ತುಳು ಜಾನಪದ ಸಂಪ್ರತಿಡ್ ಪುರುಬಾಲೆ
• ಬೊಕ್ಕ ಕಂಕಣೆ ಜೆಪ್ಪಾದ್ ಪಿರಮಂಡೆಗ್ ಎಣ್ಣೆ ಪೂಜಿದ್ ಉರುಂಟುಗ್ಲಾ ಮಿತ್ತಡ್ದ್ ತಿರ್ತ್ಲಾ ಒತ್ದ್ ತಿಕ್ಕೊಡು.
• ಪತ್ ಪದಿನೈನ್ ಸರಿ ಕೆಬಿ, ಕೆಕ್ಕಿಲ್ ಪೂಜೊಡು.
•ತಿರ್ತ್ ಮೋನೆ ಪಾಡ್ದ್ ಅಡ್ಡಡ್ಡ ಪೂಜಿನಗ ರಡ್ಡ್ ಅಂಗೈಟ್ ನಡುಬೆರಿಡ್ದ್ ಮರ್ಗಿಲ್ಗ್ ಪೂಜೊಡು.
• ಬೊಕ್ಕ ತಿರ್ತ್ ಸೊಂಟ ಮುಟ್ಟ ಪೂಜೋಡು.
•ಸೊಂಟೊಗುಲಾ ಮಿತ್ತ್ ದಂಚನೆ ಅಡ್ಡ ಪೂಜೊಡು.
•ಕೆಕ್ಕಿಲ್ಲ ಮಿತ್ತ್ದ ಬೆರಿಕೋಲುನು ಕೊಂಬಬಿರೆಲ್ಲದ ತಿರ್ತ್ ಈಸ್ದ್ ಮುಚ್ಚಿ ಅಂಡೆದಲ್ಪ (ಒಕ್ಕನೂಲುದಲ್ಪ) ಮೂಜಿ ಬಿರೆಲ್ದ ಕೊಡಿಟ್ ಒತ್ತೊಡು. ಮೂಜಿ ಸರ್ತಿ ಒಂಜೊಂಜಿ ಕೈನ್ ಕುಡ್ದ್ತ ನಾಜೂಕುಡ್ ಪಿರ ಬಗ್ಗಾದ್ ಬೆರಿಕ್ ಅಂಗೈ ಕೊನರೊಡು. (ಬೆರಿದೆಕ್ಕಿಲೆಕ್ಕ), ರಡ್ಡಿ ಸರ್ತಿ ಒಂಜೊಂಜೆ ಕಾರ್ದ ಪಾದೊನ್ ಪತ್ತೊಂದ್ ಮಿತ್ತ್ ಪಿಂಕಾನ್ ಮುಟ್ಟ ತಿಕ್ಕೊಡು. ಬೊಕ್ಕ ರಡ್ಡ್ ಕಾರ್ನ್ಲಾ ಒಂಜಿ ಕೈಟ್ (ತೋರ್ ಬಿರೆಲ್ ಇಡೆಟ್ ಪಾಡ್ದ್) ಮಿತ್ತ್ ಮೋನೆ ತಿಕ್ಕೊಡು. ಬೊಕ್ಕ ಮಿತ್ತ್ಡ್ದ್ ತಿರ್ತ್ ಬಲ್ತಕೈನ್ ಇಡೆಟ್ ದೀದ್ ತಿರ್ತ್ ಈಸೊಡು. ರಡ್ಡ್ ಮೊರಂಪು ಮಡತ್ತ್ದ್ (ಕಪ್ಪೆದಲೆಕ್ಕ) ಪಿಂಕಾನ್ ಬೊಕ್ಕ ಕೂಟುನು ಅಡ್ಡಡ್ಡ ತಿಕ್ಕೊಡು.
•ಬೊಕ್ಕ ಮರಂಕನೆ ಮಲ್ತದ್ ಕುಂಟುದ ಮೇಲ್ಡ್ ಉಂತಾದ್ ದತ್ತಕೈಟ್ ಬೆರಿಕ್ ತಾಂಗ್ ಕೊರುದು ಬಲಕೈಟ್ ಕಾರ್, ಪಾದ ಪೂಜಿದ್ ನೆಲಕ್ ನೆಟ್ಟ ನುರ್ತ್ದ್ ಅಪಗನೆ ಪಜೆಟ್ ಅತ್ತಡ ಪಾಲೆಡ್ ಜೆಪುಡಾದ್ ಅರ್ಧ ಗಂಟೆ ಬಾಲೆ ನಿದ್ರೆ ಮಲ್ತ್ಂಡ ಎಡ್ಡೆಗೆ.
• ಎಣ್ಣೆ ಮಸಾಜ್ ಇಂಚ ಮಲ್ತಂಡ ಎಲುಕುಲು ಗಟ್ಟಿಯಾಪುಂಡುಗೆ. ನರನಟ್ಟ್ ಸಡಿಲಾಪುಂಡುಗೆ, ಮೈ-ಕೈ ಕಾರ್ ಪಂಡಿಲೆಕ್ಕ ಮಡ್ತ್ ಬುಡ್ಪಾದ್ ಬಗ್ಗಾವರೆಗಾಪುಂಡುಗೆ. ಚರ್ಮ ನಸೆ ಬೂರುಂಡುಗೆ. ಮೈಟ್ ವಾ ಪೊಡಿಗಜ್ಜಿಲಾ ಬೂರುಜ್ಜಿಗೆ. ಎಲ್ಲಿಡ್ ಬಾಲೆಗ್ ಇಂಚ ಎಡ್ಡೆ ಅನುಪಾನ ಕೊರುಂಡ ತೈನೆಟಲಾ ಪೊರ್ಲ್ಲುಡು ಬೆಂದ್ ತಿನೊಲಿಂದ್ ದುಂಬುದಾನ ನಂಬೊಲಿಕೆ. ತಡ್ಪೆಗ್ ಅಂಬಿ ಬಲ ಎಂಚನ ಅಂಚನೆ ಬಾಲೆಲೆಗ್ ಎಣ್ಣೆದ ಬಲಂದ್ ಹಿರಿಯಾಕ್ಲು ಪನ್ಪೆರ್.
ಬಾಲೆನ್ ಮೀಪಾವುನ ಕ್ರಮ :-
• ರಡ್ಡ್ ಮಣೆ, ರಡ್ ಮಲ್ಲ ಕೊಡಪಾನ ನೀರ್ ದಿಂಜುನ ಅಗೆಲ ಬಾಯಿದ ಮಣ್ಣ್ ದ ಮರಾಯಿ, ಬೊಕ್ಕ ಅಗೆಲ ಬಾಯಿದ ತಿಪ್ಪಿನ್ ದುಂಬುದಾಕ್ಲು ಬಾಲೆನ್ ಮೀಪಾವರೆಗ್ ಉಪಯೋಗ ಮಲ್ತೊಂದಿತ್ತೆರ್ಗೆ.
46
