ತುಳುಭಾಷೆ
– ಡಾ. ಕೆ. ಪದ್ಮನಾಭ ಕೇಕುಣ್ಣಾಯ
ದ್ರಾವಿಡಭಾಷೆ - ಆರ್ಯಭಾಷೆ
ಭಾರತೊದ ಭಾಷೆಲೆನ್ ಭಾಷಾವಿಜ್ಞಾನಿಲು ಮುಖ್ಯವಾದ್ ರಡ್ಡ್ ವಿಭಾಗ ಮಳ್ಪುವೆರ್.
ಒಂಜಿ 'ದ್ರಾವಿಡಭಾಷೆ'; ಬುಕ್ಕೊಂಜಿ 'ಆರ್ಯಭಾಷೆ'. ಆರ್ಯಭಾಷಾ ಗುಂಪುಡು ಸಂಸ್ಕೃತ,
ಹಿಂದಿ, ಬಂಗಾಳಿ, ಕೊಂಕಣಿ - ಇಂಚಿನ ಭಾಷೆಲು ಬರ್ಪೊ. ದ್ರಾವಿಡ ಭಾಷಾ ಗುಂಪುಡು
ತುಳು, ಕನ್ನಡ, ತಮಿಳ್, ಮಲಯಾಳ ಇಂಚಿನ ಭಾಷೆಲು ಬರ್ಪೊ. ದ್ರಾವಿಡ ಭಾಷೆಲೆಡ್
ಮುಖ್ಯವಾಯಿನವು ಐನ್: ತುಳು, ತಮಿಳ್, ಕನ್ನಡ, ತೆಲುಗು ಬುಕ್ಕೊ ಮಲಯಾಳ.
ಇಂಬೆನ್ ಪಂಚದ್ರಾವಿಡ ಭಾಷೆಲು ಪಣ್ಪೆರ್, ಇಂಬತ್ತಂದೆ ನನಲಾ ಸುಮಾರ್ ಇರ್ವ
ಭಾಷೆಲು ಈ ದ್ರಾವಿಡಭಾಷಾ ಗುಂಪುಡು ಸೇರ್ದುಲ್ಲೊ.
ಭೌಗೋಳಿಕ ಪರಿಸರ
ಕಾಸರಗೋಡು ತಾಲೂಕ್, ದಕ್ಷಿಣ ಕನ್ನಡ ಬುಕ್ಕೊ ಉಡುಪಿ ಜಿಲ್ಲೆ ಸೇರಿನ ನಾಡ್
'ತುಳುನಾಡ್'. ತುಳು ಪುಟ್ಟುದು ಬಳತೊಂದಿಪ್ಪುನ ಊರು. ಮುಲ್ಪದ ಮೂಲಭಾಷೆ
ತುಳು. ಪಂಚದ್ರಾವಿಡಭಾಷೆಡ್ ಬಾಕಿ ನಾಲ್ ಭಾಷೆಲೆಗ್ ಸ್ವತಂತ್ರ ನಾಡ್ ಉಂಡಡಲ
ತುಳುಭಾಷೆ ಕನ್ನಡನಾಡ್ದ ಒಂಜಿ ಕರೆಟ್ - ಕಡಲ ಕರೆಟ್ - ಬದ್ಕೊಡಾಂಡ್. ಆಂಡ
ಬೇತೆ ಸ್ವತಂತ್ರ ನಾಡ್ ತಿಕ್ಕಿಜಡಲಾ ಕಾರ್ ಊರಿಯರ ತಿಕ್ಕಿನ ಜಾಗೆಡೇ ಆಲದ ಮರತ್ತ
ಲೆಕ್ಕ ಬೇರ್ ಊರುದು ಸುತ್ತಮುತ್ತದ ನಾಡ್ಗ್ ಪಸೆರುನ ಶಕ್ತಿನ್ ಬುಳಪ್ಪಾವೊಂಡ್.
ಅಂಚ ಬುಳೆಯಿನ ತುಳು ಕ್ರಮೇಣೋ ಪಂಚದ್ರಾವಿಡ ಭಾಷೆಲೆಡೊಂಜಾದ್
ಮೆರೆವೊಂದುಂಡು.
ಕಾಲ್ದ್ ವೆಲ್ನ ಪಾತೆರ
ಪಂಚದ್ರಾವಿಡಭಾಷೆಲೆಡ್ ತುಳುಲಾ ಒಂಜಿ ಪಣ್ಪುನೆನ್ ಗಮನೊಗ್ ದೆತ್ತೊಂಡ ನಮ ಭಾಷೆದ ಪೆರ್ಮೆ ತೆರಿಯು. ೧೮೪೬ಟ್ ಬೊಳ್ಪುಗು ಬತ್ತಿನ A Comparative
8
