ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಮಡೆ ದೆಪ್ಪುನ ಕ್ರಮ, ತಮ್ಮಾನದ ಗೌಜೀ, ಪೆದುಪುನ ಬೇನೆ, ಪದೆತಿ, ತೊಟ್ಲಬಾಲೆದ ತಾಂಕನದ ವಿವರನ್ - ಈ ಅಧ್ಯಯನಗ್ ಮೂಲವಾದ್ ತೆಲುಪುಡ್ ಕೊರೊಡಾಪುಂಡು.
ಬಾಲೆನ್ ಪೆದ್ದಿ ಬೊಕ್ಕದ ಕ್ರಮಕ್ಲು, ಬಾಲೆದ ಪಿಲೆ ದೆಪ್ಪುನು, ಮೀಪಾವುನ, ತೊಟ್ಟಿಲೆಗೆ ಪಾಡ್ದ್ ಪುದರ್ ದೀಪುನ, ಮರ್ದ್, ಹಾರ, ನಂಬಲಿಕೆ, ಮಾಂತ್ರಿಕ ನಡಾವಲಿಲು, ಗಾದೆ, ಎದುರುಕತೆ, ಗೊಬ್ಬುಲು, ಪಟ್ಟ ಪರಕೆ, ಬಾಲೆನ್ ಮಂಗಟಾವುನ, ಸಾಹಿತ್ಯ ಜೋಯಿಪದಕುಲು, ಗಾದೆದ ತಿರ್ಲ್, ಪಾಡ್ಡನಡ್ ಬರ್ಪುನಂಚಿನ ಬಾಲುಲೆನ ವಿವರನೆಲೆನ್ ಎಲ್ಯ ಮಟ್ಡ್ ಕೊರ್ರೆಗ್ ಯಾನ್ ಮುಲ್ಪ ಪ್ರಯತ್ನ ಮಲ್ತದೆ. ತರೆಡ್ದ್ -ತರೆಕ್ಕ್ ಪರತ್ತೊಂದ್ ಬತ್ತಿನ ಕಟ್ಟ್ ಕಟ್ಟ್ಲೆನ್ ಕೂಡುಕಟ್ಟ್ ಡ್ ಆಕುಲು ಮುಲ್ಪುನಂಚಿನ ಕರ್ಮಡ್ ಇತ್ತೆ ಐತ ನಿರೆಲ್ ಮಾತ್ರ ರೆಂಕುಂಡು. ಜಾಗತೀಕರಣದ ಮೈಮೆಡ್ ದುಂಬುದಾಕ್ಲೆನ ಸಂಸ್ಕೃತಿ ಮುಲ್ಲೆ ಸೇರ್ದ್ ಇತ್ತೆ ಐತ ಅರ್ಥನ್ ಅನರ್ಥ ಮಲ್ತೊಂದು ತ್ರಿಶಂಕು ಸ್ವರ್ಗಡ್ ನಮ್ಮ ನೇಲೊಂದಿಪ್ಪುನ ಮಾತ್ರ ಸತ್ಯ. ಕೆಲಸರ್ತಿ ದುಂಬುದಾಕ್ಲೆನ ಕೆಲವು ಆಚರನೆಲು ಮೂಢನಂಬಿಕೆಂದ್ ತೋಜುಂಡಲಾ, ಆ ಕಾಲಗ್ ಅವು ಸತ್ಯ. ವಾ ಪಿರಿಕಟ್ಟಲೆಗಾ ನಂಬಲಿಕೆನೇ ಮಲ್ಲ ಮರ್ದ್ಂದ್ ಇತ್ತೆದ ವಿಜ್ಞಾನಿಲು ಪನ್ಪಿಲೆಕ್ಕ .. ಐಟ್ ಅಕುಲೆನ ಬದ್ಕ್ದ ತಿರ್ಲ್ ದೆಂಗ್ಂಡ್. ಅಂಚಾದ್ ಇನಿತ ವಿಜ್ಞಾನದ ಉದಿಪನೆಗ್ ತುಳುಜನಪದೆರೆನ ಏತೋ ವರುಷದ ಅನುಭವ ತಿರ್ಲ್ಂಡ್ಂದು ಪನ್ಪುನ ಪಾತೆರ ನೂದೆಕ್ ನೂದ್ಲಾ ಸತ್ಯ.
ಉಡುಪಿ ಬೊಕ್ಕ ದಕ್ಷಿಣ ಕನ್ನಡ ಈ ರಡ್ಡ್ ಜಿಲ್ಲೆಲು ಭೌಗೋಳಿಕವಾದ್ ಒಂಜಿ ಪ್ರಾದೇಶಿಕ ಘಟಕ. ಮುಲ್ಪ ರಾಜ್ಯಾಡಳಿತಡ್ ಕನ್ನಡ ಭಾಸೆಯಾದ್ ಅಚರನೆಡ್ ಇತ್ತ್ಂಡಲಾ ಜನಮಾನಿನ ಸಂಪರ್ಕ ಭಾಷೆಯಾದ್ ತುಳುಭಾಸೆಗ್ ಮುಖ್ಯ ಸ್ಥಾನ ಉಂಡು. ಅಂಚಾದ್ ತುಳವೆರ್ನ ಪುರು ಬಾಲೆದ ಸಾಹಿತ್ಯಡ್ ತೆಲ್ಪಡ್ ಕನ್ನಡ ಭಾಸೆದ ಬೆರಕೆ ಉಂಡುಂದ್ ಪನೊಲಿ.
12
