ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಸೀಗೆ, ಮಂಜಲ್, ಕಾಲಜೀರ್ದರಿ, ಆಡುಸೋಗೆ ನೆತ್ತ ರಸದೆತ್ತ್ದ್ ಎಣ್ಣೆ ಕಾಯೊಂದಿತ್ತೆರ್. ಉಂದು ನಂಜಿಗ್ ಮರ್ದ್ಗೆ. ಪುಡಿ-ಕಜ್ಜಿ ಮಾತಾ ಪಕ್ಕ ಗುಣ ಅವೊಂದಿತ್ತಂಡ್ಗೆ. ಕೆಲವೆರ್ ಮೇಲ್ ಬಂಜಿನ್ ತಿಕ್ಕ - ತಿಕ್ಕದೇ ಬಾಲೆದ ಮಂಡೆನ್ ತಿರ್ತ್ ಮಲ್ತೊಂದಿತ್ತೆರ್ಗೆ.
ಒಂಜಿ ಉದಾರ್ಮೆಗ್ ಉಡುಪಿ ತಾಲೂಕು ಕೆಮ್ಮಣ್ಣು ಗ್ರಾಮೊದ ಕಂಬಲದೋಟದ ಸೊನ್ಪ ವರ್ಸದ ರತ್ನಿ ಪೂಜಾರ್ತಿ ಪಂಡಿನ ವಿವರೊಲು ಇಂಚ ಉಂಡು.
ಅಜಿಪ ವರ್ಸ ಪಿರಾವುಡು ಯಾನ್ ಪೆದ್ರಾವರೆಗೆ ಸುರು ಮಲ್ಪುನಗ ಕುಲ್ಲೊಂದು ನೇಲೆ ಬಲ್ಲ್ ನ್ ಪತ್ತ್ದ್ ಪೆದುಪುನ ಕ್ರಮ ಇತ್ತಂಡ್. ಬೊಕ್ಕ ಕೆಲವೆರ್ ಉಂತುದು ಬೇನೆ ಕೊರೊಂದಿತ್ತೆರ್. ಇತ್ತೆ ಜೆತ್ತ್ದ್ ಬೇನೆ ಕೊರ್ಪೆರ್. ಒರ . . . ಒರ್ತಿಗ್ ಬಾಲೆದ ಬಲತ್ ಕಾರ್ ಊನ ಆಯಿನ ಬಾಲೆ ಜಲ್ಮಿತ್ಂಡ್. ಅದಗ . . ಆ ಪೊನ್ನನ ಕಂಡನೆನ ಸಂಬಂಧದಾಲ್ ಬಾಲೆನ್ ಕುಂಟುಡು ಒತ್ತ್ದ್ ಕಟ್ಟ್ಂಡ ಸಮ ಆಪುಂಡು ಪಂಡೊಲು. ಅಂಚನೆ ಮಲ್ತೆರ್. ಅದಗ ಬಾಲೆಗ್ ಚಿನ್ನೆ ಸುರಾಂಡ್. ಯಾನ್ ಪಾರ್ದ್ ಬಾಲೆದ ಕುಂಟ್ ಗಿರ್ತ್ದ್ ಕಾರ್ದ ಪಾದಗ್ ಮಡೆ ನೀರ್ಡ್ ಗಸ ಗಸ ಉರ್ದ್ಯೆ. ಬೊಕ್ಕ ಕಾರ್ಲಾ ಸಮ ಆಂಡ್. ಚಿನ್ನೆಲಾ ಪೋಂಡು. ಇತ್ತೆ ಪೆದಪುನ ಬೇನೆ ಏರೆಗ್ ಗೊತ್ತುಂಡು ಪನ್ಲೆಗೆ. ಕಾಸ್ ಇತ್ತ್ಂಡ ತೈದಿನಾಕುಲುಲಾ ಬದುಕುವೆರ್ಂದ್ ಪಂಡಲ್.
• ಹಟ್ಟಿ ಮುದಕೊನ್ ನೈಟ್ ಅರೆತ್ದ್ ಕೊರುಂಡ ಬೇಗ ಪೆದ್ಪೆರೆಗೆ.
•ಬಂಜಿಡ್ ಬಾಲೆ ತೈತ್ಂಡ ಬಚ್ಚಿರೆನ್ ಎನ್ಮೆದೆನ್ನೆಡ್ ಸಣ್ಣ ಕಡೆದ್ ಪರ್ಪಾಂಡ ಬಾಲೆ ಬೇಗ ಪಿದಾಯಿ ಬೂರುಂಡುಗೆ.
• ಕಳ್ಳಿದ ಪೇರ್ನ್ ನೆತ್ತಿಗ್ ಪಾಡೊಡು, ಅತ್ತಡ ಗುಲುಗುಂಜಿನ್ ಶರೀರಗ್ ದೀಂಡ ಬಾಲೆ ಬೂರುಂಡುಗೆ.
ಸುಬ್ರಮಣ್ಯದ ದಿ. ಕುಶಾಲಪ್ಪ ಗೌಡ ಮೇರ್ 07-04-1992 ತಾರೀಕ್ದಾನಿ ಪಂಡಿನ ಒಂಜಿ ಸತ್ಯ ಘಟನೆ. 1960 ಇಸವಿದ ಪೊರ್ತುಗ್ ಆರೆನ ಊರುಡು ಕೆಂಪಜ್ಜ ಪನ್ಪುನ ಒರಿ ಶಸ್ತ್ರ ಚಿಕಿತ್ಸೆ ಮಲ್ಪುನಾರ್ ಇತ್ತೆರ್ಗೆ. ಬಂಜಿಡ್ ಬಾಲೆ ತೈತ್ಂಡ ... ಆಸ್ಪತ್ರೆಗ್ ಪೋವರೆಗ್ ಶಕ್ತಿ ದಾಂತಿನಕ್ಲು ಆರೆನ್ ಇಲ್ಲಗ್ ಲೆತ್ತೊಂದು ಪೋವಂದಿತ್ತೆರ್ಗ್ ಬಲತ ಅತ್ತಡ ದತ್ತ ಕೊಬ ಬಿರೆಲ್ಗ್ ಗಡ್ಡ ದೆಪ್ಪುನ ಬ್ಲೇಡ್ನ್ ಕಟ್ಟಿದ್ . .. ಬಂಜಿನಾಲೆನ ಗರ್ಭಕೋಷದ ಉಲಾಯಿ ಕೈಪಾಡ್ದ್ ತೈತ್ತಿನ ಬಾಲೆದ ಕೈ-ಕಾರ್ನ್ ಕತ್ತೆರ್ತದ್ ಪಿದಾಯಿ ಒಯಿತ್ದ್ ಏತೋ ಪೆದ್ಮೆದಿನ ಜೀವೊನು ಒರಿಪಾದೆರ್ಗೆ.
ಬಾಲೆ ತೈದಿನ ಪೆದ್ಮೆದಿನ ಮಿರೆ ಪೇರ್ ಆಜಾವರೆಗಾದ್ರೆ ರಡ್ಡ್ ಚೆಂಡ್ ಮಲ್ಲಿಗೆ ಪೂತ ಮಾಲೆನ್ ಗಟ್ಟಿಡ್ ರಡ್ಡ್ ಮಿರೆಕ್ ಸುಂದ್ಂಡ ಪೇರ್ ಆಜಿದ್ . . ಬೇನೇ ಜ್ವರ ಪೋಪುಂಡುಗೆ.
31
