ಪತ್ತಿಂಚಿತೀ ಪಲೊಟು ನಿಕ್ಲೆಗ್ ಸುಕಮುಕೊತ ತಾದಿನ್ ಉಂಡುಮಲ್ತ್ ಕೊರ್ಪೆ. ಎನ
ಮಿತ್ತ್ ಬಗ್ಗಿ ದೀನಾಕುಲೆಗ್ ಅಪ್ಪೆ ಆದ್ ಪೇರ್ ಕೊರ್ಪೆ. ಸಮ್ಮಲೆ ಆದ್ ಬುದ್ದಿ ಪಣ್ಪೆ.
ನ್ಯಾಯೊಗು ಬೇಲಿಯಾದ್ ಉಂತುವೆ... ಸೂರ್ಯ ಚಂದ್ರ ಕಾಲ ಮುಟ್ಟ ಈ ರಾಜ್ಯೋನು
ಪೂತ ಬಿತ್ತಿಲ್ದಲೆಕ ಕಾತೊಂಬಿನ ಬಾರ ಎನ್ನವು..."
ಕೋಲನೇಮೊದ ಕಳೊಟು ಬೂತೊದ ಬಣ್ಣ, ಅಣಿ, ಅಲಂಕಾರ, ಜೀಟಿಗೆ, ಪಾಡ್ಡನ, ನಿಲೆ, ದರ್ಸನ, ಪಿಂಗಾರ ಪುರ್ಪ ಧೂಪ ದೀಪದ ಮಂಗಲ ಆವರ್ನೊಡು... ವಾದ್ಯ ತಂಬಡ, ಬೂತೊದ ಅಬ್ಬರ, ಅರೆಬಾಯಿದ ಗದ್ದಲೊಡು... ಸತ್ಯೊದ ಈ ಅಬಯನುಡಿಕ್ ಜನಮಂದೆದ ಅಳ್ಕ್, ಆತಂಕೊನು ಅರೆತ್ದ್ ದೈರ ದಿಂಜಾವುನ ಸಗ್ತಿ ಉಂಡು... 'ಅನ್ನೆಯದಕ್ಲೆನ್ ಅಳಿಯಂತರ ಮಲ್ಪುವೆ'... 'ನಂಬಂದಿನಕ್ಲೆಗ್ ಅಂಬು' ಪಣ್ಪಿನ ಧರ್ಮದೈವೊಲೆನ ಪೋಡಿಗೆಡೇ ಉರುಡು ದೂರುದುರ್ಜನ, ಕಳುಕಬಟದ ಅತ್ರುವಾಣೊಲು ಕಮ್ಮಿ ಆಪ. ತ್ಯಾಗ, ದಾನದಂಚಿನ ನೀತಿ ನಿರ್ಮಲೊದ ತಾದಿ ಪತ್ತಾವೆರೆಗ್ ಸಾಯ ಆಪ. ಈ ಬೂತೊಲೆನ್ ಪೂಜಿಪುನೆಟ್ಲಾ ದಿಂಜ ಸಾಂಸ್ಕೃತಿಕ ಅಂಶೋಲುಲ್ಲ... ಅಂಚೆನೇ ಬೂತೊಲೆಗ್, ಬೊಕ್ಕ ಮಾರಿಪರ್ಬದಾನಿ ಮಾರಿಯಪ್ಪೆಗ್, ಬಲಿಹಾರ ಕೊರ್ಪಿನಂಚಿನ ರೂಢಿಲಾ ಉಂಡು. ಈ ರಕ್ತಾರೊದ ಈ ಸರಕೆನ್ ಸಮರ್ತನೆ ಮಲ್ಪುನವು ಬಂಗನೇ. ಆಂಡ ನರಮಾನಿ ತನ ಅಸಹಾಯಕತೆಟ್ ತನ ರಕ್ಷಣೆಗಾದ್ ನಾಡೊಂದಿನ ಒಂಜಿ ಪರಿಹಾರೊದ ಬಗೆ ಪಣ್ದ್ ಪಣೋಲಿ... ತುಳುನಾಡ್ಡ್ ಜಾತಿ ಭೇದೊದ ಸಾಮಾಜಿಕ ಸೀಕ್ ಇತ್ತ್ಂಡಲಾ, ಇಂಚಿನ ವರ್ಸಾದಿ ಕಟ್ಟೆ ಕಟ್ಟಲೆ ನಡಪುನಗ ಮಾತ ಜಾತಿ ವರ್ಗೊದಕ್ಲೆಗ್ಲಾ ಪನಿಪನಿ ಸೇವೆದ ಪಾಲ್ ತಿಕೊಂದಿತ್ತಿನ ಟಾತ್ರ ಮಿತ್ತ್ ತಿರ್ತ್ ಇಣ್ಪಿನೆತ ದಂಡೆಲ್ ಮಾಜಿದ್ ಮಾತೆರ್ಲಾ ದೈವೊದ ಬಗ್ತೆರಿಣ್ಪಿನ ಬಾಮೊ ಬರ್ಪುಂಡು. ಅಂಚೆನ್ ತುಳುನಾಡ್ ಉಲ್ಲಾಯೆ, ದನಿ, ಒಕ್ಕೆಲ್, ಗೇಣಿದಾಯೆ ಪಣ್ಪಿನ ವರ್ಗಭೇದೊಲಿತ್ತ್ಂಡಲಾ, ಪರ್ಬದ ಪಂಚೆಮಿ, ಎಡ್ಡೆಮಿಲ್ಲಿದಾನಿ ಲೆತ್ತದ್, ಬಳಸ್ಕೊರ್ಪಿನ ರೀತಿರಿವಾಜಿಲಾ ಇತ್ತ್ಂಡ್. ಜಾತಿಭೇದೊನು ಮೀರ್ದ್ ಮಾನವೀಯತೆ ಮೆರೆತಿನೆಕ್ ಉಳ್ಳೂರುಗುತ್ತುದ ಉಳ್ಳು ಪೆರ್ಗಡಿತಿ 'ಆಚಿ ಪಣ್ಪಿ ಪೊಣ್ಣಗ್ ಆಶ್ರಯ ಕೊರ್ತಿನಂಚಿನ ಉದಾರ್ಮೆಲೇ ಉಂಡು. ಅಂಚಾದ್ ತುಳು ಸಂಸ್ಕೃತಿಡ್ ಜಾತೀಯತೆ, ವರ್ಗ ಭೇದ, ಶೋಷಣೆಲ್, ನೂದೆಕ್ ನೂದು ಇತ್ತೀಜಿ... ಪಾಳೆಯಗಾರಿಕೆದ ದರ್ಪು ಮಿತಿಮೀರ್ಂಡ ಪಿರ್ಪಾವುನ ಸತ್ವೊನು ತುಳು ಸಂಸ್ಕೃತಿ ದಿಂಜಾದ್ ಕೊರ್ಪುಂಡು.
25
