ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಸಾಂತಾನಿ, ಪೆಲತರಿ, ತಿಂದರಾ ಬಾಲೆ, ಟಸ್ಸ್-ಪುಸ್ಸ್ ಪೂ-ತೆರಾ ಬಾಲೆ,
ಅರ್ಕಂಜಿ ಕೊಟ್ಯಡ್ ಬೂರ್ಯರಾ ಬಾಲೆ, ಮೆಲ್ಲಡ್ ಉರ್ಚೊಂದು ಪೋಯರಾ ಬಾಲೆ
ಇಂಚ ಪನೊಂದು ಮಾನಾವೆರ್.
ಪುರುಬಾಲೆದ ಕಾರ್ನ್ ಮುಂಡಗ್ ಮುಟ್ಟಾನಗ ನನ ಒಂಜಿ ಪದ ಪನ್ಪೆರ್.
ಅಟ್ಟೆ ಕಾರ್ದ ಪುಟ್ಟಣ್ಣಗ್ - ಚಟ್ಟೆ ಮೂಂಕುದ ಗುಂಡಣ್ಣಗ್... ಜೋವು ಸಿಕ್ಕುರಿಕೆರೆ ನಮ್ಮ ಬಾಲೆ ಪೊರ್ಲ್ ಗಂಟಾವೊಡುಂದು ರಡ್ಡ್ ಕಾರ್ದ ಗಂಟೆನ್ ಪತ್ತ್ ದ್ ಗಸ ಗಸ ತಿಕ್ಕುವೆರ್.
ಬಾಲೆದ ಕಾರ್ನ್ ಮುಂಡಗ್ ಮುಟ್ಟಾನಗ ಗ್ರಾಮ ದೇವೆರ್ನ, ಕುಲದೇವೆರ್ನ ಪುದಾರ್ ಪಂದ್... ಉದಾರ್ಮೆಗ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರಗ್ ಗೋವಿಂದಾನಿ ಗೋವಿಂದಾ. ಗೋ... ವಿಂದಂದ್ ರಾಗ ಒಯ್ಪುನಗ ಕೆಲ ಬಾಲೆಲು ಇಂಚಿಡ್ ಪುರ್ಕಂದ್ ಉರ್ಚುವ. ಅಪಗ ಅಪ್ಪೆ ದೇವೆರ್ ಪುರ್ಸಾದ ಕೊರಿಯೆಂದ್ ಪನ್ಪೆರ್.
ಮೀಪಾವುನ ಪೊರ್ತುಗು... ಮೈಕ್ ಒರಾನೆ ಬೆಚ್ಚನೀರ್, ಬೂರ್ನಾಗ... ನನೊರ ಮಲ್ಲ ದೊಂಡೆದ್ ಬಾಲೆ ಕಲ್ಕರೆಗ್ ಸುರು ಮಲ್ಪ. ಅಪಗ... ರಪ-ರಪ ಮಂಡೆಗ್ ಬೆರಿಕ್ ನೀರ್ ಮೈಪುನಗ, ಬೆರ್ಮಗ್ ನೀರ್, ಈಸರಗ್ ನೀರ್, ನಾರ್ಣೆರೆಗ್ ನೀರ್, ತರೆಕ್ ನೀರ್, ಬೆರಿಕ್ ನೀರ್ಂದ್, ಅಕುಲು ನಂಬಿಂಚಿತ್ತಿನ ದೇವೆರ್ನ ಪುದಾರ್ ಪನೊಂದ್ ನೀರ್ ಮೈಪುವೆರ್, ಬಾಲೆದ ಮಂಡೆಗ್ ದೂಸಿಲ ದೂಸಿಲ ನೀರ್ ಪಾಡ್ನಗ ತಾರೆಗ್ ನೀರ್, ಬಾರೆಗ್ ನೀರ್, ದೋಟರ್ ನೀರ್, ಖಂಡಗ್ ನೀರ್, ಬೆಂಡೆಗ್ ನೀರ್, ಲತ್ತಂಡಗ್ ನೀರ್, ಆನೀರ್, ಈ ನೀರ್, ಮಾತೆಲ್ಲಾ ನೀರೋ ನೀರ್.
ಈ ಒಂಜಿ ಅರ್ತಿ ಕುಸಾಲ್ದ... ಪದಟ್,
ಪೊತ್ತ ಪೊತ್ತ ನೀರ್ಡ್... ಬಾಲೆದ ಪೊತ್ತೆಲ್ ಪೊತ್ತದ್ ಪೋಂಡೆ !
ಕೊದ್ಪ ಕೊದ್ಪ ನೀರ್ಡ್... ಬಾಲೆದ ಕೂಜಲ್ ತಾರುಂಡೆ!
ಬೆಚ್ಚ ಬೆಚ್ಚ ನೀರ್ಡ್... ಬಾಲೆದ ಬೆರಿತ ಚೂಲಿ ಜಾರುಂಡೆಂದ್... ಬುಲಿಪಡ ಬಾಲೆ ಬುಲಿಪಡ ನಿನನ್ ಮೀಪಾಯಿನ ತೂಟೆಗ್ ದಂಟೆಡ್ ಹಾಕ್ಗ.
147
