ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
4. ಬಾಲೆನ್ ತುಂಬುದಿನ ಬಂಜಿನಾಲೆನ ತಾಂಕನೆ
ಪೊನ್ನನ ಗಬ್ಬಡ್ ನನೊಂಜಿ ಜೀವ ಕೊಡ್ಡಿನಗ ಬಂಜಿನಾಲೆನ ದೇಹ ಪ್ರಕೃತಿಡ್ ಜಿಂಜ ಬದಲಾವಣೆ ಆಪುಂಡು. ಮರ್ಕಸಂಕಟ, ಕಕ್ಕುನ, ಉರ್ಚುನ, ಜಿಂಜ ನಿದಿರೆ, ತೊಡು ಬಡವು, ಉರು, ಕೈಕಾರ್ ಬಚ್ಚುನು, ಮೈ- ಕೈ ಬಾಪ್ದ್ ನೀರ್ ಬರ್ಪುನು, ಇಂಚ ಆಲೆನ ಚರ್ಯೆಡ್ ಜಿಂಜ ವ್ಯತ್ಯಾಸೊಲು ತೋಜುಂಡು.
ಕೆಲವೆರ್ ಇಂಚಿನ ಬಯಕೆ ಸಂಕಟೊಡು ಸೋತುದು ಈ ಜನ್ಮೊಗು ಬಾಲೆ ಬೊಡ್ಚಿಂದ್ ಎನ್ನುವೆರ್. ಈ ಬಂಗೊದಾನ್ನ ನಮ್ಮ ಹೆರಿಯರ್ನಕು ಬಂಜಿದ ಬಾಲೆದ ಬುಲೆಚ್ಚಿಲ್ಲಾತ್ರ ಕಷಾಯ, ಮರ್ದ್, ಶಕ್ತಿ ಕೊರುನಂಚಿನ ಹಾರ, ಅತ್ತಂದೆ ಬೇತೆ ಬೇತೆ ನಮುನೆದ ತಿನರೆನ್ ಮಲ್ತ್ ಕೊರೊಂದಿತ್ತೆರ್. ಪೊನ್ನ ಇಲ್ಲದಕು ಮಗಲೆನ್ ಕಂಡನೆ ಇಲ್ಲಡ್ ಲೆತೊಂದು ಬತ್ತ್ದ್ ಪೇರ್ಗಂಜಿ ಬಲಸೊಂದಿತ್ತೆರ್. ಅಲೆನ ಅಂಗಲಾಪುಗಾತ್ರ ಬೋಡಿತ್ತಿನೆನ್ ಈ ನೆವನಡ್ ಮಲ್ತ್ ಕೊರೊಂದಿತ್ತೆರ್.
ಏಲ್ನೆ ತಿಂಗಲ್ಗ್ ಬಯಕೆ ಕ್ರಮಗಾದ್ರ ಪೊಸಸೀರೆ ಕೊರ್ದು ಪೂತ ಜಲ್ಲಿ ಪಾಡ್ದ್ ಬಂಗಾರ್ಡ್ ಐತ ಮಲ್ತ್ದ್ ಬಂಧುಲೆನ್ ಲೆತ್ತ್ದ್ ತಿನರೆನ್ ಬಲಸುನ ಶಾಸ್ತ್ರ ಮಲ್ಪೆರ್. ಉಡುಗೊರೆ ಕೊರ್ಪೆರ್. ಆನಿ ಬಯಕೆದ ಮದಿಮಾಲೆನ ಬಾಯಿದ ಮಡೆ ದೆಪ್ಪರೆಗಾತ್ರ ಒರ್ಂಬ ಬಗೆತ ಪೊಡಿಲೆಡ್ದ್ ಮಲ್ತಿನ ಅಪ್ಪದಡ್ಡೆ, ಗಂಡದೆಡ್ಡೆ, ಚಿಲಂಬಿದೆಡ್ಡೆ, ಅರೆಪ್ಪುದೆಡ್ಡೆ, ಕುಪ್ಪೆ ರೊಟ್ಟಿ, ನೀರ್ ತೆಲ್ಲಾವು, ಮಡ್ಕೆ ತೆಲ್ಲಾವು, ಪೊರಿಯೆಡ್ಡೆ, ನೂಕಡ್ದೆ ತಿಂಡಿಲೆನ್ ಬಲಸುವೆರ್. ನುಪ್ಪುದ ನಡುಟು ಬೆಯ್ದಾದಿನ ತೆತ್ತಿ ದೀಪೆರ್, ಬೈಕಿ ಪೊಡಿ ಪಂಡ ಚಕ್ಕುಲಿದ ಹಿಟ್ಟ್ ಡ್ (ಪೊಡಿಟ್ಸ್) ತೊಟ್ಟಿಲ್, ಬಾಲೆ, ಸೂರ್ಯ, ಚಂದ್ರೆ, ಶಂಖ, ಚಕ್ರ, ಬರ್ಚನೆ, ಕೊರಲು, ಗಿಜ್ಜತ್ತಿ ಇಂಚಿನ ಮಾತಾ ನಮೂನೆನ್ ಬಂದಡ್ ಮಲ್ತ್ ದ್ ಎಣ್ಣೆಡ್ ಕಾಯ್ತಿದ್ ಮಲ್ಲ ಮರ್ಯೆ ನಿಲ್ಕೆ ಬಲಸ್ದ್, ಐತ ಮಲ್ತಿನ ಬಯಕೆದ ಬಂಜಿನಾಲೆನ ಎದುರುಡು ಮುತ್ತೈಸಿನಾಕ್ಲು ದೀದ್ ಅಲೆಗ್ ಇರೆಪಾಡ್ದ್ ಬಲಸುವೆರ್. ಮರ್ಯಡ್ ನಿದ್ರೆ ಇತ್ತಿನ ಅಡ್ಡೆಲೆನ್ ಆಲ್ ಅಪ್ಪೆ ಇಲ್ಲಗ್ ಪೋನಗ ಪತೊಂದ್ ಪೋವೆರೆಗ್ ಕೊರ್ಪೆರ್. ಏತೆ ಬಡಪತ್ತ್ ದಾಕ್ಲು ಆಂಡಲಾ ಬಂಜಿದ ಬಾಲೆದ ಬಯಕೆಗಾದ್ರ ನಾಲ್ ಇಲ್ಲ್ ನಟ್ಟಿದಾಂಡಲಾ ಬಯಕೆದ ಶಾಸ್ತ್ರ ಮಲ್ಪೊಡ್ಗೆ. ಇಜ್ಯಡ ಬಾಲೆದ ಕೆಬಿ ತೋರುಂಡ್ಂದ್ ಹೆರಿಯರ್ನಕ್ಲು ಪನ್ಪುನೆನ್ ನಮ್ಮ ಇತ್ತೆಲ ಕೇನ್ವ.
ಕೆಲವು ಬಂಜಿನಾಕ್ಲೆಗ್ ಮಣ್ಣ್, ಬೊನ್ಯ, ಕಲ್ಲ್, ಪುಲಿ, ಕಾಯಿಕುಕ್ಕು, ಕರ್ಪೂರ, ಗಂಧ ಇಂಚಿನ ವಸ್ತುಲೆನ್ ತಿನರೆಗ್ ಕೊದಿ ಆಪುಂಡು. ಸತ್ಯದಾದ ಪಂಡ ಅಲೆನ
22
