ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ದೋಷ ಇತ್ತ್ಂಡ ಧಾರ್ಮಿಕ ರೀತಿಡ್ ಪಿರಿಕಟ್ಟ್ ಮಲ್ಪಾವೆರ್. ಇತರ ವರ್ಗದಾಕ್ಲೆಡ ಜಾತಕ (ಪುಟ್ಟಿರಾಸಿ) ಮಲ್ಪುನ ಕ್ರಮ ದುಂಬು ಇತ್ತಿಜ್ಜಿ. ಆಂಡ ಇತ್ತೆ ಆಕ್ಲೆಡಲಾ ಜಾತಕ ಮಲ್ಪುನ ಕಟ್ಟ್ ಬೈದ್ಂಡ್.
ಬ್ರಾಣೇರಡ್ ಕಡಿರ್ ಬೊಕ್ಕ ಮಡಿರ್ ಬಾಲೆಲೆನ್ ಅಪ್ಪೆ ಇಲ್ಲಡ್ ಪೆದುಪುನ ಕ್ರಮ ಉಂಡು. ಪತ್ತೊಂಜಿ ದಿನತಾನಿ ಇಲ್ಲದ ಸುದ್ದಗಾದ್ರ ಸುದ್ಧ ಪುನ್ಯಾರ್ಚನೆದ ಧಾರ್ಮಿಕ ವಿಧಿವಿಧಾನಲೆನ್ ಮಲ್ತ್ದ್ ಇಲ್ಲ್ ಕೊಡೀಕಡೆ ಪಂಚಗವ್ಯದ ತೀರ್ಥ [ಪೇರ್, ಬೆಂಜನ, ನೈ, ಅಂಬಿ, ಪೆತ್ತದ ಪಡಿಕೆ (ಗೋಮೂತ್ರ) ತಲ್ಪುವೆರ್. ಆನಿಯೇ ಆಚಾರಿನ್ ಲೆಪ್ಪಾದ್ ಕೆಬಿನ್ ಕುತ್ತಾವೆರ್. ಆನಿ ಪುಲ್ಯಕಾಂಡೆ ಬಾಲೆಗ್ ಕ್ರಮಪ್ರಕಾರ ಎಣ್ಣೆ ಪೂಜಿದ್-ಮೀಪಾದ್, ಲೋಬಾನದ ಪುಗೆ ಪಾಡ್ದ್ ಬಜೆ-ಪಿನಾರಿ, ಚಿಹ್ನೆದ ಮಾತ್ರೆನ್ ತರೆತ್ದ್ ಕೊರ್ಪೆರ್. ಗೋಧೋಲಿದ ಮೂರ್ತೊಗ್ ನಾಲ್ಜನ ಹಿರಿಯ ಮುತ್ತೇಸಿನಕುಲು ಬಾಲೆನ್ ತೊಟೆಲ್ಗ್ ಪಾಡುವೆರ್. ಬತ್ತಿನ ಬಿನ್ನೆರೆಗ್ ತೀಪೆ ಪಟ್ಟ್ ವೆರ್.
ಆನಿ ಅಜ್ಜಿ-ಪಿಜ್ಜೆರ್ನಕಲು ಜೆತ್ತ್ದ್ ಮಲ್ಲಾತಿನ ಚರಿತ್ರೆ ಇತ್ತಿನ ತೊಟಿಲಿನ್ ಪಲಪಲ ದೆಕ್ದ್, ಮರತ ಆಂಡ ರಂಗ್ ಕೊರುದು ದೀಪೆರ್. ಐಕ್ ಪೂತ ಮಾಲೆದ, ಸರಕ್ಲೆಡ್ ಪೊರ್ಲು ಐತ ಮಲ್ಪುವೆರ್. ಮುಂಡೇರ್ದ ಪಜೆತ ಮಿತ್ತ್ ಪಾಲೆ ದೀದ್ ಮೆತ್ತನೆ ಕುಂಟುಪಾಡ್ದ್ ಆನಿದ ದಿನಕ್ ಅಪ್ಪೆನ ದಾರೆದ ಕುಂಟುನು ಮಡಿತ್ತದ್ ಪಾಡುವೆರ್.
ಸುರುಕು ಅಪ್ಪೆ ಬಾಲೆಗ್ ಆರತಿ ಮಲ್ತ್ದ್, ಬಾಲೆಗ್ ಸಕ್ಕರೆ ಪಾಡ್ಡಿನ ಪೇರ್ ಪರ್ಪಾದ್, ಬಜೆ-ಪಿನಾರಿನ್ ನಕ್ಕಾದ್ ಉಡುಗೊರೆ ಕೊರ್ಪೆರ್. ಬೊಕ್ಕ ತೊಟ್ಟಿಲ್ದ ಅಂಚಿ ಇಂಚಿಡ್ ರಡ್ಡೆ ರಡ್ಡೆ ಜನ ಹಿರಿಯ ಮುತ್ತೇಸಿ ಪೊಂಜೋವುಲು ಉಂತುದ್ ಸುರುಕ್ ಐತ ಮಲ್ತಿನ ಗುಂಡು ಕಲ್ಲನ್ ಮೂಜಿ ಸರ್ತಿ ಕೈ ಬದಲ್ ಮಲ್ತೊಂದು ತೊಟ್ಟಿಲ್ದ ತಿರ್ತ್ ಮಿತ್ತ್ ಸುತ್ತ ಕೊನೋದ್ ಬಾಲೆದ ಮಂಡೆದ ಬಲ ಮರ್ಗಿಲ್ಡ್ ದೀಪೆರ್. ಅಂಚನೆ ತೆಪ್ಪಿತ್ತಿನ ತಾರಾಯಿನ್ ದತ್ತ ಮರ್ಗಿಲ್ಡ್ ದೀಪೆರ್. ಪಂಡ ಬಾಲೆಗ್ ಗುಂಡು ಕಲ್ಲದ ಲೆಕ್ಕ ಆಯಷ್ಯ, ತಾರಾಯಿದ ಲೆಕ್ಕ ಫಲವಂತಿಕೆದ ಆರೋಗ್ಯ ಕೊರಡ್ಂದ್ ದುಂಬುದಾನ ಆಲೋಚನೆ. ಆ ಬಾಲೆದ ಬದ್ಕ್ ತೈನೆಂಗೆ ಕಲ್ಪವೃಕ್ಷದಲೆಕ್ಕ ನನೊರಿಯಗ್ ಉಪಕಾರಿಯಾದ್ ಪೊರ್ಲುಡು ಬದ್ಕಡ್ ಪನ್ಪುನ ಮಲ್ಲ ಮನಸ್ಸೇ ದುಂಬುದಾನವು. ಅವೇ ಕ್ರಮೊಟು ಐತ ಮಲ್ತಿನ ಬಾಲೆಗ್ ತೊಟಿಲ್ಗ್ ಪಾಡ್ದ್ ಜೋಯಿಪಾಡ್ದ್ ತೂಗುವೆರ್. ಅತ್ತಂದೆ ಬಾಲೆದ ಪಜೆತಡಿಟ್ ಕರ್ಬದ ವಸ್ತುಲೆನ್ ದೀಪೆರ್. ದುಂಬು ಕೊರಗೆರೆಡ್ ಬಾಲೆನ್ ತೊಟ್ಟಿಲ್ಗ್ ಪಾಡ್ನಗ ಬ್ರಾಣೇರ ಮಡೆನ್ ನಾಲಾಯಿಗ್ ನಕ್ಕಾವೆರ್ಗೆ ಅವು ಕೊರಗಜ್ಜೆರ್ನ ಪುರುಸಾದಂದ್ ಎಣ್ಣೆದೆರ್ಗೆ.
33
