ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಮಿರೆಪೇರ್ ಕೊರ್ಪುನ ಕ್ರಮ
ಪೇರ್ ಕೊರೊಂದಿತ್ತಿಲೆಕ್ಕನೆ ಮಿರೆಟ್ ಪೇರ್ ಆಪುಂಡುಗೆ. ಒರ ಬಲತ ಮರ್ಗಿಲ್ದ ಮಿರೆ ಕೊರುಂಡ, ನನೊರ ದತ್ತ ಮರ್ಗಿಲ್ದ ಮಿರೆ ಕೊರೊಡುಗೆ. ಬಾಲೆಗ್ ಪೇರ್ ಕೊರ್ನಗ ಸುರುಕು ಆ ಮರ್ಗಿಲ್ದ ತುಡೆನ್ ಮಿತ್ತ್ ಮಲ್ತ್ದ್ ಕುಲ್ಲೊಡು. ಬಾಲೆದ ಮಂಡೆನ್ ಮಿತ್ ಮಲ್ತ್ದ್ ಪತ್ತೊಡು. ಕೆಬಿನ್ ಬಿರೆಲ್ಡ್ ದುಂಬು ಮಲ್ಪೆರೆ ಬಲ್ಲಿ. ಅಂಚ ಮಲ್ತ್ಂಡ ಬಾಲೆದ ಕೆಬಿ ಆನೆದ ಕೆಬಿ ಆಪುಂಡುಗೆ. ಬೊಕ್ಕ ಸುರುಕು ರಡ್ಡ್ ಬಿರೆಲ್ ನಡುಟು ಮಿರೆತ ತೊಟ್ಟುನು ಗಟ್ಟಿಡ್ ಪತ್ತೊಡು, ದಾಯೆ ಪಂಡ ಪೇರ್ ಒರಾನೆ ಉರ್ಕುದ್ ಬನ್ನಗ ಬಾಲೆ ಪಕ್ಕ ಪಕ್ಕ ಜುಂಬುನಗ ಮೂಂಕುಗ್ ಪೋದ್ ಬಾಲೆ ಒರಾನೇ ಗಾಲ್- ಮೇಲ್ ಆಪುಂಡುಗೆ. ಬಾಲೆ ಪಕ್ಕಪಕ್ಕ ಪೇರ್ ಜುಂಬುನಗ, ಬಂಜಿದುಲಾಯಿ ಗಾಲಿ ಪೋದು ಬಾಲೆಲು ಮಿರೆ ಪೇರ್ ಪರಿಲೆಕ್ಕನೆ ಬಸ ಬಸ ಕಕ್ಕುವ, ಐಡ್ಡಾವರ ಪೇರ್ ಕೊರಿಬೊಕ್ಕ ಬಾಲೆನ್ ಮೆಲ್ಲ ಪುಗೆಲ್ಗ್ ಪಾಡ್ದ್ ಆಡಿಗೆ (ತೇಗ್) ಬರ್ಪಾವೊಡು.
ಬೊಕ್ಕ ಜೆತೊಂದಿಪ್ಪುನಗ ಅಪ್ಪೆ ಮಿರೆ ಪೇರ್ ಕೊರಿಯೆರೆ ಬಲ್ಲಿಗೆ. ಅಪ್ಪೆಗ್ ನಿದಿರೆದ ಅಮಲ್ ಆಂಡ, ಬಾಲೆ ಜುಂಬುದ್ ಜುಂಬುದು ಪೇರ್ ಮೂಂಕುಗು ಜಿಂಜಿದ್ ಉಸಿ ದೆಪ್ಪೆರೆಗಾವಂದೆ ಬಾಲೆಲು ತೈತ್ ಪೋತಿನ ಉದಾರ್ಮೆ ಉಂಡುಗೆ. ನನೊಂಜಿ ಕಾರಣ ದಾದ ಪಂಡ, ಬೊಕ್ಕ ಬಾಲೆಲ್ ಜೆತ್ತದೇ ಪೇರ್ ಕೊರೊಡುಂದ್ ಚದಿ ಮಲ್ಪುಂಡುಗೆ.
ಬಾಲೆಗ್ ಪೇರ್ ಕೊರೊಂದಿತ್ತಂಡ ಅಪ್ಪೆಗ್ ಬೇಗ ಬಂಜಿ (ಗರ್ಭ) ಬರ್ಪುಜ್ಜಿಗೆ. ಅಪ್ಪೆನ ಮಿರೆಪೇರ್ ಬಾಲೆಲೆನ ಬುಲಚ್ಚಿಲ್ಗ್ ಭಾರಿ ಎಡ್ಡೆ, ಬೊಕ್ಕ ವಾ ಸೀಕ್ಲಾ ಬರ್ಪುಜ್ಜಿಗೆ. ದುಂಬುದ ಕೆಲವು ಪೊಂಜೋವುಲು ಐನ್ ವರ್ಸ ಮುಟ್ಟ ಮಿರೆಪೇರ್ ಅತ್ತಾಂದೆ ಬೇತೆ ಹಾರೊನು ಬಾಲೆಗ್ ಕೊರೊಂದಿತ್ತಿಜ್ಜೆರ್ಗೆ
ಬಾಲೆಲೆಗ್ ಅಪ್ಪೆನ ಪೇರ್ ಅಮೃತದ ಲೆಕ್ಕ. ಏಪಲಾ ಏತ್ ಪೊರ್ತುಗ್ಲಾ ಕೊರೊಲಿ. ಕಾಯ್ಪೊಡು, ಗೂಪುಂಡು, ಕುಪ್ಪಿ ದೆಕ್ಕದ್ ಜಿಂಜಾವೊಡು ಪನ್ಪುನ ವಾ ರಗಲೆಲ್ಲಾ ಇಜ್ಜಿ. ಅಂಚಾದ್ ದುಂಬುದಾಕ್ಲು ಪೇರ್ ಆವೆರೆಗ್ ಅಪ್ಪೆಡಿಕ್ಲೆಗ್ ಗಿಡಮೂಲಿಕೆದ ಹಾರನ್ ಬೊಕ್ಕ ಮರ್ದ್ಲೆನ್ ಮಲ್ತ್ ಕೊರೊಂದಿತ್ತೆರ್. ಎನ್ನ ಬಾಲೆ ಆರೋಗ್ಯಡು ಪುಡ್ಕೆ ಪುಡ್ಕೆ ಆದ್ ಪೊರ್ಲುಡು ಬುಲೆವಡ್ ಪನ್ಪುನ ಅಪ್ಪೆನ ಅಂಗಲಾಪು ಅಪ್ಪೆಗ್ ಉಪ್ಪುನವು ಸಹಜವಾತಿನವು.
63
