ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಅಪ್ಪೆಗ್ ಬಾಲೆ ಜೀವೊದ ಬಲ್ಲ್. ಕರ್ಲ್ಡ್ ಕೊಡಿತಿನ ತೆಗಲೆ. ಆಲ್ ಪದಿಮೆತ್ತಿ ಲಕ್ಕಿ ಬೊಕ್ಕ ದುಂಬುದಲೆಕ್ಕ ಇಡೀ ದಿನ ಬಾಲೆನ್ ಮಾನಾವೆರೆ- ಗೊಬ್ಬಾವರೆ ಅಲೆಗ್ ಪೊರ್ತು ಇಜ್ಜಿ. ಇತ್ತೆ ಪೊರ್ತು ಇತ್ತ್ಂಡಲಾ ಬಾಲೆಡಪ ಪದ ಪಂದ್ ಗೊಬ್ಬಾವೆರೆಗ್ ಅಪ್ಪಡಿಕ್ಲೆಗ್ ಮೋಕೆ ಇಜ್ಜಿ. ಬಾಲೆ ಬುಲ್ತುಂಡ ಸಿ.ಡಿ.ಡ್ ಟೇಪ್ರೆಕಾರ್ಡ್ಡ್ ಇಂಗ್ಲೀಷ್ ರೆಯಾಮ್ಸ್ ಪದನ್ ಕೇನ್ಪಾವೆರ್.
ಅಪ್ಪೆ ಪೆದಿಮೆತ್ತಿ ಲಕ್ಕಿ ಬೊಕ್ಕ.. ಬಾಲುಲೆನ ಹೆಚ್ಚದ ತಮೆರಿ ಅಜ್ಜ-ಅಜ್ಜಿನಾಕ್ಲೆನ ಪುಗೆಲ್ಗ್ ಬೂರುಂಡು. ಪುರುಬಾಲೆ ಹೆಜ್ಜೆ ದೀನಗ ಅಜೆ ತತ್ತದ್ ಬೂರುನಗ, ಅಜ್ಜ ಅಜ್ಜಿನ ಮೃತ ಬೆಪ್ಪು ಬೋಡು, ಆಕುಲೆಗ್ಲ ಆತೇ ಪೊರ್ತು ಪೋವರೆಗ್ ಪುಲ್ಲಿನ ಸಿಕೆ ಬೋಡು.
ಅಪ್ಪ-ಅಮ್ಮೆಗ್ ಬೆಚ್ಚ ನೆತ್ತೆರ್, ನೂದು ಬೇಲೆಲೆಡ್ದ್ ಗಂಟೆ ಕಟ್ಲೆ ಜೋಕ್ಲೆನ್ ಮಾನಾವುನಾತ್ ಪೊರ್ತುಲಾ, ತಾಲ್ಮೆಲಾ ಉಪ್ಪಂದ್. ಹೆರಿಯಾಕ್ಲೆನ ಉರು ಮಾಜಾವೆರೆಗ್ ಪುರುಬಾಲೆನೇ ಕೈತ ದಂಟೆ. ಆಕುಲೆನ ಪಿರಾವುಡೇ ಪೋಪೆರ್, ಬಾಲುಲೆನ ಬೋಡು ಬೊಡ್ಚಿಲೆನ್ ಕೇನ್ವೆರ್. ಆನೆ ಆಪೆರ್- ಕುದ್ರೆ ಆಪೆರ್, ಉಪ್ಪು ಮೂಟೆ ಮಲ್ಪೆರ್,ಕಕ್ಕೆ- ನಾಯಿ ತೋಜಾದ್.. ನುಪ್ಪುದ ಗುಲ್ಲೆ ಕೊರ್ಪೆರ್, ಕಥೆ-ಪದ ಪನ್ಪೆರ್, ಬಾಲೆ ಮಲ್ಲೆ ಆಂಡಲಾ... ಜಕ್ಕೆಲ್ಡ್ ತುಂಬುದು ತಿರ್ಗುವೆರ್. ಬಾಲೆ ದಾದ ಪೋಕ್ರಿ ಲೂಟಿ ಮಲ್ತ್ಂಡಲಾ ಅಕುಲೆಗ್ ಪೊರ್ಲು, ಪೆಟ್ಟಿ ಪಾಡುಜ್ಜೆರ್. ನೆರ್ಪುಜೆರ್, ಸಮಾಧಾನೊಡು ಬುದ್ಧಿ ಪನ್ಪೆರ್, ಜೋಕೆ-ರಾಂಕೆಡ್ ತೂಪೆರ್.
ದಿಕ್ಕೆಲ್ಲೊಂಜಿ ಕೊಳ್ಳಿ ಬೋಡು, ಇಲ್ಲಗೊಂಜಿ ಅಜ್ಜಿ ಬೋಡುಂದು ಗಾದೆ ಪಾತೆರ ಉಂಡಾಯಿನ ಈ ಸತ್ಯಗಾದ್ರ ಆದಿಪ್ಪು. ದಿಕ್ಕೆಲ್ ಗಮೆಲುನ ಕೊಳ್ಳಿ ಇತ್ತಂಡ.. ಕುಡ- ಕುಡ ತೂ-ಮಲ್ಪರೆಗ್ ಭಂಗ್ನ ಉಪ್ಪುಜ್ಜಿ, ಅಂಚನೇ ಇಲ್ಲಡ್ ಅನುಭವೊದ ತುಪ್ಪೆ ಪನ್ಪುನ ಅಜ್ಜಿ ಇತ್ತಂಡ ಇಲ್ಲದಾಗ್ ವಾ ಭಂಜಲಾ ತೋಜಂದ್. ಇತ್ತೆದ ಅಪ್ಪೆಡಿಕ್ಲಗ್ ಬಾಲೆನ್ ಮೋಕೆಡ್ ಜೋಕೆಡ್ ಮಾನಾವುನ, ಗೊಬ್ಬಾವುನ ಪದ ಗೊತ್ತಿಜ್ಜಿಡಲ ಮಲ್ಲೆ ಇಜ್ಜಿ. ಆಂಡ ತನ್ನ ನೆತ್ತೆರ್ದ ಕುರ್ಲೆನ್ ಕೊಡಿ ಬಾಲೆನ್ ತಾಂಕರೆಗ್, ಮಾನಾವರೆಗ್ ಜನ ದೀಪುನವು ಮಾತ್ರ ಮಲ್ಲ ತಪ್ಪು, ಉಂದೆಕ್ ಆ ದೇವೆರ್ಲ ಮಾಪು ಕೊರಯೆರ್.
ಅಂಚಾದ್ ಪುರುಬಾಲೆಲು ಹೆಚ್ಚಾದ್ ಅಜ್ಜಿನ ಪಿರ-ದುಂಬುಡ್ ನೇಲೊಂದಿಪ್ಪೆರ್. ಬಾಲುಲೆಗ್ ಅಜ್ಜ-ಅಜ್ಜಿ ಬಾಕಿಲ್ ದೆತ್ತ್ ದೀತಿನ ವಿಶ್ವಕೋಶ. ಅಕುಲೆಗ್ ಪಂಡಿನಾತ್, ಮುಗಿಯಂದಿನ ವಿಷಯಲು, ಕೇಂದಿನನೇ ಕೇನರೆಗ್ಲ.. ಬಾಲುಲೆಗ್ ಬೊಡಿ ಇಜ್ಜಿ. ಬಾಲುಲೆಗ್ ಐತ ಪಾತೆರನ್.. ಕೇನರೆಗ್ ಜನ ಬೋಡು, ಜೋಕ್ಲು ಬಾಲುಲೆನ ವಾ ಚಾಕರಿ ಮಲ್ಪರೆಲ್ಲ... ಅಜ್ಜ-ಅಜ್ಜಿಗೆ ಉರು ಇಜ್ಜಿ. ವಂಸೊದ ತೆಗಲೆಗಾದ್ರ ಅಕುಲು ದೈವ-ದೇವೆರೆಗ್ ಪಂಡಿನ ಪಟ್ಟ-ಪರಕೆಲು ಉದ್ದಡ್ ಉಪ್ಪುನೈಕ್ಲಾ ಉಂದುವೆ ಕಾರನ ಆದಿಪ್ಪು.
150
