ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಕೆಲವೆರ್ ಸಮಾ ಬೆಯ್ಪಾಯಿನ ನುಪ್ಪುನು ಬಾವಡೆಗ್ ಪಾಡ್ದ್ ಬೆಚ್ಚ ಬೆಚ್ಚ ಉಪ್ಪಗನೇ ಮಂತ್ಡ್ (ಕೊಜಪು ಕಡೆಪಿನ ಮಂತ್) ಸನ್ನ ಕಡೆದ್ ಐಕ್ ನೈತ ಪಸೆನಾ, ಪೇರಾ, ಕೊಜಪುನಾ ಪಾಡ್ದ್ ಬಾಲೆಗ್ ಉನ್ಪಾವೆರ್. ತೆಲ್ಲಾವು, ಮೂಡೆ, ಗಟ್ಟಿ ಇಂಚಿನ ಮಲ್ಲ ತಿನ್ಪುವ ತಿಂಡಿಲೆನ್ ಪೇರ್ಡ್ ಬೊದ್ಲಾದ್ ವಂತೆವಂತೆ ಕೊರ್ಪೆರ್. ಬೊಕ್ಕ ಒಂಜೊರೆ ವರ್ಷ ಆನಗ ಬಾಲೆಲು ಮಲ್ಲಾಕುಲು ತಿನ್ಪುನ ಹಾರೊನು ತಿನೆರೆಗ್ ಪ್ರಯತ್ನ ಮಲ್ಪುಂಡು.
ಮಾತ್ರ ಬಾಲೆಲೆಗ್ ಒಂಜಿ-ಒಂಜರೆ ವರ್ಷ ಮುಟ್ಟ ಬಂಜಿಗ್ ದಾದ ಕೊರುಂಡಲ ಆಡಿಗೆ ಬರ್ಪಾವೊಡು, ಬೊಕ್ಕ ಮೇಲೆಡ್ದ್ ಮೇಲ್ ತಿನಿಯೆರೆ ಕೊರ್ಂಡ ಅಜೀರ್ತೆ ಆಪುಂಡುಗೆ.
ನಡು ನಡುಟು ಪರ್ಂದ್, ಟೊಮೆಟೊ, ಕುಕ್ಕು, ಸೇಬು, ಚಿಕ್ಕು, ಖರ್ಜೂರ ಇಂಚಿನ ಪರ್ಂದ್ ನ್ ತಿನಿಯೆರೆ ಕೊರ್ಪೆರ್. ಇಲ್ಲಡ್ ತಯಾರ್ ಮಲ್ತಿನ ಅರಿತ, ಪೊದೊಲ್, ಬಜೆಲ್, ಕುರ್ಲು, ನೆಲಕಡ್ಲೆನ್ ಬೆರಕಾದ್ ಬೆಲ್ಲದ ಪಾಕೊಡು ಮಲ್ತಿನ ಉಂಡೆಲೆನ್, ಮಿಠಾಯಿನ್, ಹಪ್ಪಲ, ಸೆಂಡಿಗೆಲೆನ್ ಬೊಕ್ಕ ಕೆರೆಂಗ್, ಬಟಾಟೆ, ಕೇನೆ ನೆತ್ತ ಉಪ್ಕರಿ ಮಲ್ತ್ ಕೊರೊಂದಿತ್ತೆರ್ಗೆ.
ಪರ್ರೆಗ್ ಕೊರ್ಪಿನ ಪೇರ್ಗ್ಲಾ ಗೋಧಿ, ನೆಲಗಡಲೆ ಬೀಜ, ಬಾದಾಮು, ಏಲಕ್ಕಿ, ಬಾರ್ಲಿ, ರಾಗಿ ಉಂದೆನ್ ಪೊಡಿ ಮಲ್ತ್ದ್, ಕೊದಿಪಾದ್ ಕಲ್ಲ ಸಕ್ಕರೆ ಕುಂಕುಮ ಕೇಸರಿ ಬೆರಕಾದ್ ಕೊರ್ಂಡ ಬಾಲೆಲು ಪೊರ್ಲುಡ್ ಪುಡ್ಕೆ ಪುಡ್ಕೆನ ಆದ್ ಆರೋಗ್ಯವಂತೆರಾಪೆರ್. ಬಂಜಿಗ್ಲ ನೆತ್ತಿಗೆ ತಂಪುಗೆ. ಇಂಚಿನ ಶಕ್ತಿ ಕೊರ್ಪುನಂಚಿನ ಹಾರೊಡು ವಾ ಕಲಬೆರಕೆಲಾ ಇಜ್ಜಿ.
ಅತ್ತಾಂದೆ ನುಪ್ಪುದ ತೆಲಿನ್ ದಕ್ಕಂದೆ ಐಕ್ ಅಲೆ, ಉಪ್ಪು, ನೈ ಪಾಡ್ದ್ ಅತ್ತಡ ಬೆಲ್ಲ ಪಾಡ್ದ್ ಪರೆಗ್ ಕೊರೊಂದಿತ್ತೆರ್ಗೆ. ಅಪಗಪಗ ನೀರ್ನ್ ಪರ್ಪಾವೊಂದಿತ್ತೆರ್ಗೆ. ಪರ್ಂದ್ದ ಪಾನಕ, ರಸಾಯನ, ಬೊಂಡಗ್ ಕಸ್ತೂರಿ ಜೀರಿಗೆ, ಬಜೆಲ್ನ್ ದುಂಬುನಾನಿ ನೆನತ್ ಕೊರೊಂದಿತ್ತೆರ್, ಬಜಿಲ್ಗ್ ಬನ್ನಂಗಾಯಿ, ಕೊಜಪು ಪಾಡ್ದ್ ಕೊರೊಂದಿತ್ತೆರ್.
ದುಂಬು ತುಳು ಜನಪದರ್ ಹೆಚ್ಚಾದ್ ಬಿತ್ತಿಲ್ಡ್ ಕಾಯ್ಕೈಪು ಮಲ್ತೊಂದಿತ್ತೆರ್. ಐಕ್ ತೂಟಾನ್ದ ಗೊಬ್ಬರ, ಕಿದೆತ ಗೊಬ್ಬರ ಪಾಡೊಂದಿತ್ತೆರ್. ಐತ ತಪ್ಪು-ಕೈಪು ಕಾಯಿಲು ಬಾಲೆಗ್ ಎಡ್ಡೆ. ಮಧು-ಮಾಂಸ ತಿನ್ಪುನಾಕ್ಲು ಬಾಲೆಲೆಗ್ ನಾಲ್ ತಿಂಗಲ್ದ ಬೊಕ್ಕ ತೆತ್ತಿ, ಮೀನ್, ಮಾಂಸದ ತುಂಡುಲೆನ್ ತಿನೆರೆ ಕೊರೊಂದಿತ್ತೆರ್.
62
