ಜನೊಕ್ಕುಲೆಗ್ ಈ ವಿಚಾರೊ ಹೆಚ್ಚ ತೆರಿದ್ ಜ್ಜಿ, ದಾಯೆಗ್ ಪಂಡ ತುಳುತ್ತ ಪ್ರಾಕ್ದ ಕಾವ್ಯೊಲು ತುಳುಲಿಪಿಟ್ಟೆ ಬರೆದಿತ್ತ್ ದ್ ತಿಕ್ಕ್ಂಡಲ ಇತ್ತೆ ಅಚ್ಚಿ ಮಲ್ಪುನಗ ಮಾತೆರೆಗ್ಲ ಓದಿಯರೆ ಅನುಕೂಲಾವಡ್ಂದ್ ಕನ್ನಡ ಲಿಪಿಟ್ಟೇ ಅಚ್ಚಿ ಮಲ್ಪೊಡಾಂಡ್. ಇತ್ತೆ ಆ ಕಾವ್ಯೊಲೆನ್ ಓದುನಾಯಗ್ ಅವು ಮೂಲತಃ ತುಳುಲಿಪಿಟ್ತ್ ಬರೆದಿತ್ತಿನವು ಪಣ್ಪಿ ವಿಷಯೊ ಗೊತ್ತಾಪುಜಿ. ಅಂಚಾದ್ ತುಳುಲಿಪಿ ಒರಿಯರಾವಡ್ ಚಾಲ್ತಿಗ್ ಬರಿಯರಾವಡ್ ಆ ಲಿಪಿಟ್ಟೆ ತಿಕ್ಕಿನ ಪ್ರಾಕ್ದ ಕಾವ್ಯೊಲು ಪ್ರೇಜನೊಗ್ ಬೂರುಜ್ಜಿ. ಬಹುಶಃ ನನ ವಾ ರೀತಿಡ್ಲ ಅವು ಚಾಲ್ತಿಗ್ ಬರ್ಪುನ ಅವಕಾಶ ಇಜ್ಜಿ.ತುಳುಕ್ಕಲ ಲಿಪಿ ಇತ್ತ್ಂಡ್ಂದ್ ಇನಿ-ಎಲ್ಲೆದ ಜನೊಕ್ಲೆಗ್ ಪಂಡೊನಿಯರೆ ಮಾತ್ರ ಸಾಧ್ಯ ಉಂಡಾತೆ. ಇತ್ತೆ ಅವು ಚಾಲ್ತಿಡುಪ್ಪುನೆ ಪಂಡ ಉಡುಪಿದ ಅಷ್ಟಮಠತ್ತ ಸ್ವಾಮಿಲು ಪಾಡುನ ದಸ್ಕತ್ಡ್ ಮಾತ್ರ. ಬಹುಶಃ ತುಳು ಲಿಪಿತ್ತ ಆಕೇರಿದ ಒರ್ಕಟದ ಜೂವ ಉಂದು. ಈ ಪರಂಪರೆ ಏತ್ ಕಾಲೊ ಒರಿಯು ಪಂಡ್ದ್ ಇತ್ತೆ ಪಣಿಯರೆಗಾಪುಜಿ.
ಇಂಚ ಸುಮಾರ್ ರಡ್ಡರೆ ಸಾವಿರ ವರ್ಸೊಗು ದುಂಬು ಪುಟ್ಟುದು ಸ್ವತಂತ್ರ ಆಯಿನ ತುಳುಭಾಷೆ ಕಾಲಕಾಲೊಗು ಬೇತೆಬೇತೆ ರೂಪೊಲೆಡ್, ಜೀವಂತ ಭಾಷೆದ ಮಾತ ಲಕ್ಷಣೋಲೆನ್ಲಾ ಪಡೆವೊಂದು ಬತ್ತ್ ದ್ ದುಂಬರಿಯೊಂದುಂಡು. ಇತ್ತೆ ತುಳುನಾಡ್ದ ಸೀಮೆದ ಮಿತಿನ್ ಮೀರ್ದ್ ದೇಶವಿದೇಶೂಲೆಡ್ ತುಳುವ ನಾಲಾಯಿಡ್ ನಲಿತೊಂದುಂಡು. ಬೇತೆ ಭಾಷೆ,ಎಲೆ ನಡುಟಿಪ್ಪುನಗ ಸಹಜವಾದ್ ಆ ಭಾಷೆ ಸುರ್ಪೊಸೊಬಗ್ಗದ ಒಂಜೊಂಜಿ ಅಂಶೋಲೆನ್ ತನ್ನುಡಲ್ಡ್ ಸೇರಾವೊಂದು ಮೆರೆವೊಂದುಂಡು. ಕೆಲವು ಸರ್ತಿ ಬೇತೆ ಭಾಷೆ ಅಂಶೊಲು ಮಿತಿಮೀರಿನಂಚನೆ ತೋಜಿಂಡಲಾ ಉಲಯಿದ ಸತ್ಯ ತುಳುತ್ತಲೇ ಪಣ್ಪಿನ ಸಮಾದಾನೊ ನಂಕ್. ತುಉಳು ದಾಂತಿ ಊರುಡು ತುಳುಶಬ್ದಲೆನ್ ಕೇಣ್ಣಗ ಆಪಿನ ಕುಸಿ ವರ್ಣನೆ ಮಲ್ಪರೆ ಸಾಧ್ಯ ಇಜ್ಜಿ ಪಣ್ಪುನವು ನಿಕ್ಲೆಗ್ ಮಾತ ಗೊತ್ತುಂಡು.ಇಂಚಿನ ತುಳುಭಾಶೆಗ್ ಅರಿವಿಜ್ಜಿ. ಆಂಡಲ ಬುಳೆಪಾವುನ ಜವಾಬ್ದಾರಿ ನಮ ಮಾತೆರೆನಲಾ ಮಿತ್ತುಂಡು.
(ಮೂಡಬಿದ್ರೆದ ಮಹಾವೀರ ಕಾಲೇಜಿಡ್ ನಡತ್ತಿನ 'ತುಳುಸಿರಿ'ವಿಚಾರ ಸಂಕಿರಣ ಭಾಗೋಡು ಮಂಡಿತ್ತಿ ಪ್ರಬಂಧೊದ ಸಾರ ರೂಪ)
18
