ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ಎಲ್ಯ ಬಾಲೆಲೆಗ್ ಗುನ ಆವಂದಿನ ಸೀಕ್ ಬತ್ತ್ಂಡ ರಾಹುಸೋಂಕನೆ ಆದಿತ್ತಂಡ ದೆಪ್ಪಾವರೆಗಾದ್ರ ತಿರ್ತ ವರ್ಗದ ಕೊರಗೆರ್ ಬಾಲೆನ್ ಮುಟ್ಟಾಂಡ ಸೀಕ್ ಗುನ ಆಪುಂಡುಗೆ . ಅರ್ಧ ಬೈತಿನ ನುಪ್ಪುದ ರಾಸಿನ್ ಮಲ್ಲ ಕೊಡಿ ಇರೆಟ್ ಬಲಸ್ದ್ ಐತಮೇಲ್ಗ್ ಸಾರ್, ಕೊದ್ದೆಲ್ ಮೈತ್ದ್, ತುಲಸಿ ಕಟ್ಟೆಡ್ ಕುಲ್ಲಾದಿನ ಬಾಲೆದ ಕೈಟ್ ಮುಟ್ಟಾದ್ ಮಂಡೆದ ಪಿರ ದುಂಬು ಮೂಜಿ ಸರ್ತಿ ತೊರತ್ದ್ ಕೊರಗೆರೆಗ್ ಕೊರ್ಪುನೆಕ್ಕ್ ರಾಹು ದೆಪ್ಪುನಂದ್ ಪನ್ಪೆರ್ಗೆ. ಬಾಲೆಗ್ ಅಸ್ಪ್ರುಶ್ಯರಾಯಿನ ಕೊರಗೆರ್ನ ಪುದಾರ್ ದೀಂಡಲ ಸೀಕ್ ಬರ್ಪುಜ್ಜಿಗೆ. ಕೆಲೆವೆರ್ ಅಕುಲೆನ ಪುದಾರ್ ದೀವರೆಗಾದ್ರ ಬಾಲೆನ್ ಅಕುಲೆಗ್ ಕೊರ್ದು ಪಿರ ದೆತೊನ್ವೆರ್ಗೆ. ದಾಯೆ ಪಂಡ ಅಕುಲೆನ ಸ್ಪರ್ಶಡ್ ಬೊಕ್ಕ ಪುದಾರ್ಡ್ ಮಂತ್ರದ ಶಕ್ತಿ ಉಪ್ಪುಂಡುಗೆ.
•ಬಾಲೆಗ್ ಗುನ ಆವಂದಿನ ಸೀಕ್ಲೆಗ್ ಅಂಬಿದ ನೀರ್ ಪಾಡ್ದಿನ ಮಲ್ಲ ಕರಟ್ ಎನೆಕೋಲ್ನ್ ದೀದ್ ಬಾಲೆದ ಮೋನೆಗೆ ಆ ನೀರ್ನ್ ತಲ್ಪ್ವೆರ್. ಮುಲ್ಪ ಅಂಬಿಗ್ ರೋಗ ನಿರೋಧಕ ಶಕ್ತಿ ಉಪ್ಪುನವು ಸತ್ಯ.
•ಬಾಲೆ ಬಡವು ತಿನರೆ ಕೇಂಡ್ ಜಡ, ಅತ್ತಡ ಬಂಜಿ ಸಮದಾಂತೆ ಪೊಂಡ ಮಂತ್ರಡ್ ಉಪ್ಪು, ಪುಲಿ, ಮುಂಚಿ, ದಾಸೆಮಿಡ್ ತೊರತ್ದ್ ದಿಕ್ಕೆಲ್ಗ್ ಪಾಡುವೆರ್.
•ಗಂಜಿದ ತೆಲಿಕ್ ಮಜಿತ ತುಂಡು ಪಾಡ್ದ್ ದಿಟ್ಟಿ ತೊಲತ್ದ್ ದಕ್ಕ್ ವೆರ್.
•ಬಾಲೆಗ್ ಅಮೆಗೊರ ಬನ್ನಗ ಮಾರಿಯಮ್ಮನ ಶಾಂತಿಗಾದ್ರ ಹಣ್ಣ್-ಕಾಯಿ ದೀದ್ ಊದ್ ಬತ್ತಿನ್ ಬಾಲೆದ ಕೈತಾಲ್ ಪತ್ತಾದೀಪೆರ್.
•ಒಂಜಿ ವರ್ಗಡ್ ಏಲ್ನೆ ಅಮೆತಾನಿ ಮೂಜಿಕೋಡಿ ಕತ್ತಲೆದ ಪೊರ್ತುಗ್...ಬೊಲ್ಪು ಪತ್ತಾದ್ ಪರ್ಂದ್ ತಾರಾಯಿ ದೀದ್ ಮನೆಟ್ ಅರಿ ಬಿರ್ಕ್ದ್, ತಾರೆದ ಗರಿ ಕಂಠ ದೀದ್ ಬಾಲೆನ್ ಬಜಿ ಮೈಟ್ ಅಲ್ಪ ದೀದ್ ಬಾಕಿಲ್ ಪಾಡ್ದ್ ಬರ್ಪೆರ್. ಬ್ರಹ್ಮ ದೇವೆರ್ ಐತ ಮುಂಡೊಡು ಎಡ್ಡೆ ಬರೆಯಡ್ ಪನ್ಪುನ ನಂಬಲಿಕೆಗಾದ್ರಗೆ.
•ಪುರಿ ಸೊಂಟಡ್ದ್ ಮಿತ್ ಬರಂದಿಲೆಕ್ಕ ಒಕ್ಕನೂಲು ಕಟ್ಟಿವೆರ್.
•ಪುರುಬಾಲೆಗ್ ಸುರುಕು ಪೊಸಅಂಗಿ ಪಾಡುಜ್ಜೆರ್. ಮಲ್ಲೆ ಆತಿನ ಜೋಕ್ಲೆನ ದುಂಬುದ ಪರಅಂಗಿನ್ ಪಾಡ್ವೆರ್.ಆಯುಷ್ಯ ಎಚ್ಚಾಪುಂಡುಗೆ ನಂಬಲಿಕೆ.
•ಬಾಲೆದ ಪೂವಲ್ ಬೂರ್ನಗ ಅವೆನ್ ಅಮೆತ ಗುಂಡಿಡ್ ನಿಗಿಪೆರ್, ಇಜ್ಜಿಡ ಬಾಲೆಗ್ ಸೀಕ್ ಬರ್ಪುಂಡು.
•ಬಾಲೆದ ನಸೆತ ನೆತ್ತಿನ್ ಗಟ್ಟಿಡ್ ಒಚ್ಚರೆಬಲ್ಲಿ. ಅಲ್ಪ ದೇವೆರ್ ಹಾರ ಕೊರ್ಪುನ ಬಾಯಿ ಉಂಡುಗೆ.
96
