ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
3. ಅಪ್ಪ ಬಾಲೆದ ಸಿರಿ ತುಪ್ಪೆ
ಅಪ್ಪೆ ಪನ್ಪುನ ಗದ್ದುಗೆಗ್ ಮುರ್ಗ ಆವಡ್ ಪಕ್ಕಿಲಾವಡ್ ಬೇತೆ ಅತ್ತ್. ಅಪ್ಪೆನ ಮೋಕೆ ಜೋಕೆದ ಪೆರ್ಮೆದ ಮಲ್ಲಸ್ತಿಕೆ ಅಂಚಿನವು. ಲೋಕಡ್ ಬುದ್ದಿದಾಂತಿನ ಮುರ್ಗ- ಪಕ್ಕಿಲು ತನ್ನ ಕಿನ್ನಿ ತನ್ನ ತೆತ್ತಿಲೆಗ್ ಸಿಕೆ ಕೊರ್ದು ಮಲ್ಲೆ ಮಲ್ಪೆರೆಗ್ ಪೊರ್ತು- ಪೊರ್ತುಗು ಬಂಜಿಗ್ ಕೊರ್ದು ಐತ ಕಾರ್ಡ್ ಉಂತುನಮುಟ್ಟ ಜೋಕೆ-ರಾಂಕೆಡ್ ತಮೆರಿ ಕೊರ್ಪುನವು ನಮ ತೆರಿದಿನ ಸತ್ಯ. ಪೊನ್ನ ಜನ್ಮ ಸಾರ್ಥಕ ಆವೊಡಾಂಡ ಆಲ್ ಅಪ್ಪೆ ಆವೊಡು. ಸಂತಾನನ್ ಬುಲೆಪಾವೊಡು. ಅತ್ತಂದೆ ಪೊನ್ನನ್ ಎಲ್ಲಿಬಾಲೆದಿಂಚ್ ಪರಬು ಆನಮುಟ್ಟಲಾ ಅಲೆಗ್ ಅಪ್ಪೆಂದ್ ಮದಿಪು ಕೊರ್ದು ಲೆಪ್ಪುನವು, ನಮ್ಮ ದೇಶದ ಸಂಸ್ಕೃತಿ. ಅವ್ಲಾ ತುಳುನಾಡ್ಡ್ ಮಾತೃಮೂಲ ಪ್ರಧಾನ ಆತಿನೈಡ್ ಅಪ್ಪೆಗ್ ಮಲ್ಲ ಸ್ಥಾನ-ಮಾನೊದ ಮನೆ ಉಂಡು. ಅಕುಲೆಗ್ ಇಲ್ಲದ ಆಸ್ತಿ-ಬದ್ಕ್ ಭಾಗ್ಯೊಡು ಅಧಿಕಾರ ಉಂಡು.
ದುಂಬು ಪೊನ್ನು ಬಾಲೆ ಪಂಡ ಸಸಾರದಾಂತೆ ಹೆಟ್ಟನ- ಕುಚ್ಚನ ಇಜ್ಯಾಂದ ವಂಸನ್ ಬೆಲಗುನ ಕನ್ನಂದ್ ನೆನಪುನ ಮನಸ್ಸ್, ತುಳು ಜನಪದರೆಡ್ ಇತ್ತ್ಂಡ್. ಅತ್ತಂದೆ ದುಂಬು ಹೆಚ್ಚ ಬಾಲೆಲೆನ್ ಪೆದ್ದಿನಪ್ಪೆಗ್ ಮಲ್ಲ ಮದಿಪಿತ್ತಂಡು. ಇಲ್ಲ್ ನಿಲ್ಕೆ ಜೋಕ್ಲು ಬಾಲೆಲು ಜಿಂಜಿದುಪ್ಪಡ್ಂದ್ ಬಾಯಿ ನಿಲಿಕೆ ಹೆರಿಯೆರ್ ಆಸೀರ್ವಾದ ಮಲ್ಪುನಂಚಿನ ಆ ಕಾಲಡ್.. ಅಪ್ಪೆಗ್ ಬಾಲೆಲೇ ಸಿರಿತುಪ್ಪೆ. ಬಾಲೆಗ್ ಆಲೇ ಸುರುತ ಗುರು. ಇಲ್ಲ್ ಬಾಲೆದ ಸುರುತ ಶಾಲೆ. ಬಾಲೆಗ್ ಸಿಸ್ತ್, ಬಾಸೆ, ಮೋಕೆ- ಪರಿಸರದ ಬೊಕ್ಕ ಕುಟುಂಬದಾಕ್ಲೆನ ಗುರ್ತ- ಅರ್ಥ ಮಲ್ಪೊಡಾಯಿನವು ಅಪ್ಪೆನ ಕರ್ತವ್ಯ. ಬಾಲೆ ಅಪ್ಪೆನ್ ಸುರೂಟ್ ಗುರ್ತ ಪತ್ತುಂಡು. ಅಪ್ಪೆನ ಮೈತ ಬೆಪ್ಪು, ಕಣ್ಣ್, ಕೈ-ಬಾಯಿ, ಸೊರದ ಗುರ್ತನ್ ಬೇಗ ಅರ್ಥ ಮಲ್ಪುಂಡು. ಅಂಚಾದೆ ಬಾಲೆಗ್ ಒಂಜಿ ತಿಂಗೊಲಾನಗನೇ ಅಪ್ಪೆನ್ ತೂದ್ ಬೊಚ್ಚು ಬಾಯಿಡ್ ತೆಲಿಪುಂಡು. ಅಪ್ಪೆ ಕಣ್ಮದೆ ಆನಗ ಬುಲಿಪುಂಡು ಅಂಚಾದ್ ಆಲೆಗ್ ಬಾಲೆಡ್ದ್ ಮಲ್ಲ ಸಂಪತ್ ಇಜ್ಜಿ. “ಲೋಕಡ್ ಹಾಲ್ ಜೋಕ್ಲು ಉಪ್ಪೆರ್ ಆಂಡ ಹಾಲ್ ಅಪ್ಪೆ ಉಪ್ಪಯಲ್” ಈ ಗಾದೆದ ಲೆಕ್ಕ, ಅಪ್ಪೆ ಜೋಕ್ಲನ ಎಡ್ಡೆ ಭವಿಷ್ಯಗಾದ್ರ ತನ್ನೊ ಸರ್ವ ಸುಖೊನು ತ್ಯಾಗ ಮಲ್ಪಲ್. ಆಂಡ ಮಾತಾ ಪೊನ್ನ್ ಜೋಕ್ಲಗ್ ಅಪ್ಪೆ ಆಪುನ ಭಾಗ್ಯ ಉಪ್ಪುಜ್ಜಿ. ಅಕ್ಲೆನ್ ಸಮಾಜ, ಕುಟ್ಮವರ್ಗ ಗೊಡ್ಡುಂದು ಕುಚ್ಚನಡ್ ಲೆತ್ತೊಂದಿತ್ತೆರ್.
ದುಂಬು ಆಲೆನ ಬದ್ಕ್ ಊರ್ಯಾಕ್ಲೆನ ಚಾಕ್ರಿ ಮಲ್ಪೆರೆಗಾದ್ರ ಆದ್ ಬಿಲೆದಾಂತಿನ ಆಲೆನ ಬದ್ಕ್.. ಪಾದೆಕಲ್ಲ್ ಗ್ ನೀರ್ ಮೈತಿಲೆಕ್ಕ ದಂಡ. ಈ ಮಾತಾ ಕಾರಣಗಾದ್ರ ಪೊನ್ನು.. ಮದ್ಮೆ ಆದ್ ಬುಡೆದಿನ ಸ್ಥಾನಡ್ ಎಚ್ಚ ಬಾಲೆದ ಅಪ್ಪೆಯಾದ್ ಸಮಾಜಡ್ ಮದಿಪು ಪಡೆವೆರೆಗ್ ಅಂಗಲಾಪು ಬುಡ್ಪಲ್.
14
