ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಏರಾಂಡಲ ಪತ್ತೊಂದು ಕುಲ್ಲವೆರ್. ಅಪಗ ಆನೆ ಆತಿನಾರ್... ಮೆಲ್ಲಡ್ ದುಂಬುದುಂಬು ಪೋವೊಂದ್.. ಅಂಚಿ ಇಂಚಿ ಮಂಡೆ ಆಡಾವೊಂದು, ಬಲತ ಕೈನ್ ಸೊಂಡಿಲ್ ಮಲ್ತ್ ದ್... ಪದ ಪನೊಂದು ಪೋನಗ ಬಾಲೆಗ್ ಕುಶಿಯೋ ಕುಶಿ.
ಪುರುಬಾಲೆದ ತೆಲಿಕೆ ನಲಿಕೆ, ತೊದ್ದೆ ಪಾತೆರದ ಕಲ್ಪ ಕೋಮಾಟಿಕೆನ್ ತೂನಗ
ಲೋಕೋದ ವಾ ಪಿಸುಂಟಗ್ಲ ಒರ ಮನಸ್ಸೇ ಶಾಂತ ಆಪುಂಡು. ಸಾರ ಬೇನೆ
ಮನಸ್ಸಡಿತ್ತ್ಂಡಲಾ ಬಾಲೆದ ಮೋನೆ ತೂನಗ ಪಾರ್ದ್ ಪೋವು. ಐಕಾದ್ರನೇ ಬಾಲೆ
ಇತ್ತಿನ ಇಲ್ಲಗ್ ಬೊಲ್ಪು, ಬೀಸಾನಿಗೆ ಬೊಡ್ಚಿಗೆ.ಬಾಲೆದಾಂತಿನ ಇಲ್ಲಡ್ ಒಕ್ಕೆಲಿಜ್ಜಿಂದ್
ಪನ್ಪುನವು ಸತ್ಯ ನೂದೈಕ್ ನೂದ್ಲಾ ಸತ್ಯ. ವೈರಾಗ್ಯಡ್ ಸಂಸಾರನ್ ಬುಡ್ದು ಪೋತಿನ
ಸನ್ಯಾಸಿಲಾ... ಪುರುಬಾಲೆದ ಗೊಬ್ಬಾಟಿಕೆನ್ ತೂದ್... ಪಿರ ಬತ್ತದ್ ಮದಿಮೆ ಆತೆಗೆ.
ಬಾಲೆದ ಕಾರ್ನಿಕ ಚಮತ್ಕಾರ ಅಂಚಿತ್ತಿನವು.
ದುಂಬುದ ಪುರಾನಕತೆಕ್ಲಾವಡ್ ಜನಪದರೆನ ಕತೆಕ್ಲಾವಡ್... ಐಟ್.. .ಜೋಕ್ಲುದಾಂತೆ ದು:ಖ ದಿಂಗುನ, ತಪಸ್ಸ್ ಮಲ್ಪುನ, ದೇವೆರ್ ವರ ಕೊರ್ಪುನಂಚಿನ, ಬಾಲೆಲ್ದಾಂತಿನ ಇಲ್ಲಡ್ದ್ ಭಿಕ್ಷೆ ಗೆತೊನಂದಿನ ಪ್ರಸಂಗೊಲು ಜಿಂಜ ಉಂಡು. ರಾಮಾವತಾರಡ್ - ಕೃಷ್ಣಾವತಾರಡ್ ಆಕ್ಲೆನ ಬಾಲೆದಪಗದ ಲೀಲೆಲುಂಡು, ಐಯಾಡ್ದ್ಲ. ಕೃಷ್ಣಾವತಾರಡ್.. ಕೃಷ್ಣದೇವೆರೆನ ಬಾಲೆದ ಲೀಲೆಲು ಮೈ ಮರ್ಲುನಂಚಿತ್ತಿನವು. ದಾಸಸಾಹಿತ್ಯಡು ಕೃಷ್ಣ ದೇವೆರ್ನ ಬಾಲೆದ ಲೀಲೆಲೆನ್ ಪಂಡ್ ಪುಡಾಡ್ಡಿನ ಪದಕುಲು ಸಾರಗಟ್ಲೆಡುಂಡು.
ಬಾಲೆಗ್ ಎಣ್ಣೆ ಪೂಜಿನಗ ಅತ್ತಡ ತೊಟ್ಟಿಲ್ಡ್ ತೂಂಕುನಗ.. ಅಪ್ಪೆ ಪುರುಸೊತ್ತು ಮಲ್ತೊನೊಡು. ಐಕಾದ್ರ ಜಿಂಜ ಪೊರ್ತುಲ ಪೋಪುಂಡು, ಆ ಪೊರ್ತುಡು.. ಮೋಕೆದ ಲೋಕಡಿಪ್ಪುನ ಅಪ್ಪೆ-ಬಾಲೆದನೇ ಕಾರ್ಬಾರ್.. ಅಪಗದ ಗೊಬ್ಬಾಟಿಕೆನ್... ಪಾತೆರಕತೆನ್ ಏರ್ಲಾ ಮಸ್ಕರಿ ಮಲ್ಪರೆಗಿಜ್ಜಿ. ತನ್ನ ಉರುನ್ ದೂರ ಮಲ್ತಿನ ಅಪ್ಪೆ- ಬಾಲೆದೊಟ್ಟುಗ್ ಬಾಲೆ ಆಪಲ್. ಪೇರ್ ಕೊರ್ದು ಬಂಜಿ ಜಿಂಜಾಯಿ ಬೊಕ್ಕ ಬಾಲೆದ ಬೆರಿನ್ ಪೂಜಿದ್ ಆಡಿಗೆ ಬರ್ಪಾವೊಡು. ಇಜ್ಯಾಂಡ ಬಾಲೆ ಒರಾನೇ ಬಸ ಬಸ ಕಕ್ಕುವ ಅತ್ತಡ ಎಕ್ತೆಲ್ಪುಂಡು. ಐಕಾದ್ರ ಬಾಲೆನ್ ಜಕ್ಕೆಲ್ಡ್ ಕುಲ್ಲದ್ ಇಂಚ ಮಾನಾವೆರ್.
143
