿನ ತುಳುನಾಡ್ದ ವಿದ್ವಾಂಸೆರೆನ ಪಟ್ಟಿ ವರ್ಸೊಡೊರ್ಸ ಬುಳೆವೊಂದುಂಡು. ಪಿರಾಕ್ದ ತುಳು ಕಾವ್ಯೊಲತ್ತಾಂದೆ, ತುಳು ಸಾಹಿತ್ಯದ ಬೆನ್ನಿ ಮಾತ ಪ್ರಕಾರೊಡ್ಲಾ ನಡತೊಂದುಂಡು.
ಇಂಚ ಮಾತ ತುಳು ಸಂಸ್ಕೃತಿದ ಮರ್ಗಿಲ್ಲೆನ್ ಮಗ್ತೊಂದು ಕುಸಿಟ್, ಪೆರ್ಮೆಡ್ ಪಣೊಂದು ಪೋನಗ ಇಂಚಿಪದ ಸ್ಥಿತಿಗತಿ ಬಾಯಿಕಟ್ಟಾವುಂಡು... ವಿಜ್ಞಾನ, ತಂತ್ರಜ್ಞಾನ, ಮಾಹಿತಿ ತಂತ್ರಜ್ಞಾನ, ಶಿಕ್ಷಣ, ಸಮೂಹ ಮಾಧ್ಯಮೊಲು, ಉಂದು ಮಾತ ತುಳು ಸಂಸ್ಕೃತಿನ್ ತೆರಿಯೊನೆರೆ, ಒರ್ತೊನೆರೆ ಸಾಯ ಆಂಡಲಾ... ಇಂಚಿಪದ ಜಾಗತೀಕರಣ, ಸಾರಿಗೆ ಸಂಪರ್ಕ, ನಾಗರಿಕತೆ ಒಂಜಾದ್ ತುಳುವೆರೆನ ನಿಲೆ ತಪ್ಪಾವೊಂದುಂಡು. ಪರದೇಶೀ ಬಾಸೆ, ಸಂಸ್ಕೃತಿದ ಒಯ್ಪು, ಅನುಕರಣೆದ ಅಂಗಲ್ಪು, 'ಪಿತ್ತಿಲ್ಲ್ದ ದೈ ಮರ್ದತ್' ಪಣ್ಪಿನ ಇನ್ನಾರ, ಮಜಾ ಮಲ್ಪುನ ಮರ್ಲ್ ದ ಉರುಲು ಮಾತ್ರ ಒಂಜಾದ್ ತುಳು ಸಂಸ್ಕೃತಿ ತುಳುವೆರೆಗ್ ಬೊಡ್ಚಾವೊಂದುಂಡು. ಅಜ್ಜೆರ್ ನಡ್ತಿನ ಗೋಳಿದ ಮರೊಕು ಬಲಿಬತ್ತ್ಂಡ ಯಾರುಜಿ ಅಂದ್. ಕಾಲೊಗು ತಕ್ಕ ಕೋಲ ಕಟ್ಟೋಡಾಪುಂಡು... ಆಂಡ ಆಧುನಿಕತೆನ್ ತರ್ಕೊನ್ನಗ ಜಾಗ್ರ್ತೆಲಾ ಬೋಡು... ಪರಂಗಂದಿನ ಪರತ್ನ್ ದೀವೊಂದು, ಪರಂಗುನ ಪೊಸತ್ ನ್ ಬುಡ್ಡು ಬದುಕುನನೇ ಬುದ್ಯಂತಿಕೆ. ಈ ಶಿಸ್ತ್ ತುಳುವೆರೆಡ ಇತ್ತಂಡ, ತುಳು ಸಂಸ್ಕೃತಿ ಬಿರಿಯುಂಡು.. ಅಯಿತ ಪೊರುಲು ತಿರ್ಲ್ ತುಳುವೆರ್ನ ಬದ್ಕ್ಡ್ ನೆಮ್ಮದಿನ್ಲಾ ಒರಿಪುಂಡು...
28
