ತುಳುವೆರ್ ನಡಪಾವುನ ಜಾತ್ರೆ, ಉತ್ಸವ, ಆಯನೊಲೆಡ್ಲಾ ಸಾಂಸ್ಕೃತಿಕ ಸ್ವರೂಪೊಲು ದಿಂಜನೇ... ಬಜೀ 'ಜನಮರ್ಲಾ, ಜಾತ್ರೆ ಮರ್ಲಾ' ಪನ್ಪಿಲೆಕ ಆವಂದೆ, ಮಾತೆರೆಗ್ಲಾ
ಅಯಿಟ್ ಸೇವೆದ ಪಾಲ್ ತಿಕ್ ದ್, ಊರೊರ್ಬಡಿ ಸಂಬುರ್ಮೊ ಪಸರ್ದ್, ಉಮೇದ್,
ಉರ್ಬು, ಉಲ್ಲಾಸ್, ಒಗ್ಗಟ್ಸ್ಗ್ ಇಂಬು ಕೊರುಂಡು. ಕಣ್ಮನಸ್ ಗ್ ತಂಪು ತಲ್ಮೆನ,
ಕೊರ್ಪಿನತ್ತಂದೆ ದುಂಬುದ ಪೀಳಿಗೆಗ್ ಸಂಸ್ಕೃತಿನ್ ತೆರಾವುನೆಕ್ ಸಾಯ ಮಲ್ಪುಂಡು.
ಸಿರಿಜಾತ್ರೆಡ್ 'ಸಿರಿಯಾಳು'ನ ಒಂಜಿ ಇಚಿತ್ರೀತಿಡ್ ಪೊಂಜೊಲೆಗ್, ಉಡಲ್ಗ್
ಉಲ್ಲಾಸ್ ಕೊರ್ಪಿನ, ಮನಸ್ದ ಉಳಕೊದಿ ಅರಪಾವುನ ಮಾನಸಿಕ ಚಿಕಿತ್ಸೆದ ಅಂಶ
ಉಂಡುಣ್ಪಿನೆನ್ ವಿದ್ವಾಂಸೆರ್ ಪಣ್ವೆರ್...ಅ ಮಾಸೆ ಮೀಪಿನಿ, ಕಡಲ್ಗ್ ಪೂಜೆ
ಮಲ್ಪುನುಲಾ ತುಳುವೆರ ಸಂಸ್ಕೃತಿದ ಬಾಗೋನೇ... ತುಳುವರಡ್ ಒವ್ವೇ ಒಂಜಿ
ಕಾರ್ಯೊಡು ವೀಳ್ಯ ಕೊರ್ಪಿನಿ, ವೀಳ್ಯದ ತೊಂಬಿನವುಲಾ 'ಪಂಡಿ ಪಾತೆರ ತಪ್ಪುಜ
ಪಣ್ಪಿನೆತ ಒಂಜಿ ಮುಕ್ಯ ರೀತಿ ಆದ್ ರೂಢಿಡುಂಡು.
ನರಮಾನಿನ ಉಡಲ್ಗ್ ಬಲ, ಗೆಂದುನ ಚಲ ಕೊರ್ದು ವ್ಯಕ್ತಿತ್ವ ವಿಕಸನೊಗು ಕಾರಣ ಆಪಿನ ಗೊಬ್ಬುಲು ತುಳು ಸಂಸ್ಕೃತಿಡ್ ಏತೋ ಉಲ್ಲ! ಆಯಾಯ ಕಾಲೊಗು, ಹವಾಮಾನೊಗು ಸರಿಯಾಯಿನ ಈ ಗೊಬ್ಬುಲೆಡ್, ಚೆನ್ನೆಮಣೆ, ಪಗಡೆ, ಕಲ್ಲಾಟ, ಕುಂಟುಬಿಲ್ಲೆ, ಕಕ್ಕೆ-ಗಿಳಿ, ಕಬಡಿ, ಕಪ್ಪೆಲಾಗ, ಪಿಚ್ಚಿದಾಟ, ಕುಟ್ಟಿದೊಣ್ಣೆ, ಪಲ್ಲೆ, ಲಗೋರಿ, ಬೊಗೊರಿ, ಗಾಳಿಪಟ, ತಪ್ಪಂಗಾಯಿ, ಕೆಸರ್ಕಂಡೊಡು ಪಾರುನ ಪಂತ ಇಂಚಿತ್ತಿನ ಏತ್ ಬೋಡು? ಗೋಣೆರೆನ್ ಗಿಡ್ಪುನ ಕಂಬುಲದಂಚಿನ ಪಂತೊಲೆಡ್ ಒಂತೆ ಶೋಷಣೆದಂಶ ಉಂಡುಡಲಾ, ಹಳ್ಳಿದಕ್ಲೆಗವು ಮನರಂಜನೆದ ಪೆರ್ಗೆ. ಗಿಡ್ಡೆರೆಕ್ಲೆನ್ ತಾಂಕುನ ಐತಸಿಂಗರ ಮಲ್ಪುನ, ಮೆರಣ್ಗೆ ಬನ, ಗಿಡ್ತ್ ಗೆಂದುನ, ಪದಕ ಬಲ್ಮನ ಪಡೆತೊಂಬಿನ, ಕುಂಬುಲದ ಕಂಡ ಸರಿಸರ್ಕೆ ಮಲ್ಪುನ, 'ಪನಿಕ್ ಕುಲ್ಲು 'ನ, ದೋಲು ಬೊಟುದು ನಲಿಪುನ.. ಇಂಚ ಮಾತೆಟ್ಟಾ ಸಾಂಸ್ಕೃತಿಕ ಅಂಶೊಲುಲ್ಲ. ಅಂಚಾದ್ ಇನಿಕ್ಲಾ ಅವು ಜನಪದ ಗೊಬ್ಬಾದ್, ನನಲಾತ್ ಗೌಜಿಗದ್ದಲ, ಗಮ್ಮತ್ಡ್ ನಡತೊಂದುಂಡು. 'ಗೆಂದಿನ ಗೋಣನ ಬೀಲ ಪತ್ತುನಿ' ಪಣ್ಪಿನೊಂಜಿ ಗಾದೆಲಾ ಪುಟುದು ನರಮಾನಿನ ಸುಬಾವುದ ದೋಷನು ಲೆತ್ತ್ ಪಣ್ಪುಂಡು... 'ಕೋರ್ದಟ್ಟಲಾ ಮನರಂಜನೆದ ಪಂತನೇ... ಆಂಡ ಅಯಿಟ್ ಹಿಂಸನೇ ದಿಂಜಿದ್ ಮಾತೆರೆಗ್ಲಾ ಮೆಚ್ಚುಜಿ. ಇಂಚಿಪ ದೂದು ಗೊಬ್ಬುಲಾ ಸೇರ್ದ್, ಒಂಜಿ ಚಟನೇ ಆವೊಂದು, ಸಂಸ್ಕೃತಿಡ್ದ್ ದೂರ ಪೋವೊಂದುಂಡು...
26
