ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಮಾತೃ ಪ್ರಧಾನ ಪದ್ಧತಿ
ತುಳುನಾಡ್ ದ ತುಳುವೆರ್ನ ಮೂಲಬುಡಕಟ್ಟ್ ಜನಾಂಗಡ್ ಮಾತೃ ಪ್ರಧಾನ ಸಂಸ್ಕೃತಿ ಉಂಡು. ಮುಕುಲು ತುಳುನಾಡ್ದ ಉದ್ದಗೆಲಗ್ ಅಲ್ಪಲ್ಪ ಉಲ್ಲೆರ್. ಅಕುಲೆನ ವ್ಯಾಪ್ತಿನ್ ತೆನ್ಕಾಯಿ - ನೀಲೇಶ್ವರಡ್ದ್, ಬಡಕ್ಕಾಯಿ ಬಾರ್ಕೂರ್ ಮುಟ್ಟ, ಪಡ್ಡಾಯಿ ಕಡಲ್, ಮೂಡಾಯಿ ಘಟ್ಟದ ಮುಟ್ಟಂದ್ ಪನ್ಪೆರ್. ಮುಕುಲೆಗ್ ಅಳಿಯಕಟ್ಟ್ ಅಪ್ಪೆನ ಬರಿಟ್ ಜೋಕ್ಲನ್ ಗುರ್ತ ಮಲ್ಪೆರ್.
ದುಂಬು ತುಳು ನಾಡ್ದ ಮೂಲ ಬುಡುಕಟ್ಟು ಜನಾಂಗದ ಕುಲಕಸುಬುದ ನೆಲೆಟ್ ಬೇತೆ ಬೇತೆ ಉಪಜಾತಿ ಉಂಡಾದ್ ಐಟ್ ಶೆಟ್ಟಿ, ಬಿಲ್ಲವೆ, ಮೂಲ್ಯ, ಮರಕಲೆ, ಆಚಾರಿ, ಮುಖಾರಿ, ಮುಗೇರೆ, ಮಡ್ಯಳೆ, ಗಾಣಿಗೆ, ಶೆಟ್ಟಿಗಾರೆ, ಭಂಡಾರಿ, ದಿಕ್ಕೆ, ಕೊರಗೆರ್ಂದ್ ಇಂಚ ಕೆಲವು ಮುಖ್ಯ ಜಾತಿಲೆಂದ್ ಗುರ್ತ ಮಲ್ತೆರ್.
ಬೊಕ್ಕ ತುಳ್ ನಾಡ್ಗ್ ಪಿದಾಯಿ ರಾಜ್ಯಡ್ ಬತ್ತಿನ ಜೈನ ವರ್ಗದಾಕ್ಲೆಡ ಕೆಲವೆರ್ ಮುಲ್ತ ಮಾತೃ ಪ್ರಧಾನ ಪದ್ಧತಿನ್ ಸ್ವೀಕಾರ ಮಲ್ತ್ದೆರ್. ನನ ಕೆಲವೆರ್ ಪಿತೃ ಪ್ರಧಾನ ಪದ್ಧತಿನ್ ಸ್ವೀಕಾರ ಮಲ್ತ್ದೆರ್. ಅಂಚನೆ ಇಡೆಗ್ ಪಿದಾಯಿ ರಾಜ್ಯದ ಬತ್ತಿನ ಶಿವಳ್ಳಿ ಕೋಟ, ಹವ್ಯಕ, ಸ್ಥಾನಿಕ, ಚಿತ್ಪಾವನ, ಸಾರಸ್ವತ, ಗೌಡ ಸಾರಸ್ವತ, ಕನ್ನಡ, ಕಾನ್ಹಾಡ, ಆಚಾರಿ, ಇಂಚಿನ ಬ್ರಾಹ್ಮಣೆರೆಗ್ ಪಿತೃಮೂಲೀಯ ಪದ್ಧತಿದ ಕಟ್ಟೆ-ಕಟ್ಟಲೆದ ಆಚರನೆ ಮಲ್ಪೆರ್.
ಅಂಚಾದ್ ತುಳುಜನಪದೆರೆನ ಸಂಸ್ಕೃತಿಡ್ ಬ್ರಾಣೇ ಬೊಕ್ಕ ಬ್ರಾಣೇತರ ಆಚರನೆಡ್ ಜಿಂಜ ವ್ಯತ್ಯಾಸಲು ನೆಗೆತ್ದ್ ತೋಜುಂಡು. ಬ್ರಾಹ್ಮನೇತರ ವರ್ಗದಾನ ಆಚರನೆಲು ಮಾತೃ ಪ್ರಧಾನ ವ್ಯವಸ್ಥೆಡ್ ತೋಜಿದ್ ಬರ್ಪುಂಡು. ಮುಕುಲೆಗ್ ಪೊನ್ನ ಕುಟ್ಮದ ವ್ಯವಸ್ಥೆ ಇತ್ತಿನೈಡ್ದ್ ಪೊನ್ನು ಜೋಕ್ಲಲೆಗ್ ಎಡ್ಡೆ ಮಾನಾದಿಗೆ ಕೊರ್ಪೆರ್.
ಪಿದಾಯಿ ರಾಜ್ಯೋಡ್ದ್ ಬತ್ತಿನ ಶಿಷ್ಟ ವರ್ಗದಾಕು ತುಳುನಾಡ್ಡ್ ನಿಲೆಯಾದಿತ್ತಿನ ಪರಿಶಿಷ್ಟರಾಯಿನ ದಿಕ್ಕ-ಕೊರಗೆರೆನ್ ತೊರ್ತ್ದ್ ಆಕುಲೆನ್ ಪಿದಾಯಿ ಪಾಡ್ದ್ ಅಸ್ಪರ್ಶರಾದ್ ತೂಯಿನೈಡ್ಡಾವರ ಮುಕುಲೆನ ಸಂಸ್ಕೃತಿಡ್ ಎಲ್ಯಲ್ಯ ವ್ಯತ್ಯಾಸ ತೋಜಿದ್ ಬರ್ಪುಂಡು. ದಾಯೆಪಂಡ ಆಕುಲು ಊರುದ ಪಿದಾಯಿಡ್ ಅಸ್ಪರ್ಶೆರಾದ್ ಬದುಕೊಂದಿತ್ತೆರ್. ಎನ್ನ ಅಧ್ಯಯನದ ಮುಖ್ಯ ವಿಷಯ “ಪುರುಬಾಲೆ” ಆಯಿನೈಡ್ದಾವರ ಮೂಜಿ ವರ್ಷ ಮುಟ್ಟದ ಬಾಲೆದ ತಾಂಕನೆಡ್ ತುಳುಜನಪದರೆನ ಸಂಸ್ಕೃತಿದ ವಿವರಲೆನ್ ಎಲ್ಯ ಮಟ್ಟಿಡ್ ಕೊರೆಗ್ ಪ್ರಯತ್ನ ಮಲ್ತದೆ. ಕೆಲವು ಆಚರನೆಲೆಡ್ ಜಿಂಜ ವ್ಯತ್ಯಾಸ ಉಪ್ಪುನೈಟ್ ಬ್ರಾಣೇ ಬೊಕ್ಕ ಬ್ರಾಣೇತರಂದ್ ವಿವರನೆ ಕೊರ್ತೆ. ತುಳುನಾಡ್ಡ ಪ್ರಾದೇಶಿಕ ವಾತಾವರನದ ಹಿನ್ನೆಲೆಡ್ ಬಾಲೆಲೆನ್ ತಾಂಕುನೈಟ್ ತುಳುನಾಡ್ದ ಗಡಿಪ್ರದೇಶದ ತುಳುವೆರ್ಡ ಬಾಲುಲೆನ್ ತಾಂಕುನ ಸಂಸ್ಕೃತಿಡ್ ಎಲ್ಯ ಎಲ್ಯ ಬೆರಕೆ ವ್ಯತ್ಯಾಸ ತೋಜಿದ್ ಬರ್ಪುನೈಕ್ ರಡ್ ಸೀಮೆದ ಸಂಬಂಧ ಪನ್ಪುನವು ಮುಖ್ಯ ಕಾರಣ ಆದಿಪ್ಪುಂದು ಅರ್ಥ ಮಲ್ತೊನೊಲಿ.
13
