ತುಳು ಸಂಸ್ಕೃತಿದ ನನೊಂಜಿ ಮುಕ್ಯ ಅಂಶ ಯಕ್ಷಗಾನ ಕಲೆ. ಬಣ್ಣಗಾರಿಕೆ, ಏಸ, ದುತ್ತೈತ, ಕುಣ್ಕೆ, ಪದ ಪರ್ಸಂಗ, ಪಾತೆರ, ತಾಳ, ಚಂಡೆ, ಮದ್ದೊಲಿ, ಪ್ರದರ್ಶನ ಮಾತಲಾ ಒಟ್ಟಾದುಪ್ಪುನ ಈ ಸಾಂಸ್ಕೃತಿಕ ಕಲೆ, ಇರ್ಲಿಡೀ ನಿದ್ರೆಕಜೆರ್ದ್ ತೂಂಡಲಾ ಬೂಡಿಪತ್ತಾವುಜಿ... ಕಲಾವಿದೆರೆಗ್ಲಾ ಕೀರ್ತಿ, ಪ್ರಶಸ್ತಿ ಬರ್ಪಾವುನಂಚಿನ ಈ ಕಲೆ ತನ್ನ ಸತ್ಯ ಸಾಮರ್ತಿಕೆಡ್ಡಾದ್ ತುಳುನಾಡ್ದಾಪೆಲ್, ಕಡಲ್ದಾಪೆಲ್ ಏಪನೋ ಪೋದಾತ್ಂಡ್. ಕೋಟಿ ಚೆನ್ನಯ, ತುಳುನಾಡ ಸಿರಿ, ಪಟ್ಟದ ಪದ್ಮಲೆ, ಬೊಳ್ಳಿಗಿಂಡೆ, ಪುತ್ತೂರ ಮುತ್ತುದಂಚಿನ ಏತೋ ಪರ್ಸಂಗೊಲು ತುಳು ಸಂಸ್ಕೃತಿನ್ ಕಲೆತ ರೂಪೊಡು ತೆರಿಪಾವ. ತುಳು ನಾಡ್ಡ್ ನಡಪುನ ತಾಳಮದ್ದೊಲಿಲಾ ಮನರಂಜನೆದೊಟ್ಟುಡು ನೀತಿದ ತಾದಿ ತೋಜಾವುಂಡು. ತುಳು ಸಂಸ್ಕೃತಿನ್ ತೆರಿಪಾವುನ ತುಳು ನಾಟಕೊಲೆಗ್ ಲೆಕ್ಕನೇ ಇಜ್ಜಿ. ರಾಣಿ ಅಬ್ಬಕ್ಕ.. ಕೋಡ್ಡಬ್ಬು ತನ್ನಿಮಾನಿಗ, ತುಳುನಾಡ ಕಲ್ಕುಡೆ, ಪಿಲಿಪತ್ತಿಗಡಸ್. ಇಂಚಿತ್ತಿನ ನಾಟಕೊಲು ತುಳು ಸಂಸ್ಕೃತಿದ ನಿಲಟೇ ಪುಟುದು, ತುಳು ಬದ್ಕ್ ದ ರೀತಿ ನೀತಿಗ್, ಕುಸಾಲ್ ಕುಸೆಲ್ಗ್ ಕನ್ನಡಿ ಪತ್ತುವ.
ನರಮಾನಿನ ಆಂತರ್ಯೊದ ಅಗತ್ಯವಾಯಿನ ಕುಣ್ಕೆನಲ್ಕೆಡ್ಲಾ ತುಳುವೆರ್ ಪಿರ ಒರಿದಿಜೆರ್. ಆಟಿಕಳಂಜೆ, ಮಾಂಕಾಳಿ ನಲ್ಕೆ, ಮಾದಿರ, ಪುರ್ಸವೇಷ, ಸೋಣದ ಜೋಗಿ, ಪಿಲಿಪಂಜಿ ಕುಣ್ಕೆ, ಚೆನ್ನು ಕುಣ್ಕೆ, ಕೊರಗುಕುಣ್ಕೆ, ದುಡಿಕುಣ್ಕೆ, ಕಂಗಿಲು, ಕರಂಗೋಲು, ಗೋಂದೊಲು... ಅಂಚನೇ ಭಜನೆ ಪಡೊಂದು ನಲ್ಪುನು ಉಂದು ಮಾತೆನ್ ತುಳು ಸಂಸ್ಕೃತಿದ ನಿಟ್ಟೆಡ್ ತುಲಿತ್ ತೂವೊಲಿ...
ತುಳುಬಾಸೆ ತುಳುವೆರೆನ್ ಕಯಿತ ಕಣಪಿನೊಂಜಿ ಮುಕ್ಯ ಅಂಶ. ಪರರಾಜ್ಯ, ಪರದೇಶ, ಓಲೇ ಉಪ್ಪಡ್ ತುಳುನಾಡ್ದಕುಲು ತಿಕಿಯೆರ್ರ್ದ "ಈರ್ ಎಂಚ ಉಲ್ಲರ್?" ಪಣ್ದ್ ಕೇಂಡ ಯಾವು. ತುಳುವೆರ್ ನಮ ಒಂಚಿಣ್ಣಿನ ಬಾಮ ಉರ್ಕಾರುಂಡು. ತುಳುಬಾಸೆ ಪ್ರಪಂಚದ ಮಲ್ಲ ಬಾಸೆದ ಪಚ್ಚಿಡ್ಲಾ ಸೇರ್ದ್ಂಡ್.
ತುಳು ಸಾಹಿತ್ಯದ ಕೊಪ್ಪರಿಗೆ ಮಲ್ಲವೆ. ತುಳು ಜನಪದ ಕಾವ್ಯೊಲಾಯಿನ ಸುಮಾರ್ ಮುನ್ನೂದೆಡ್ಡೆಚ್ಚ.. ಪಾಡ್ಡನೊಲು, ಸಂದಿ, ಕಬಿತೆ, ಉರಾಲ್, ಗಾದೆ, ಎದ್ರರ್ಕತೆ, ಐತಿಹ್ಯಲೆನ ಪರ್ಚಯೊಗು ದಿನ ಯಾರಂದ್.ತುಳು ಸಂಸ್ಕೃತಿದ ಈ ಸಿರಿ ತುಪ್ಪೆನ್ ಅಜತ್ ತುಲಿತ್ ತೆರಿಯೊನೆರೆಗಾತ್ರ ಪರದೇಶೂಲೆಡ್ದ್ ವಿದ್ವಾಂಸೆರ್ ಬರೊಂದುಲ್ಲೆರ್.
27
