ಪೊರ್ಲುಗು ಕೇಡಾಂಡ, ಬುಕ್ಕೊಂಜಿ ಕಡೆಟ್ ತುಳುತ್ತ ಸಹಜವಾಯಿನ ಮೂಲ ಶಬ್ದೊಲೇ ಕಣ್ಮದೆಯಾಪುನ ಅಪಾಯೊ ಉಂಡೇ ಉಂಡು.
ಮುಲ್ಪ ಒಂಜಿ ಮುಖ್ಯವಾಯಿನ ಸಂಗತಿನ್ ತೂವೊಡು. ತುಳುಭಾಷೆ ತನ್ನ ಮೂಲರೂಪೊನು ಒರಿತೊಂಡಿನವು ತೆಣ್ಕಾಯಿದ ಮೆಯಿಟ್ಟ್. (ಬಹುಶಃ ಒಂಜಿ ಭಾಷೆ ಆವಡ್, ಸಾಂಸ್ಕೃತಿಕ ಅಂಶ ಆವಡ್ ತನ್ನ ಮೂಲರೂಪೊನು ಹೆಚ್ಚಾದ್ ಒರಿತೊಂಡಿನವು ತಾನ್ ಇತ್ತಿನ ಪ್ರದೇಶಡ್ಡು ತೆಣ್ಕಾಯಿ ಕಡೆಟ್ಟೇಂದ್ ಪನೊಲಿ.ಇಡೀ ಭಾರತೊನೇ ಗಮನೊಗ್ ದೆತ್ತೊಂಡಲ ಈ ವಿಚಾರೊಡು ಸತ್ಯಾಂಷೊ ಉಂಡುಂದು ತೆರಿದ್ಬರ್ಪುಂಡು.) ಅಂಚನೆ, ಬಡಕಾಯಿದ ತುಳು ಆಧುನಿಕತೆದ ಬಿರುಗಾಳಿಗ್ ತಿಕ್ಕಿದ್ ವಿಕಾರಾವೊಂದಿಪ್ಪುನಂಚನೆ ತೆಣ್ಕಾಯಿದ ತುಳು ವಿಕಾರಾಪುನವು ತೋಜುಜಿ. ತೆಣ್ಕಾಯಿದ ತುಳುಟ್ಟ್ ನನಲಾ ಕೆಲವು ಮೂಲ ಅಂಶೊಲು ಒರಿದ್ಂಡ್.
ತುಳು ಲಿಪಿ :
ತುಳು ಪಂಡಿ ಕೂಡಲೆ ಜನೊಕ್ಕುಲು ಸುರುಟು ಕೇನುನ ಪ್ರಶ್ನೆ - 'ಅಯಿಕ್ಕ್ ಲಿಪಿ ಉಂಡಾ?'ಸುಮಾರ್ ೨೦ ವರ್ಸೊಗು ದುಂಬು ಈ ಪ್ರಶ್ನೆ ಕೇಣ್ಣಗ ತೃಪ್ತಿಯಾಪುನಂಚಿನ ಉತ್ತರ ಕೊರಿಯರೆ ಒಂತೆ ಬಂಜ ಆವೊಂದಿತ್ತ್ಂಡ್. ಆಂಡ ಇನಿ, ನಾಲೈನ್ ಪ್ರಾಕ್ದ ತುಳು ಕಾವ್ಯೊಲು ಈ ಲಿಪಿಟ್ಟೇ ತಿಕ್ಕ್ ನೆಡ್ದ್ ಬುಕ್ಕೊ 'ತುಳುಕ್ಕ್ ಅಯಿತ್ತವೇ ಆಯಿನ ಲಿಪಿ ಉಂಡು'ನ್ದ್ ದಾಲ ಅಲ್ಕ್ಜಜಂದೆ ಪಣ್ಯರೆ ಆಪುಂಡು. 'ಅವು ಮಲಯಾಳಲಿಪಿ ಅತ್ತಾ?'ನ್ದ್ ಕೇಂಡ 'ತೂಯಿನಗ ಅಂಚನೆ ತೋಜುಂಡು' ಆಂಡ ಅವು ಮಲಯಾಳಲಿಪಿ ಅತ್ತ್, ಮಲಯಾಳಲಿಪಿತ್ತ ಮೂಲಲಿಪಿ'ನ್ದ್ ಸಮಾದಾನ ಮಲ್ಪೊಲಿ.ಅಯಿಕ್ಕ್ ಬೋಡಾಯಿನ ಆಧಾರೊ ಇನಿ ನಮ್ಮೆರ್ ಡ್ಡುಂಡು. ದುಂಬುದ ಕಾಲೊಡು ಬ್ರಾಣೆರ್ ಮಂತ್ರೋಲೆನ್ ಬರೆಯರೆ ಮಾತ್ರ ಉಪಯೋಗೊ ಮಲ್ತೊಂದಿನ ಈ ತುಳುಲಿಪಿ ಬಾಕಿ ವರ್ಗೊದಕ್ಲೆಗ್ ಬೇತೆಬೇತೆ ಕಾರಣೋಲೆಡ್ಡಾವರ ಉಪಯೋಗೊಗ್ ಬೂರಿಜ್ಜಿ. ಅಂಚಾದ್ ಉಂದು ಉಲಯಿದ ಅದೆಟ್ಟೇ ಇತ್ತ್ ದ್ ಬೇತೆ ಏರೆಗ್ಲಾ ಗೊತ್ತವಂದೆ ಪೋಂಡ್. ಉಂದೆಡ್ಡಾವರ ತುಳು ಭಾಷೆ ಉಂಡು - ತುಳುಲಿಪಿ ಇಜ್ಜಿಂದ್ ವಿದ್ವಾಂಸೆರೆಡ್ದ್ ಪತ್ತಿನ ಸಾಮಾನ್ಯ ಜನೊಕ್ಕುಲು ಮುಟ್ಟ ತೆರಿಯೊಣುನ ಲೆಕ್ಕಾಂಡ್. ಆಂಡ ಪ್ರಾಕ್ದ ತುಳು ಕಾವ್ಯೊಲು ಈ ತುಳುಲಿಪಿಟ್ಟೆ ತಿಕ್ಕಿದ್ ಬೊಳ್ಪುಗು ಬತ್ತಿ ಬುಕ್ಕೊ ಕನಿಷ್ಠ ಪಕ್ಷ ವಿದ್ವಾಂಸೆರೆ ಮಟ್ಟೊಡಾಂಡಲ ಈ ಲಿಪಿತ್ತ ಬಗ್ಗೆ ತೆರಿವು ಮೂಡ್ದ್ಂಡ್. ಆಂಡಲಾ ಸಾಮಾನ್ಯ
17
