ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
8. ಪುರುಬಾಲೆದ (ಆ)ಹಾರ
ಲೋಕೊಡಿತ್ತಿನ ಜೀವಿಲೆಗ್ ಬದ್ಕೆರೆಗಾದ್ರ ಹಾರ ಬೋಡೇ ಬೋಡು. ಪುರುಬಾಲೆಗ್ ದೇವೆರ್ ಉಂಡುಮಲ್ತಿನ ಅಪ್ಪೆನ ಮಿರೆಪೇರ್ ಪರಿಪೂರ್ಣವಾಯಿನ ಹಾರ.
ಬಾಲೆ ಪುಟ್ಟಿನ ಗಲಿಗೆಡೇ ಮಿರೆಪೇರ್ ಕೊರೊಡಾಂಡಲ ಸುರುತ ದಿನತ ತೆಟ್ ಪೇರ್ನ್ ಬಾಲೆಗ್ ಪರ್ಪಾವರೆಗ್ ಬಲ್ಲಿಂದ್ ದುಂಬುದಾಕ್ಲು ನಂಬ್ದಿತ್ತೆರ್. ತೆಟ್ ಪೇರ್ನ್ ಪರ್ಪಂಡ ಬಾಲೆಗ್ ಉಸಿಲ್ ಕಟ್ಟುಂಡುಂದು ಆನಿ ಪೇರ್ನ್ ಪರ್ಪಾವರೆಗ್ ಬಲ್ಲಿಂದ್ ದುಂಬುದಕ್ಲು ನಂಬೊಂದಿತ್ತೆರ್. ಇತ್ತೆ ತೆಟ್ ಪೇರ್ನ್ ಪರ್ಪ್ಂಡ ಬಾಲೆಗ್ ಬೋಡಿತ್ತಿನ ರೋಗ ನಿರೋಧಕ ಶಕ್ತಿ ಬರ್ಪುಂಡು. ಅಂಚಾದ್ ಅಪ್ಪೆನ ಪೇರ್ ಬಾಲೆಗ್ ಅಮೃತಗ್ ಸಮಾತಿನವು.
ಬಂಜಿದುಲಾಯಿಡ್ ಬಾಲೆ ಒರ್ಂಬ ತಿಂಗಲ್ಡ್ ಬಂಜಿದ ಚೀರಾವುಡ್ ಕತ್ತಲೆಡ್ ಬುಲೆನೈಡ್ಡಾವರ ಬಾಲೆ ಮಿರೆತ ಕಪ್ಪುದ ಕೊಡಿನ್ ಪಕ್ಕ ಗುರ್ತ ಪತ್ತ್ದ್ ಮಿರೆ ಪೇರ್ನ್ ಅಪಗನೆ ಜುಂಬರೆಗ್ ಪ್ರಯತ್ನ ಮಲ್ಪುಂಡು. ಒಂಜಿ ವೇಲ್ಯೊಗು ಬಾಲೆಗ್ ಪೇರ್ ಪರ್ರೆಗ್ ತೆರಿಜ್ಜಡ ಅಪ್ಪೆ ಆಯಿನಾಲ್ ರಡ್ಡ್ ಬಿರೆಲ್ದ ನಡುಟು ಮಿರೆತ ಕೊಡಿನ್ ಪತ್ತ್ದ್ ನನೊಂಜಿ ಕೈಟ್ ಬಾಲೆನ್ ದೆರ್ತ್ ಪತ್ತ್ ದ್ ಬಾಲೆಗ್ ಪೇರ್ ಪರ್ರೆಗ್ ಸಾಯ ಮಲ್ಪೊಡು.ಪೇರ್ ಸೊರ್ಕುದ್ ಉರ್ಕುನಗ, ಬಿರೆಲ್ ಒತ್ತ್ ದ್ ಪಂಡ ಪೇರ್ ನಿಧಾನೊಡು ಬರ್ಪುಂಡು.
ಬಾಲೆಗ್ ಏಪಲಾ ಒಂಜಿ ಮಿರೆನ್ ಕೊರಂದೆ, ಒರ ಬಲತ ಮರ್ಗಿಲ್ಲದ ಬೊಕ್ಕೊರ ದತ್ತ ಮರ್ಗಿಲ್ಲದ ಮಿರೆನ್ ಕೊರೊಡು. ಬಾಲೆಗ್ ಪೇರ್ ಪರ್ಪಾಯಿಲೆಕ್ಕನೇ ಪೇರ್ ಆಪುಂಡು. ಕೆಲ ಜೋಕ್ಲೆಗ್ ಒಂಜೇ ಮರ್ಗಿಲ್ದ ಅಭ್ಯಾಸ ಆದ್ ನನೊಂಜಿ ಮರ್ಗಿಲ್ದ ಮಿರೆತ ಪೇರ್ ಪರ್ರೆಗ್ ಕೇನುಜ್ಜ. ಅಂಚಾದ್ ಎಲ್ಲಿಡೇ ಬಾಲೆಗ್ ರಡ್ಡ್ ಮರ್ಗಿಲ್ಲ್ದ ಅಭ್ಯಾಸ ಮಲ್ಪೊಡುಗೆ. ದುಂಬುಡು ಕೆಲವೆರ್ ಅಪ್ಪೆಡಿಕ್ಲನ ಮಿರೆತ ಪೇರ್ ಏತ್ ತಂಪು ಪಂಡ ನಾಲೈನ್ ವರ್ಸ ಮುಟ್ಟಲಾ ಬೇತೆ ಹಾರ ಕೊರಂದೆ ಮಿರೆಪೇರ್ ಕೊರ್ದೇ ಮಲ್ಲೆ ಮಲ್ದೆರ್ಗೆ. ಅಂಚಿನ ಬಾಲೆಲು ಎಡ್ಡೆ ಪುನ್ಯ ನಟ್ದೆರ್. ದಾಯೆಪಂಡ ಇತ್ತೆದ ಕಾಲೊಡು ಅಪ್ಪೆಡಿಕ್ಲ್ ಬಾಲೆಗ್ ಒಂಜಿ ತಿಂಗಲ್ ಪೇರ್ ಕೊರುಂಡ ಪುನ್ಯ. ಬೊಕ್ಕ ಪೆತ್ತದಲಾ ಅತ್ತ್, ಎರ್ಮದಲಾ ಅತ್ತ್, ಕೊರ್ಪುನವು ತೊಟ್ಟೆದ ಪೇರ್. ಬೊರಿದ್ ಏತ್ ವಾರ ಆದಿಪ್ಪುಂಡ ದಾನ್ನ, ಕೆಲವೆರ್ ಬಾಲೆಗ್ ಪರ್ಪಾವುನು ತೊಟ್ಟೆದಲಾ ಪೇರತ್ತ್ ಡಬ್ಬಿದ ಪೊಡಿತ. ಪೊಡಿಕ್ ವಂತೆ ಬೆಚ್ಚನೀರ್ ಕೂಟುಂಡ ಪೇರ್ ಸುಲೊಬೊಡು ತಯಾರ್.
ದುಂಬು ಪೇರ್ ಆವರೆಗಾದ್ರ ಪೆದಿಮೆತ್ತಿ ತಾಂಕನೆಡ್ ಬಾಲೆದ ಅಪ್ಪೆಗ್ ಕೆಲವು ಮರ್ದ್ಲೆನ್ ಕೊರೊಂದಿತ್ತೆರ್. ಆ ಮರ್ದ್ಲೆಡ್ ಅಪ್ಪೆನ ಮಿರೆಪೇರೇ ಹೆಚ್ಚಾಪುಂಡುಗೆ, ಒಂಜಿ ವೇಲೆ ಬಾಲೆ ರಾತ್ರೆ-ಪುಲ್ಯ ಬುಲ್ತೊಂದಿತ್ತಂಡವು ಬಡವುಗಾತ್ರಂದ್ ಲೆಕ್ಕ. ಒಂಜಿ ವೇಲೆ ಬಾಲೆಗ್ ಅಪ್ಪೆನ ಮಿರೆತ ಪೇರ್ ಯಾವಂದೆ ಪೋಂಡ ಪೆತ್ತದ ಪೇರ್ನ್ ಬೆಚ್ಚ
60
