ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
• ನಮ್ಮ ಕಾರದ್ ಪಾದದಲ್ಪ ಬಾಲೆದ ತರೆದೀದ್ ಮರಂಕಣೆ ಜೆಪುಡಾವೊಡು. ಸುರುಕು ಮುಡ್ಸುಗಾದ ಅಂಗೈಕ್ ಎಣ್ಣೆ ಪಾಡ್ದ್ ಬಾಲೆದ ಪಾದೊಗು, ಪೂವೊಲ್ಗ್, ನೆತ್ತಿಗ್ ಮುಟ್ಟಾವೊಡು. ಸುರುಕು ಬಾಲದ ನೆತ್ತಿಗೆ ಪೂಜೊಡು. ಬೊಕ್ಕ ಮುಂಡೊಗು, ಕೆನ್ನಿಗ್, ಮೇಲ್ಮುಖವಾದ್ ಪೂಜೊಡು. (ಉಂದು ಒಟ್ರಾಸಿ ಕುಜಾಲ್ ಬುಲೆವಂದಿಲೆಕ್ಕ ಮುಂಡಗ್ ಪೂಜೆನ್ ಅಂಗೈಟ್ ಒತ್ತ್ದ್ ತಿಕ್ಕೊಡು. ಕೆಲವೆರ್ ಎಣ್ಣೆ ಪೂಜುನಾಕ್ಲೆನ ಮುಂಡೊಗು ಎಣ್ಣೆ ಪೂಜಿದ್ ಬಾಲೆದ ಮುಂಡೊನ್ ಗಸಗಸ ತಿಕ್ಕುವೆರ್. ಈ ಕ್ರಮೊಟು ಬಾಲೆದ ಮುಂಡ ಎತ್ತರ ಆವಂದೆ ಸಪಾಯಿ ಆಪುಂಡುಗೆ, ಬೊಕ್ಕ ಮುಂಡಡ್ ಇತ್ತಿನ ಕೂಜಲ್ ತಾಲ್ಡ್ ಪೋಪುಂಡುಗೆ. ಆನೆದ ಕೆಬಿ ಆವಂದಿಲೆಕ್ಕ ಪಿರಮಲ್ತ್ ಹದೊಟು ತಿಕ್ಕೊಡು. ಕುರ್ಬುನ್ ಉಂಗಿಲ ಬಿರೆಲ್ದ್ ಕಾಮನ ಬಿಲ್ಲ್ದ ಲೆಕ್ಕ ತಿಕ್ಕಂಡ ಕುರ್ಬು ಸಪೂರೊಡು ಅಂಚನೆ ಬರ್ಪುಂಡುಗೆ.
•ಮೂಂಕುದ ಒಟ್ಟೆಡ್ದ್ ಮಿತ್ತ್ ಮುಟ್ಟ ರಡ್ಡ್ ಕೈತ ಕೊಂಬ ಬಿರೆಲ್ಡ್ ಮುಕ್ಕೆದ ಲೆಕ್ಕ ತಿಕ್ಕ್ಂಡ ಸಂಪ್ಯಾದ ಮುಕ್ಕೆದ ಲೆಕ್ಕ ಆಪುಂಡುಗೆ.
•ಮೂಂಕುದ ತಿರ್ತ್ ಬಿಮ್ಮೊದ ಮಿತ್ತ್ ಕೊಂಬ ಬಿರೆಲ್ಡ್ ಅಡ್ಡಡ್ಡ ತಿಕ್ಕೊಡು. ಗಲ್ಲದ ನಡುಟು ಗುರಿ ಬರಿಲೆಕ್ಕ ತಿಕ್ಕೊಡು.ರಡ್ಡ್ ಕೆಪ್ಪಡೆನ್ ರಡ್ ಅಂಗೈಟ್ ತಿಕ್ಕೊಡು. ಕೆಪ್ಪಡೆ ಉಬ್ಬರಂದಿಲೆಕ್ಕ ಕೊಂಬ ಬಿರೆಲ್ನ್ ಬಾಯ್ದ ಉಲಾಯಿ, ನಾಲ್ ಬಿರೆಲ್ನ್ ಕೆಪ್ಪಡೆದ ಪಿದಾಯಿ ಪಾಡ್ದ್ ರಡ್ಡ್ ಕೈಟ್ ಕೆಪ್ಪಡೆ ತಿಕ್ಕೊಡು. ಅಂಚನೇ ಕೈ ಬಿರೆಲ್ ಒಟ್ಟೆ ಮುಟ್ಟಲ ಬರೊಡು. ತಿರ್ತ ಬಿಮ್ಮದಲ್ಪ ಒಟ್ಟೆನ್ ಅಡ್ಡಡ್ಡ ತಿಕ್ಕ್ದ್ ರಡ್ಡ್ ಕೊಂಬ ಬಿರೆಲ್ಡ್ ಗಲ್ಲೊಗ್ ತಿರ್ತ್ ಮುಖೊಟು ಪೂಜಿದ್ ಬಿರೆಲ್ ಕೂಡಾವೊಡು. ಗಲ್ಲ ಚೂಪು ಬರ್ರೆ ಬೊಕ್ಕ ಕೆಕ್ಕಿಲ್ದ ತಿರ್ತ್ ಮುಖೋಟು ಪೂಜೊಡು. ಕೆಕ್ಕಿಲ್ ಉದ್ದಾದ್ ಶಂಕದಾಕಾರೊಗು ಬರ್ಪುಂಡುಗೆ.
• ರಡ್ ಪುಗೆಲ್ನ್ ಮುಡು ಅಗೆಲ ಬರ್ರೆಗಾದ್ರ ಕೆಕ್ಕಿಲ್ಡ್ದ್ ಅಡ್ಡ ಪೂಜೊಡು. ತಿಗಲೆಗ್ ಪೂಜಿದ್ ರಡ್ದ್ ಅಂಗೈಟ್ ರಡ್ಡ್ ಮರ್ಗಿಲ್ಡ್ ತಿಕ್ಕೊಡು. ನಡುಡ್ದ್ ಮರ್ಗಿಲ್ ಮುಟ್ಟ ಬೊಕ್ಕ ಮಿರೆತಲ್ಪ ಅಂಗೈಟ್ ಉರುಂಟುರುಂಟು ತಿಕ್ಕೊಡು. ಕೆಲವೆರ್ ಪೊನ್ನು ಬಾಲೆದ ಮಿರೆತ ಪೇರ್ನ್ ಪುಂಟುವೆರ್ಗೆ. ಅಂಚ ಪುಂಟುಂಡ ಪ್ರಾಯ ಬನ್ನಗ ಮಿರೆ ಉರುಂಟು ಆಪುಂಡುಗೆ.
• ಬೊಕ್ಕ ಕೈನ್ ಕತ್ತರಿ ಮಾರ್ಕ್ ಪಂಡ ನಮ್ಮ ದತ್ತ ಕೈ ಬಾಲೆದ ದತ್ತ ಮರ್ಗಿಲ್ಲದ ತಿಗಲೆಗ್, ಬಲತ ಕೈ ಬಾಲೆದ ಬಲ ಮರ್ಗಿಲ್ಡ ತಿಗಲೆಗ್ ಪೂಜೊಡು. (ತಿಗಲೆ ಅಗಲ ಬೂರೆಗಾತ್ರ).
• ಕೈತ ರಟ್ಟೆಡ್ ತಟ್ಟ್ ಬಿರೆಲ್ ಮುಟ್ಟ ಪೂಜಿದ್, ಬಾಲೆದ ಅಂಗೈನ್ ನಮ್ಮ ಒಂಜಿ ಕೈಟ್ ಪತ್ದ್ ಬೊಕ್ಕೊಂಜಿ ಕೈಟ್ ಪುಗೆಲ್ ಮುಟ್ಟ ತಿಕ್ಕೊಡು.
44
