ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ಕಾರ್ದಅಡಿತ ಮಣೆ ವಂತೆ ಎತ್ತರ ಉಪೊಡ್ಗೆ. ದಾಯೆಪಂಡ ನೀರ್ ಮೈಪುನಗ ಮಂಡೆ ಮೂಂಕುಗ್ ನೀರ್ ಪೋವರೆ ಬಲ್ಲಿ ಪನ್ಪುನ ಕಾರನಗಾದ್ರ.
•ಕೆಲವೆರ್ ಕೊದಿತಿನ ಕಷಾಯ ನೀರ್ನ್ ಕುಂಟುಡ್ ಅರ್ತ್ದ್ ಬಾಲೆ ಮೀಪಾವುನ ಬೆಚ್ಚ ನೀರ್ಗ್ ಕೂಟೊಂದಿತ್ತೆರ್ಗೆ.
•ಬಾಲೆನ್ ಮೀಪಾವುನಾಕುಲು ಬಾಲೆನ್ ಮರಂಕಣೆ ಜೆಪುಡ್ಡು ಬಾಲೆಗ್ ಆಜಿ ತಿಂಗಲಾನ ಮುಟ್ಟ ತಿಪ್ಪಿಡ್ ನೀರ್ ಮೈತೊಂದಿತ್ತರೆಗೆ.
•ಬಾಯಿಗ್ ನೀರ್ ಪೋವಂದಿಲೆಕ್ಕ ದತ್ತ ಅಂಗೈ ಪತ್ತ್ದ್ ಬಲತ್ತ ಕೈಟ್ ಮೈಕ್, ಕಾರ್, ಕೈಕ್ ನೀರ್ ಮೈಪೊಡು. ಮಾತ್ರ ಬಾಲೆದ ಬೆಚ್ಚ ನೀರ್ ಹದ ಬೆಪ್ಪು ಉಪ್ಪೊಡು. ಮಂಡೆಗ್ ಬೊಕ್ಕ ಸರೀರ ಬೆಚ್ಚ ನೀರ್ ಮೈಪರೆ ಬಲ್ಲಿಗೆ.
•ಬೊಕ್ಕ ಕಡ್ಲೆ ಪೊಡಿಟ್ ವಾರೊಗ್ ರಡ್ಡ್ ಸರ್ತಿ ಮೈನ್ ತಿಕ್ಕೊಡು. ಬೊಕ್ಕ ನೀರ್ ಮೈತ್ ದೆಕ್ಕೊಡು.
•ಸರೀರೊಗು ನೀರ್ ಧಾರೆ ಪತ್ದ್ ದತ್ತ ಕೈತ ಕೊಂಬ ಬಿರೆಲ್ನ್ ತಿರ್ತಮೋನೆ ಮಲ್ತ್ದ್ ಬಾಕಿ ಬಿರೆಲ್ನ್ ದೂರ ದೀದ್ ನಾಲೈನ್ ತಿಪ್ಪಿ ನೀರ್ನ್ ರಪರಪ ಮೈತ್ಂಡ ಸರೀರ ಸಿರುಂಟುಂಡುಗೆ.
•ಅಂಚನೆ ಪೂವೊಲುಗ್ ನೀರ್ ಮೊಗ್ಗಂದಿಲೆಕ್ಕ ದತ್ತ ಕೈ ಬಿರೆಲ್ ಅಡ್ಡ ಪತ್ತೊಡು. ಮೈ ದೆಕ್ಕಿಬೊಕ್ಕ ನಮ್ಮ ಕಾರ್ಡ್ ಬಾಲೆನ್ ಕುಲ್ಲಾದ್ ಜಾಗ್ರತೆಡ್ ಕೈಟ್ ನೀರ್ ತೇತ್ದ್ ಬಾಲೆದ ಮೋನೆನ್ ದೆಕ್ಕೊಡು. ಕಣ್ಣೆದಡೆ ಅಂಗೈಟ್ ನೀರ್ ತೇತ್ಂಡ ಜೋಕೆಗ್ ಪೋಡಿಗೆ ಪೋಪುಂಡು. ಬೊಕ್ಕ ಮೋನೆದ ರೋಮಲಾ ತಾಲುಂಡುಗೆ,
•ಬೊಕ್ಕ ಮೂಂಕುನು ಕೈ ಬಿರೆಲ್ಡ್ ದೆಕ್ಕದ್ ಬಾಲೆನ್ ಕಂಕಣೆ ಜೆಪುಡಾವೊಡು. ನೀರ್ ಮೈತ್ದ್ ಬೆರಿ ಕಾರ್ನ್ ದೆಕ್ಕೊಡು, ಕಡೆಕ್ ಪಿರಮಂಡೆಗ್ ರಪರಪ ನೀ ಮೈತ್ ದತ್ತ ಅಂಗೈಟ್ ಉರುಂಟು ಪೂಜೊಂದಿಪ್ಪೊಡು, ದಾಯೆ ಪಂಡ ಮಂಡೆ ಉರುಂಟಾವರೆ, ಮೆದುಳು ಚುರುಕಾವೆರೆ, ಅಮೆಕುಜಾಲ್ ತಾಲ್ಡ್ ಪೊಸಕುಜಾಲ್ ಪೊರ್ಲುಡು ಬುಲವೆರೆಗ್ ಬೊಕ್ಕ ಮೈತ ರೋಮಗ್ ಎಣ್ಣೆ ನೀರ್ ಪೋದು ನೆತ್ತೆರ್ ಸುದ್ದ ಆವೆರೆಗ್ ಭಾರೀ ಎಡ್ಡೆಗೆ.
• ಬೊಕ್ಕ ರಡ್ಡ್ ತಿಪ್ಪಿ ಬೆರಿಕ್ ನೀರ್ ಮೈತ್ದ್ ಬಾಲೆನ್ ಕಾರ್ಡ್ ಕುಲ್ಲಾದ್ ಮೂಜಿ ಸರ್ತಿ ನೀರ್ ಪತ್ತಿ ಕೈಟ್ ಮುಂಡೊಗು ಅಡ್ಡ ಪತ್ತ್ದ್ (ಬಾಯಿಗ್, ಕಣ್ಣಿಗೆ ಬೂರಂದಿಲೆಕ್ಕ) ನೆತ್ತಿಡ್ದ್ ಮೈತ್ದ್ ರಡ್ಡೆ ಪುಗೆಲ್, ರಡ್ ಕಾರ್ಗ್, ಮೂಜಿ ಸರ್ತಿ ನೀರ್ ಮೈತ್ದ್ ಒಂಜಿ ತಿಪ್ಪಿ ನೀರ್ನ್ ಬಾಲೆಗ್ ಪೆದಂಬುಸುತ್ತು ಕನತ್ದ್ ನೆಲಕ್ ಮೈಪುನವು ಗಾಲಿ ಸೋಂಕಾವಂದಿಲೆಕ್ಕ ಮಲ್ಪುನ ಮುಡ್ಡುದ ಕ್ರಮಗೆ.
47
