ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ಬೊಕ್ಕ ಬಾಲೆನ್ ತರೆಕೊಂಜಿ ಕೈ, ಮುಂಡಗೊಂಜಿ ಕೈ ಕೊರ್ದ್ ಒತ್ತ್ ಪತ್ದ್ ಬಾಲೆದ ಮಿರೆ, ಪೂವೊಲ್, ತುಡೆ, ಸರೀರ ಒರೆಸ್ದ್ ಗಟ್ಟಿಡ್ ಗಾಲಿ ಉರಿಪೊಡುಗೆ. ಬೊಕ್ಕ ಕಾರತುಡೆಟ್ ಕುಲ್ಲಾದ್, ದತ್ತ ಕಾರ್ನ್ ಬಾಲೆದ ಬೆಂಕ್ ತಾಂಗ್ ಕೊರುದು ಬಾಲೆದ ತರೆನ್, ಮೈನ್ ನಸೆತ ಬೊಲ್ದು ಕುಂಟುಡು ಒಚ್ಚಿದ್, ಬೊಕ್ಕೊಂಜಿ ನಸೆತ ಕುಂಟುದು ಮಂಡೆ ಒರ್ಬಡಿಗೆ ಗಟ್ಟಿ ಮುಂಡಾಸ್ ಕಟ್ಟ್ದ್ ಬಾಲೆನ್ ಪುಗೆಲ್ಗ್ ಪಾಡ್ನಗನೇ ಪುರುಬಾಲೆ ಸೋತ್ದ್ ನಿದಿರುಂಡು. ಬೊಕ್ಕ ಮೈ ತೋಜಂದಿಲೆಕ್ಕ ಕುಂಟು ಹೊದ್ದಿದ್ ಪಡಸಾಲೆಗೆ ಪೊಗ್ಗುನ ದುಂಬು ಬೆಂದ್ರ್ ದಿಕ್ಕೆಲ್ದ ಕರಿನ್ ಮುಂಡಗ್ ಮುಟ್ಟಾಂಡ ದಿಟ್ಟಿ ಬೂರುಜ್ಜಿಗೆ. ಬೊಕ್ಕ ಸೀತ ಅವರೆ ಬಲ್ಲಿಂದ್ ಲೋಭಾನದ ಪುಗೆನ್ ಪತ್ತುವರ್. ಬೆಚ್ಚ ಮಲ್ತಿನ ತಟ್ಟಿಗೊಡು ಕುಂಕುಮನ್ ಬೆಚ್ಚ ಮಲ್ತದ್ ಬಾಲೆದ ನೆತ್ತಿಗೆ ಪಾಡುವೆರ್, ಕಣ್ಣೆದ್ ಕುರ್ಬುಗು, ಮುಂಡೊಗು, ಕೆಪ್ಪಡಗೆ, ಮೈತ ಬೊಟ್ಟ ಪಾಡ್ದ್ ಮೈಕ್ ಕುಂಟುನ್ ಸುಂದ್ದ್ ಕುಂಟುದ ತೊಟ್ಟಿಲ್ಗ್ ಪಾಡುವೆರ್. (ಕುಂಟುದ ತೊಟ್ಟಿಲ್ ಬಾಲೆದ ಮಂಡೆ ಉರುಂಟಾಪುಂಡುಗೆ.) ಬೊಕ್ಕ ಬಾಲೆಗ್ ಅಪ್ಪೆನ ಬಂಜಿದುಲಾಯಿ ಜೆತ್ತಿಲೆಕ್ಕನೆ ಬೆಪ್ಪು ಕೊರುಂಡುಗೆ. ಬೇತೆ ತೊಟ್ಟಿಲಾಂಡ ಮಂಡೆಗ್ ನಸೆ ಕುಂಟುದ ತೆರುವೆ ದೀದ್, ಕೈತ ಮುಡುತ ಅಂಚಿ ಇಂಚಿಗ್ ಕುಂಟುಲೆನ್ ಮಡಿತ್ದ್ ದೀಪೆರ್, ಇಂಚ ಪ್ರೀತಿನ ಬಾಲೆ ಪೊರ್ಲ್ಲುಡು ರಡ್ ಮೂಜಿ ಗಂಟೆ ಮುಟ್ಟ ನಿದೆರುಂಡು.
•ಬಾಲೆಗ್ ಅಜಿ ತಿಂಗೊಲ್ ಕರಿಯಿನೆ ಕಾರ್ಡೇ ಕುಲ್ಲಾದ್ ಮೀಪಾವೆರ್. ಒರ್ಂಬ ತಿಂಗಲಾಯಿ ಬೊಕ್ಕ ಬಾಲೆನ್ ಮಣೆಟ್ ಕುಲ್ಲಾದ್ ಒಂಜಿ ವರ್ಸ ಆಯಿಬೊಕ್ಕ ಉಂತಾದ್ ಮೀಪಾವೊಲಿ. ರಡ್ಜ್ ವರ್ಸದ ಬೊಕ್ಕ ರಡ್ಜ್ ದಿನಕೊರ ಐನ್ ವರ್ಸದ ಬೊಕ್ಕ ವಾರಗೊರ ತರೆಕ್ ಮೀಪಾವರ್.
•ತುಳು ಜನಪದರೆನ ದಿಟ್ಟಿಡ್ ಪುರುಬಾಲೆ ಎಣ್ಣೆ ನೀರ್ಡೇ ಬುಲೆಪುಂಡುಂದ್ ಪನ್ಪುನ ನಲಿಕೆ ಉಂಡು. ದುಂಬುಡು ಕೆಲವೆರ್ ಮೀತಿನ ಬಾಲೆದ ಮೈ ಒಚ್ಚಂದನೇ ತೊಟ್ಟಿಲ್ಗ್ ಪಾಡ್ದ್ ತೂಂಕೊಂದಿತ್ತೆರ್ಗೆ.
ಜೋಯಿ ಪದಕುಲು:-
- ಬಾಲೆ ಸುಖಟ್ ನಿದಿರೆ ಮಲ್ಪೊಡಾಂಡ ತೊಟಿಲ್ ಬೋಡೇ ಬೋಡು.
- ಬಾಲೆದ ತೊಟಿಲ್ ಎಂಚ ಉಪ್ಪೊಡು?
- ತೂಂಕುನ ತೊಟ್ಟಿಲ್ಗ್ ಕೀಲ್ ಕೆತ್ತನೆ, ಕನ್ನಡಿ ಏರ್ ದೀಯೆರ್?
- ತೊಟ್ಟಿಲ್ಡ್ ಎನ್ನ ಕಿನ್ನಿಗ್ ಸುಖೋತ ನಿದ್ರೆ ಬರೊಡುಂದು ಅಪ್ಪೆನ ಅಂಗಲಾಪು,
- ಇಡೀ ದಿನ ಬಾಲೆನ್ ಪತೊಂದು ತಿರ್ಗೆರೆಗಾಪುಂಡ?
48
