ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ರಾಗಿ, ಕೂವೆ, ನವಧಾನ್ಯ, ಬಾದಾಮಿ, ಬೀಜ .. ನೆತ್ತ ಪೊಡಿ ಮಲ್ತ್ದ್ ಪೇರ್ಡ್ ಅತ್ತಡ ನೀರ್ಡ್ ಕೊದಿಪಾದ್ ಪರ್ಪಾಂಡ ಬಾಲೆಲು ಪುಡ್ಕೆ ಪುಡ್ಕೆ ಆಪಗೆ
•ಇಂಗ್, ಬೊಳ್ಳುಳ್ಳಿ, ಜೀರ್ದರಿ, ಓಮ, ಶುಂಠಿ, ಕಿತ್ತಲೆದ ಚೂಲಿ, ದಾಳಿಂಬ ಚೂಲಿ, ಉಂದೆನ್ ಪೊರ್ಲುಡು ನುಂಗಾದ್ ಪೊಡಿ ಮಲ್ತ್ ದೀಯೊಡು. ಬಾಲೆದ ಬಂಜಿಬೇನೆಗ್ ಅತ್ತಡ ನಲೆಂಚಿ ಪೋನಗ ಅರ್ಧ ಚಮಚ ಪೊಡಿಕ್ ಮೂಜಿ ಚಮಚ ಕೊಜಪುಗ್, ರಡ್ಡ್ ಕಲ್ ಉಪ್ಪು ಪಾಡ್ದ್ ಕೊರುಂಡ ಎಡ್ಡೆ.
•ಮಂಜಲ್, ಒಲ್ಲೆಕೊಡಿ, ಚಕ್ರಾಣಿಕೆ, ಗರುಡಪಾತಾಳ, ಈಶ್ವರಬೇರ್, ನುಗ್ಗೆದ ಕೊಡಿನ್ ಕಡೆದಿನೆನ್ ಗುಲಿಗೆ ಮಲ್ತ್ ದೀಯೊಡು. ಬಾಲೆಲೆಗ್ ಕಟ್ಟೆಪಿಜಿನ್, ಕೊಂಬಚೇಳ್, ಪಿಲಿತುಡುವೆ, ತೊಡ್ಡೆ ಉಂದು ಮಿನಿ ಅಗ್ಗಿಂಡ ಮಾತ್ರೆನ್ ಕೈಬೇವುದ ರಸಟ್ ತರೆತ್ದ್ ಅಪಗಪಗ ಪೂಜುಂಡ ವಿಷ ಪೋಪುಂಡು.
-ಶ್ರೀಮತಿ ರತ್ನ ಪೂಜಾರ್ತಿ, 87 ವರ್ಷ, ಕಂಬಲ ತೋಟ, ಅಂಚೆ-ಕೆಮ್ಮಣ್ಣು, ಉಡುಪಿ. ಮೋಲ್ ಪದೆತಿ, ಬೊಕ್ಕ ಅಲೆನ ಅಪ್ಪೆನ ಅಮ್ಮೆರ್ ಮರ್ದ್ ಕೊರೊಂದಿತ್ತೆರ್ಗೆ.
•ಜೋಕ್ಲನ ಪಡ್ಕೆ ಸಂಕಡೊಗು (ಫಿಟ್ಸ್)-ಗುಡ್ಡೆದ ಒಂಜಿ ಬೇರ್ನ್ ಕನತ್ (ಪುದಾರ್ ಪನ್ರೆ ಬಲ್ಲಿ) ದಾಲ್ಚೀನಿ ಎಣ್ಣೆಡ್ ತರೆತ್ದ್ ಕೊರ್ಪೆ.
•ಬಂಗಿ ಇರೆತ ನೀರ್ಡ್ ಅತ್ತಡ ಬಂಗಿ ಒಯ್ಪುನ ಗುಡಿ ಗುಡಿಟ್ ದೀಪುನ ನೀರ್ಡ್ ಈ ಬೇರ್ನ್ ತರೆತ್ದ್ ಕೊರೊಂದಿತ್ತೆರ್.
•ಐವ ವರ್ಷದ ದುಂಬು ಕುಲ್ಲೊಂದು, ನೇಲೆ ಬಲ್ಲೆನ್ ಪತ್ತ್ ದ್ ಪೆದ್ದಾವುನ ಕ್ರಮ ಇತ್ತೆ ಇಜ್ಜಿ. ಇತ್ತೆ ಜೆತ್ತಿನಲ್ಪನೆ ಪೆದ್ದುನ ಅಭ್ಯಾಸ ಆತ್ಂಡ್. ಇತ್ತೆ ಇಲ್ಲಡ್ ಏರ್ ಪೆದ್ದುವೆರ್?
•ದುಂಬು ಒರ್ತಿಗ್ ಪೆದ್ದಾನಗ ಬಾಲೆದ ಬಲತ ಕಾರ್ ಊನ ಆಯಿನ ಬಾಲೆ ಜಲ್ಕಿತ್ಂಡ್. ಅದಗ ಆ ಪೊನ್ನನ ಕಂಡನೆನ ಸಂಬಂಧದ ಪೊನ್ನು ಬಾಲೆದ ಕಾರ್ನ್ ಕುಂಟುಡು ಕಟ್ಟ್ಂಡ ಸಮ ಆಪುಂಡು ಪಂಡಿನೈಕ್ ಇಲ್ಲದಕ್ಲು ಅಂಚನೆ ಮಲ್ಪುನಗ,ಬಾಲೆಗ್ ಸಂಕಟ (ಫಿಟ್ಸ್) ಬತ್ತದ್ ತೈಯರೆ ಪೋನಗ ಯಾನ್ ಅದಗನೆ ಕುಂಟುದ ಕಟ್ಟನ್ ಗಿತ್ತ್ದ್ ಪೊರ್ಲುಡು ತಿಕ್ಕಿಯೆ. ಐಡ್ದ್ ಬೊಕ್ಕ ಬಾಲೆದ ಫಿಟ್ಸ್ ಟಪ್ಪ ಉಂತುಂಡು, ಮಾತ್ರ ಕಾರ್ ಗುನ ಆತಜ್ಜಿ.
•ಇತ್ತೆದಕ್ಲೆಗ್ ಕಾಸ್ದ ಬಲ ಉಂಡು. ಆಯಿನೈಡ್ದ್ ಸಾರ ಸಾರ ಖರ್ಚಾಂಡಲಾ ಸರಿ ಆಸ್ಪತ್ರೆಗ್ ಪೋವೆರ್. ವಂತೆ ಕಾಸ್ ದ ಮರ್ದ್ಲೆಡ್ ಅಕ್ಲೆಗ್ ನಂಬಲಿಕೆ ಪೋತುಂಡುಂದು ಪಂಡೆರ್.
67
