ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಇಂಚಿನನೆ ನನೊಂಜಿ ಕುಸಲ್ದ ಪದ ಉಂಡು
ಓಡೆ ಪೋಪ ಕುಡಂಚ? ಬಲ್ಲಾಳೆ ಬೊಟ್ಟುಗು ಬಾರ್ ಪೆಜರೆ ಪೋಪೆ.
ಕಲ್ಲ್ ಮುಲ್ಲು ಕಂತ್ಂಡ ದಾದ ಮಲ್ಪುವ? ಕುಡೆಕ್ ನೂರುವೆ.
ಕುಡೆಟ್ ಏರುಂಡು? ಕುಡೆಟ್ ಅಜ್ಜಿ ಉಂಡು.
ಅಜ್ಜಿ ದಾದ ಕೊರ್ಪುಂಡು? ಅಜ್ಜಿ ಗೆಜ್ಜೆ ಕೊರ್ಪುಂಡು.
ಗೆಜ್ಜೆನ್ ದಾನೆ ಮಲ್ಪುವ? ಗೆಜ್ಜೆನ್ ಪೆತ್ತಗ್ ಕಟ್ಟುವೆ.
ಪೆತ್ತ ದಾದ ಕೊರ್ಪಲ್? ಪೆತ್ತ ಪೇರ್ ಕೊರ್ಪಲ್.
ಪೇರ್ನ್ ದಾದ ಮಲ್ಪುವ? ಪೇರ್ನ್ ದೇವೆರೆಗ್ ಕೊರ್ಪೆ.
ದೇವರ್ ದಾದ ಕೊರ್ಪೆರ್? ದೇವೆರ್ ಗಂಧ ಕೊರ್ಪೆರ್
ಗಂಧನ್ ದಾದ ಮಲ್ಪುವ ? ಗಂಧನ್ ಮುಂಡಗ್ ಪಾಡುವೆ
ಮುಂಡ ದಾದ ಕೊರ್ಪುಂಡು?ಮುಂಡ ಪೇನ್ ಕೊರ್ಪುಂಡು.
ಪೆನ್ನ್ ದಾದ ಮಲ್ಪುವ?ಪೇನ್ ಕೋರಿಗ್ ಪಾಡುವೆ.
ಕೋರಿ ದಾದ ಕೊರ್ಪುಂಡು? ಕೋರಿ ತೆತ್ತಿ ಕೊರ್ಪುಂಡು,
ತೆತ್ತಿನ ದಾದ ಮಲ್ಪುವ? ನಿರೆಕರೆತ ಬಿನ್ನೆರ್ ಬನ್ನಗ ಚಂಯಿ ಚಂಯಿ ಮಲ್ಲುವೆ.
ಇಂಚ ಪದಪಂದ್ ನಲಿಪುನ ಪದಕ್ಲೆಡ್ ಸಾಹಿತ್ಯಡ್ದ್ ಎಚ್ಚ ಬಾಲೆಲೆಗ್ ಕುಸಿ ಕನಪುಂಡು ಬೊಕ್ಕ ಐತ ಬುದ್ದಿಯಂತಿಕೆದ ಬುಲವನಿಗೆಲಾ ಸಹಾಯ ಮಲ್ಪುಂಡು.
ಬಾಲೆಲೆಗ್ ಮುರ್ಗ, ಪಕ್ಕಿಲೆನ ಕತೆಕುಲು ಪಂಡ ಆಕುಲೆಗ್ ಮುಚ್ಚಂದಿನ ಕಣ್ ಬಾಯಿ, ಅವೊಂಜಿ ಕಾರ್ನಿಕದ ಲೋಕ. ಮುಲ್ಪ ಮರ, ದೈ, ಪಕ್ಕಿ, ಮಾತಲಾ ಬಾಲೆಲೆನ ದೋಸ್ತಿಲು. ಮುಲ್ಪ ಪಕ್ಕಿದ ಐತದ ವಿವರನೆದ ಪೆರ್ಮೆ ಈ ಪದೊಟುಂಡು.
ಪಕ್ಕಿಲು ಪಕ್ಕಿಲು ರಾಮಾಸ್ವಾಮಿಪಕ್ಕಿಲು- ಇಂದ್ರದೇವೆರೆ ಗಿಳಿಕುಲು
ಅತ್ತೊಸದ ಕಟ್ಟಡವೋ-ಮಂಜಲ್ ಬಣ್ಣದ ಪಕ್ಕಿಲು
ಈಶ್ವರ ದೇವೆರೆ ಕಟ್ಟಡವೋ- ಕುಂಕುಮ ಬಣ್ಣದ ಪಕ್ಕಿಲು
ಯಾನ್ ಪೋನಗ ಪಕ್ಕಿ-ದೆಂಗ್ದ್ ಕುಲಿಯಲೆ
ಯಾನ್ ಪೋನಗ ಪಕ್ಕಿ-ತರೆ ಬಾರುವಲೆ
ಯಾನ್ ಪೋನಗ ಪಕ್ಕಿ-ಪೂ ಮುಡಿಪಾಲೆ
ಯಾನ್ ಪೋನಗ ಪಕ್ಕಿ-ಕನ್ನಟಿ ತೂಪಾಲೆ
ಯನನ್ ತೂಯಾಲ್ ಪಕ್ಕಿ-ದೆಂಗ್ ದೀಯಾಳ್
ಯಾನ್ ಪೋನಗ ಪಕ್ಕಿ-ಕುಂಕುಮ ಪಾಡ್ವಳ್
ಯನನ್ ತೂಯಾಲ್ ಪಕ್ಕಿ-ದೆಂಗ್ ದೀಯಾಲ್
36
