ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ದುಂಬು ಬಂಜಿದ ಬಾಲೆನ್ ಗುರ್ತ ಮಲ್ಪುನಂಚಿನ ನಂಬಲಿಗೆಲು
ಬಂಜಿನಾಲ್ ಪೆದ್ದುನ ಬಾಲೆ ಪೊನ್ನ-ಆನಂದ್ ಮಾತೆರೆಗ್ಲಾ ಸುರುಕೇ ತೆರಿವುನ ಅಂಗಲಾಪು. ದುಂಬು ಇತ್ತೆದಲೆಕ್ಕ ಸ್ಕ್ಯಾನಿಂಗ್ ಮಲ್ತ್ ಬಾಲೆ ತೆರಿವುನ ಅವಕಾಶ ಇತ್ತ್ ಜ್ಜಿ. ಆಂಡಲಾ ದುಂಬು ಕೆಲವೆರ್ ಬಂಜಿನಾಲೆನ ನಡವಲಿಕೆನ್, ಅತ್ತಡ ಬಂಜಿನ್ ತೂದೇ.. ಸ್ಪಷ್ಟವಾದ್ ವಾ ಬಾಲೆಂದ್ ಪನೊಂದಿತ್ತೆರ್ಗೆ. ಅವುಲಾ ಕಡಿರ್ ಮಡಿರ್ದ ಬಂಜಿಡ್ ದಾದ ಬಾಲೆ ಪುಟ್ಟುಂದು ಇಲ್ಲದಕ್ಲೆಡ ಚರ್ಚೆ. ಕೆಲವೆರ್ ಬಂಜಿನಾಲೆನ್ ತೋಜಾದ್ ಇಲ್ಲದ ಎಲ್ಯ ಬಾಲೆಡ ದಾದಬಾಲೆ ಪುಟ್ಟು? ಮೆಗ್ಯನ? ಮೆಗ್ದಿಯಂದ್ ಕೇನೊಂದಿತ್ತೆರ್ಗೆ. ಐಕಾದ್ರ ಪಂಥ ಪಾಡೊಂದಿತ್ತೆರ್ಗೆ. ಕೆಲವೆರ್ ದೇವರ ಕೋನೆಡ್ ಚೀಟಿ ಪಾಡ್ದ್ ಎಲ್ಯ ಬಾಲೆಡ ದೆಪ್ಪಾವೊಂದಿತ್ತೆರ್ಗೆ, ಪರಕೆ ಪನೊಂದಿತ್ತೆರ್ಗೆ.
ದುಂಬು ಪಿತೃ ಮೂಲ ಪದ್ಧತಿಡ್ ಆನ್ಬಾಲೆಗ್ ಅಂಗಲಾಪು ಬುಡುಂಡ, ಮಾತೃಮೂಲ ಪದ್ಧತಿಡ್ ಪೊನ್ನು ಬಾಲೆಗ್ ಅಂಗಲಾಪು ಬುಡೊಂದಿತ್ತೆರ್ಗೆ.
ಕೆಲವೆರ್ ಬಂಜಿದ ನಮುನೆ ತೂದು ಬಂಜಿನಾಲೆನ ಬಂಜಿ ತಿರ್ತ್ ಇತ್ತ್ಂಡ ಪೊನ್ನು ಬಾಲೆ, ಬಂಜಿನಾಲೆನ ಬಂಜಿ ಕುದ್ಪೆದಲೆಕ್ಕ ಮಿತ್ತ್ ಇತ್ತಂಡ ಆಣ್ ಬಾಲೆ. ತಡ ಪೆದ್ದ್ಂಡ ಆನ್ಬಾಲೆಗೆ. ಎಡತ ಮರ್ಗಿಲ್ಡ್ ಮಲ್ಲೆ ಇತ್ತಂಡ ಆನ್ಬಾಲೆ, ಬಲತ ಮರ್ಗಿಲ್ಡ್ ಮಲ್ಲೆ ಇತ್ತಂಡ ಪೊನ್ನು ಬಾಲೆ. ತಪ್ಪು ತಿನ್ನುನ ಬಯಕೆ ಇತ್ತಂಡ, ಬಡವು ಎಚ್ಚ ಇತ್ತಂಡ, ಮರ್ಕ ಸಂಕಟ, ಉರು ಇತ್ಜಿತಡ, ಮೈ-ಕೈ ಜಿಂಜಿದ್ ಪುಡ್ಕೆ ಪುಡ್ಕೆ ಆದಿತ್ತಂಡ್ ಏಪಲ ಉರುದಾಂತೆ ಬೇಲೆ ಮಲ್ಲೊಂದಿತ್ತಂಡ ಪೊನ್ನುಬಾಲೆ. ತೂಲೆ ಪೊನ್ನು ಪಂಡ ಸಮಾಜೊಡು ದುಂಬುಲಾ ಸಸಾರ. ಆಲ್ ತೋಡ್ಡ ನೀರ್, ಕಾಡ್ಡ ತಪ್ಪು ತಿಂದ್, ಉರುದಾಂತೆ ಇಡೀದಿನ ಬೆನ್ಪಲ್. ತಂಗ್ ನಗ್ ರಡ್ಡ್ ಉಪ್ಪುಕಲ್ಲ್ ದ ಪುಲಿಪೆನ ಇತ್ತಂಡ ಆಲೆನ ಉನಸ್ ಗಡ್ದ್. ಈ ಮಾತಾ ಕಾರನಗಾದ್ರ ಬಂಜಿದ ಪೊನ್ನು ಬಾಲೆಂದ್ ನಂಬುದಿಪ್ಪರೆಗ್ಲ ಯಾವ್. ಹೆಚ್ಚ ನಿದ್ರೆ ಮಲ್ಪುನಾಲೆಗ್, ಬಯಕೆ ಸಂಕಟ ಇತ್ತಂಡ ತಿಂದಿನೆನ್ ಕಕ್ಕೊಂದಿತ್ತಂಡ, ಉರು ಇತ್ತಂಡ, ಬಚ್ಚಿದ್ ಪೋದಿತ್ತಂಡ ಆನ್ಬಾಲೆ. ಮುಲ್ಪಲ ಲಿಂಗಭೇದ. ಪೊನ್ನುಬಾಲೆ ಆಂಡ ಬಂಜಿಡುಪ್ಪುನಗನೇ.. ಪಾಪ ಉಪ್ಪುಂಡು ಪನ್ಪುನ ನಂಬಲಿಗೆ. ಐಕ್ ವಾ ರಾಜೋಪಚಾರ ತಮ್ಮಾನ ಬೊಡ್ಚಿಂದ್ ಪನ್ಪುನ ಸಸಾರ. ಆನ್ ಬಾಲೆಗ್ ಬಂಜಿಡುಪ್ಪುನಗನೇ ಐತ ಬಿರ್ಸಾತಿಕೆ-ಗತ್ತ್ ನ್ ತೋಜಾವುಂಡ್. ಬಂಜಿಡುಪ್ಪುನಗನೆ ಐಕ್ ಮಲ್ಲ ಮನೆತ ಮಾನಾದಿಗೆ ಕೊರ್ಪುನವು ಮುಲ್ಪ ನೆಗೆತ್ದ್ ತೋಜುಂಡು.
28
