ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
. ಜೋಕ್ಲನ ಕಷ್ಟ-ಸುಖಗ್, ಬೇನೆ-ದುನಿಪುಗು, ಬೆರಿ ಪೂಜ್ಯರೆಗ್, ಕೈ ಪತ್ತ್ದ್ ತಾಂಗ್ ಕೊರಿಯರೆಗ್ ಅಪ್ಪೆ ಪನ್ಪುನ ಸಿರಿತುಪ್ಪೆ ಬೋಡೇ ಬೋಡು.
.“ದೇವೆರೆಗ್ ಮಾತೆರ್ನಲ ಕಷ್ಟ-ಸುಖನ್ ತೂವರೆಗಾವಂದಿನೈಕ್, ಅಪ್ಪೆನ್ ಸೃಷ್ಟಿಮಲ್ತೆ ಪನ್ಪುನ ಪಾತೆರ ಉಂಡು”. ಅಂಚಾದ್ ಅಪ್ಪೆದಾಂತಿನ ಬಾಲೆದ ವ್ಯತೆನ್ ಪಂಡ್ದ್ ಮುಗಿಯಂದಿನವು .
.ದುಂಬುದ ಜನಪದೆರೆನ ಕತೆಕ್ಲಡ್, ಅಪ್ಪೆ ದಾಂತಿನ ಜೋಕ್ಲೆನ ಕಷ್ಟದ ಬಂಗೊದ ಕತೆಕ್ಲ್, ಬೊಕ್ಕ ಬಾಲೆದಾಂತಿನ ಅಪ್ಪೆಡಿಕ್ಲು ಕಷ್ಟ ಬುಡ್ಪುನ ಜಿಂಜ ಕತೆಕ್ಲು ಉಂಡು.
.ತುಳು ಪಾಡ್ದನಡ್ ಕಾರ್ನಿಕಡ್, ಮಾಯೊಡು, ಪುಟ್ಟದಿನ ಜೋಕ್ಲೆನ ಕತೆ ಜಿಂಜ ಉಂಡು.
.ಬಾಲೆನ್ ತೂಂಡ ತೈಪಿನ ಯೋಗ ಬರ್ಪುನಂಚಿನ ಪ್ರಸಂಗ ಸಿರಿಪಾಡ್ದನೊಡು ಬರ್ಪುಂಡು.
.ಬಾಲೆದ ಪುಟ್ಟುರಾಸಿಡ್ ಬಾಲೆ ಪುಟ್ಟಲೆಕ್ಕನೆ ಮಾತಾ ಐಸಿರಿನ್ ಕಲೆವೊಂದಿನ ಪ್ರಸಂಗಲಾ, ಇತಿಹಾಸಡ್ ಉಂಡು, ಯುದ್ಧ ನಡೆತಿನ ಚರಿತ್ರೆಲುಂಡು. ಎಡ್ಡೆ ಆತಿನ ಉದಾಹರನೆಲಾ ಉಂಡು.
.ದುಂಬು ಸಾಲ್ ಸಾಲ್ಡ್ ಪೆದ್ದುನ ಉರ್ಬಾಟಿಕೆಡ್ ಅಪ್ಪೆ-ಮಗಲ್, ಮಾಮಿ- ಮರ್ಮಾಲ್, ಮೆಗ್ದಿ-ಪಲ್ದಿ ಇಂಚ ಒಟ್ಟೋಟ್ಟುಗ್ ಪೆದ್ದುನವು ಮಲ್ಲ ಸಂಗತಿ ಅತ್ತ್. ಅವೊಂಜಿ ಐಸಿರಿತ ಸಂಗತಿ ಆದಿತ್ಂಡ್. ಅಂಚಾದ್ ಕೆಲವು ಗುತ್ತ್ ಬರ್ಕೆದ ಇಲ್ಲಡ್ ಪೆದ್ದುನ ಕೋನೆಡ್ ಅಡಿ ತತ್ತೊಂದಿತ್ತಿಜ್ಜಿಗೆ. ಪೆದ್ಮೆತ್ತಿ ಅತ್ತಡ ಬಂಜಿನಾಲ್ ಈ ಗಿರಿಗಿಟಿದ ಚಕ್ರಡ್ ಒರ-ಒರ ನಾಲೈನ್ ತೊಟ್ಟಿಲ್ ಕಟ್ಟೊಂದಿತ್ತಿನಲಾ ಉಂಡುಗೆ. ಅಂಚಾದ್ ದುಂಬು ಪೊನ್ನುಜೋಕ್ಲಗ್ ಕಡೀರ್ ಬಂಜಿನಾಲೆಡ್ ಪೆದ್ದುನಗ ಪೋಡಿಗೆ ಆವೊಂದಿತ್ತಿಜ್ಜಿ. ದಾಯೆಪಂಡ ಅಕುಲು ಎಲ್ಲಿಡೇ ಬಾಲೆನ್ ಪತ್ತುನ.. ಮಾಣಾವುನ .. ತೂಂಕುನ, ಬಂಜಿಗ್ ಕೊರ್ಪುನ, ಮೀಪಾವುನ, ಪೀ-ಪಡ್ಕೆ ಗೋರುನ.. ಇಂಚ ಬಾಲೆದ ಬೇಲೆನ್ ನಾಚಿಕೆ-ಹೇಸಿಗೆದಾಂತೆ ಮತ್ತೊಂದಿತ್ತೆರ್. ಉಂದು ಪೊನ್ನು ಜೋಕ್ಲೆಗ್ ದೇವೆರ್ ಕೊರ್ತಿನ ಒಂಜಿ ಮಲ್ಲ ವರ., ಪ್ರಕೃತಿದ ಒಂಜಿ ಕ್ರಿಯೆಂದೂ ಎನ್ನೊಂದಿತ್ತೆರ್. ಒರ-ಒರ ಈ ನಂಬಲಿಗೆ ದೂರ ಆದ್ ಬೇತೆ ಬೇತೆ ಕಾರನಡ್ ಬಂಜಿದ ಬಾಲೆ ತೈತ್ಂಡ ಅತ್ತಡ ನೆತ್ತೆರ್ ಕಟ್ಟಂದೆನಾ, ನಂಜಿ ಏರ್ದಾ, ಸನ್ನಿ ಜರಟಾ ಅಪ್ಪೆ ತೈತ್ಂಡ ಅವು ಮಲ್ಲ ಗಾಬ್ ಆವೊಂದಿತ್ತಿಜ್ಜಿ. ಒಂಜಿ ರೀತಿಡ್ ದುಂಬು ಪೆದ್ದುನಂಚಿನವು ಪೊನ್ನ ಜನ್ಮಗ್ ಪುನರ್ಜನ್ಮನೇ ಸರಿ. ಕೆಲವೆರ್ ನಂಡ್ ಬೇನೆಡ್ ಮೂಜಿ ರಾತ್ರೆ ಮೂಜಿ ಪಗೆಲ್ ಬೇನೆ ದಿಂಗ್ದ್ ಪೆದ್ದಿನಾಕ್ಲಲ ಉಲ್ಲೆರ್. ಇತ್ತೆದಲೆಕ್ಕ ಬೇನೆ ತೆರಿಯಂದಿ ಲೆಕ್ಕ ಸಿಸರಿನ್ ಆಪ್ರೇಶನ್ ಮಲ್ತ್ದ್ ಬಾಲೆ ದೆಪ್ಪುನ ಕ್ರಮಲೆನ್ ಅಕುಲು ಕನಟ್ಲ ಎನ್ನದಿಪ್ಪಯೆರ್.
17
