ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ಪತ್ ದಿನ ಆಯಿಬೊಕ್ಕ ವಾರೊಗು ರಡ್ಡ್ ದಿನ ಕೈಪೆರಸ, ಕನೇರ್ದ ರಸನ್ ಅರ್ಧ ಚಂಚ ಪರ್ಪಾವೆರ್. ಕೈಪೆರಸಗ್ ತಿಮರೆ, ಮಾದರಿದ ಕೊಡಿ, ಪೇರಂಗಾಯಿದ ಕೊಡಿ, ಕಾಡೇಪಲದ ಕೊಡಿ, ಕುಂಟಾಲದ ಕೊಡಿ, ಒಲ್ಲೆಕೊಡಿ, ತೆಂಡೇಲದ ಬಂಧ, ನೆಟ್ಟ್ ಒವ್ವಾಂಡಲ ಒಂಜೊಂಜಿ ಕೊಡಿತ ರಸನ್ ಬಲಸೊಂದಿತ್ತೆರ್.
•ಪ್ರತಿದಿನ ಮುಸ್ಸಂಜೆದ ಪೊರ್ತುಗು ಮಿರೆತ ಪೇರ್, ಓಮದ ಕಷಾಯ, ತಿಗ, ಸಂಬ್ರವಲ್ಲಿದ ತಪ್ಪು(ಸಾಂಬ್ರಾಣಿ), ಬಚ್ಚಿರೆ ಇಂಚಿನ ಒವ್ವಂಡಲ ಒಂಜೆನ್ .. ಹಿಪ್ಪಲಿ, ಬಜೆ, ಬೊಕ್ಕ ಜಾಯಿಕಾಯಿಗ್, ಎಡ್ಡೆಮುಂಚಿನ್ ಮೂಜಿ ಸುತ್ತು ತರತ್ತದ್ ಬಾಲೆದ ಬಂಜಿಗ್ ಕೊರುಂಡ ಬಾಲೆಗ್ ವಾ ಸೀಕ್ಲಾ ಬರ್ಪುಜ್ಜಿಗೆ. ಕೆಲವೆರ್ ಐತೊಟ್ಟುಗೆ ಪಂಡಿತ ಕೊರ್ಪುನಂಚಿನ ಮೂಲಿಕೆದ (ಚಿನ್ನ) ಮಾತ್ರೆನ್ ರಡ್ಡ್ ಸುತ್ತು ತರೆತ್ತ್ ದ್ ಪರ್ಪಾವೆರ್.
•ವಾರಗ್ ರಡ್ಡ್ ದಿನ ಬಂಜಿಪುರಿ ಎಚ್ಚರೆಬಲ್ಲಿಂದ್ ಓಮದ ಕಷಾಯ ಮಲ್ತ್ ಕೊರ್ಪೆರ್.
•ಬಾಲೆಗ್ ಸೀತ ಆವರೆಬಲ್ಲಿಂದ್ ಮೀದ್ ಬತ್ತಿನ ಬಾಲೆದ ನೆತ್ತಿಗ್ ಕರ್ಬದ ಸಟುಕಡ್ ಕುಂಕುಮನ್ ಬೆಚ್ಚ ಮಲ್ತ್ ಪಾಡ್ವೆರ್.
ಪೆದ್ಯದಿ ಬಾಲೆದ ಕೋಣೆಗ್ ಉಮಿಲ್ ಬರ್ರೆ ಬಲ್ಲಿಂದ್ ದಿನಾ ಬಯ್ಯದ ಪೊರ್ತುಗು (ಅಗಿಷ್ಟಿಕೆಟ್) ತೂ-ತ ಬಾಣಲೆಗೆ ಕೈಬೇವು ಬೊಕ್ಕ ಆಡ್ಸೋಗೆದ ನುಂಗುದಿನ ಪೊಡಿ ಬಿರ್ಕಾವೆರ್. ಐತ ಘಾಟ್ಗ್ ಕೆಲೆಂಜಿ, ಉಮಿಲ್ ಬರ್ಪುಜ್ಜ. ಹೆಚ್ಚದ ಸೀಕುಲು ಉಮಿಲ್ಡ್ದಾವರ ಪಗರುನ ಸತ್ಯ.
•ಚಿನ್ನೆದ ಮಾತ್ರೆನ್ ತಯಾರ್ ಮಲ್ಲುನ ಕ್ರಮ :- ಒಂಜಿ ಪುಂಡಿ ತುಳಸಿ, ಓಮ, ಎಡ್ಡೆಮುಂಚಿ, ಒಲ್ಲೆಕೊಡಿ, ತಿಮರೆ, ಶುಂಠಿ ಮಂಜಲ್ಕೋಡು ರಡ್ಡ್, ನುಗ್ಗೆ ಸೊಪ್ಪು, ಪುಗ್ಗರೆ, ತೊಜಂಕ್, ಪಾಲೆದಕೆತ್ತೆ, ಗಜ್ಜುಗ, ಕಾಲಜೀರ್ದರಿ, ಬಚ್ಚಿರೆ, ಉಂದೆನ್ ಸಮ ಪ್ರಮಾಣಡ್ ಪಾಡ್ದ್ ಮೈತ ಲೆಕ್ಕ ಕಡೆದ್ ಎಲ್ಯ ಎಲ್ಯ ಮಾತ್ರೆ ಮಲ್ತ್ ದ್ ಗುಲಿಗೆ ಮಲ್ತ್ದ್ ದೊಂಬುದ ನಿರೆಲ್ಡ್ ಒಂಜಿವಾರ ನುಂಗಾವೆರ್. ಬೊಕ್ಕ ಒಂಜಿ ಎಲ್ಯ ಬಾಯಿದ ಭರಣಿಗ್ (ಕುಪ್ಪಿಗ್) ಪಾಡ್ದೀಂಡ ವರ್ಷಾಂಡಲ ಹಾಲಾಪುಜ್ಜಿ.
ನಿದಿರೆ ಬರ್ರೆಗಾದ್ರ:
•ಇಡೀ ದಿನ ಬುಲಿಪುನ ಬಾಲೆಗ್ ಮೂಲಿಕೆದ ಮಾತ್ರೆನ್ ತಲೆತ್ ಒಂಜಿ ಚಂಚ ಗಂಗಸರಡ್ ಕೊರ್ಪೆರ್.
72
