ಪಿರಾಕ್ಡ್ಡಿಂಚ ತುಳುನಾಡ್ಡ್ ಸಾಗೊಳಿಯೇ ಮಲ್ಲ ಬೆನ್ಪಾಟ, ತಾರೆ, ಬಾರೆ, ಬಾರ್, ಕಂಗ್, ಗಿರೆಂಗ್... ಇಂಚಿತ್ತಿನನೇ ಮುಕ್ಯ ಬುಲೆ. ಬೆನ್ನಿದ ಬೆನ್ಪಾಟೊಡು ಕೈ ಕೆಸರಾಂಡನೇ ಬಾಯಿಗ್ ಬೆಂಜನ ತಿಕ್ಕುನು. ಅಂಚ ತುಳುವೆರ್ನ ದಿನನಿಚ್ಚದ ಬದ್ಕ್ ಡ್ ಬೇಲೆಲೇ ದಿಂಜ. ಬೊಲ್ಪುಗು ಬೇಗ ಲಕ್ಕೊಡೇ.. ಉದಿಪುನ ನಿಸರ್ ದೇವರನ್ ಎದ್ಕೊಂದು, ಸುಗಿತೊಂದು, ತಂಜನ ಉಂಡುದು, ಮನದೀದ್ ಬೆನೊಡು... ಬಯ್ಯದ ಸುಕನಿದ್ರೆಡೇ ಬಚ್ಚಲ್ ಅರತ್ದ್ ಪುಲ್ಯಾನಗ ಪೊಸ ಉಲ್ಲಾಸ ಉರ್ಕೊಡು... ಬಂಜರ ಉಣ್ಪಿನ, ದಿಂಜ ಬೆನ್ಪಿನ ತುಳುವೆರ್ನ ರೀತಿಗ್ ಉಣ್ಪಿನೆಟ್, ಬೆನ್ಪಿನೆಟ್ ರಡ್ಡೆಟ್ಟ್ಲಾ ದಾಕಲೆ ಮಲ್ತ್ ದಿನ ಅಗೋಳಿ ಮಂಜಣನ್ ನಿನತೊನೊಲಿ.. ಕಯಿ ಕಸುಬುಲೆಡ್ಲಾ ತುಳುವೆರ್ ಪಿರ ಒರಿದಿಜೆರ್- ಕಂಗ್ದ್ ಪಾಲೆಡೇ ಮಂಡೆಮುಚ್ಚುವ 'ಮುಟ್ಟಾಲೆ' ಮಲ್ತ್ದ್, ತರೆತಂಪು ದೀವೊಂಬಿನ ಮಿಸ್ಮೆರಕುಲು.
ತುಳುವೆರ್ನ ಇಲ್ಲ್ ಬಾಕಿಲ್ಗ್ ಅಯಿತನೇ ಒಂಜಿ ಪೊರ್ಲು, ಗಾಳಿ, ಬರ್ಸ, ಸಿಮ, ದೊಂಬುಗು ಅನ್ಕೂಲ ಆಪಿಲೆಕ, ಮನಸ್ ತಲ್ಮೆನ ದೀಪಿಲೆಕ, ಸೀಕ್ ಸಂಕಡ ದೂರ ಮಲ್ಪುಲೆಕದ ವಾಸ್ತು ರೀತಿಡೇ ಕಟ್ಟುನ ಭದ್ರತೆದ ಇಲ್ಲಲೆಡ್, ಬಾಕಿಲ್ ದಾರಂದದ ಕುಸುರಿಕೆತ್ತನೆಲಾ ಭರ್ಜರಿಯೆ! ಬಡಪತ್-ಮಲ್ಲಾದಿಗೆಗ್ ಸರಿಯಾದ್ ಗುಡ್ಚಿಲ್, ಗುತ್ತುದಿಲ್ಲ್, ಬಾರಿಕೆದಿಲ್ಲ್, ಪರಾರಿದಿಲ್ಲ್, ಬೂಡು, ಆರಂತಡೆ ಇಂಚ ಇಲ್ಲ್ ಲೆಡ್ಲಾ ತರಂತರ. ಇಲ್ಲ್ ಗ್ ಜಾಲ್, ಜಾಲ್ಡ್ ಗುವೆಲ್, ಪೊರ್ಲುದೊಂಜಿ ತೊಳಸಿಕಟ್ಟೆ ಉಪ್ಪುಂಡೇ... ತೊಳಸಿಗ್ ನೀರ್ದೀದ್, ಬೊಲ್ಪು ದೀದ್, ಸುತ್ತು ಬತ್ತ್ ಪುಡಾಡುನವು ನಿಚ್ಚದ ರೂಢಿಯೇ. ಕೊಟ್ಯ, ಕಿದೆಕಿಲಾರ, ಅಸರ್ದಕ್ಲೆಗ್ಂದ್ ಪರಿಯೆರೆ ನೀರ್ದೀಪಿನ ಗೆಂದಸಾರ ಪದ್ಮ ಕಟ್ಟೆ, ಕೈಕಂಜಿಲೆಗ್ ನೀರ್ದ ಮಲ್ಲ ಕಲ್ಲ ಮರಾಯಿ, ಉಂದು ಮಾತಲಾ ಇಲ್ಲದ ಬಾಗೊಲೇ. ತುಳುವೆರೆಗ್ ಇಲ್ಲ್ ಲಾ ಒಂಜಿ ಪವಿತ್ರ ಜಾಗೆನೇ. ಅಯಿಕಾತ್ರ ಅಮೆಸೂತಿಕ, ಮುಟ್ಟುಚಿಟ್ಟ್ ಸಮ್ಮಂದದ ಮೈಲಿಗೆಗ್ ನಿಷೇಧ-ಸುದ್ದೊದ ಕಟ್ಟ್ ಪಾಡ್ಲಿತ್ತ.
ತುಳುವೆರ್ನ ದುತ್ತೈತಲಾ ದಿಂಜ ದುನ್ನಬಣ್ಣದವತ್ತ್. ರಾಣಿ ಅಬ್ಬಕ್ಕನೇ ಸಾದಾ ಸೀರೆ ತುತ್ತೊಂದು ಗುಣಗಾಂಬಿರ ಮೆರೆತಿನೆನ್ ವಿದೇಶೊದ ರಾಯಬಾರಿಲ್ ಪುಗರ್ದೆರ್. "ಪಿದಯಿಡ್ ಕೋಟೆ ಉಳಯಿಡ್ ಓಂಟೆ" ಪಣ್ಪಿನೆಕ್ ತುಳು ಸಂಸ್ಕೃತಿಡ್ ಮಿನ್ನತ್ ಕಮ್ಮಿ. ಮಾನಮರ್ಯಾದಿದ ಗಡುಮೀರಂದೆ, ಪೊರ್ಲು ಪೊಲಿಕೆಗ್ ಅರಕೆ ಆವಂದಿಲೆಕ್ಕದ ದುತೈತೊಗೇ ದಿಂಜ ಗೌರವ. ಮೋನೆಗ್ ಮುಸುಕು, ಮೆಯಿಮಂಡೆಗ್ 'ಬುರ್ಕಾ
20
