ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಸೊರ್ಕೆಲ್ ಪೇರ್ಗ್, ನೀರ್ ಪಾಡಂದಿನ ಮಂದ ಪೇರ್, ಶುದ್ದವಾಯಿನ ಪೇರ್ಂದ್ ಅರ್ಥ ಉಪ್ಪೊಡು. ಅವೆನ್ ಒಕಾನೂಲುಗು ಕಟ್ಟೆಗಾಪುಂಡ? ಇಜ್ಜಿ. ನನ ಕಕ್ಕೆಗ್ ಪಾಡುನ ಎಂಚ? ಬಹುಶ: ಪ್ರಾಸಗಾದ್ರ ಈ ಶಬ್ದಲೆನ್ ಮುಡೆದಿಪ್ಪೆರೆಗ್ಲ ಯಾವ್. ಉರ್ಪ್, ಉರ್ಪ್.. ಅಂಗಣಿ-ಮಂಗಣಿ ಈ ಪದಕ್ಲೆನ ಅರ್ಥ ಅರ್ತಿ-ಕುಸಾಲ್ದ.. ಬಾಲೆ ಬುಲಿಪುನೆನ್ ಉಂತಾನಗ ಅಪ್ಪೆಗ್ಗ ವಂತೆ ಸಮಾಧಾನ. ಮೀಪಾವರೆ ಬಾಲೆದ ಬಂಜಿದ ಮಿತ್ತ್ ದೀತಿನ ದಟ್ಟಿದ ಕುಂಟು ದೆಪ್ಪುನಗನೇ ಐಕ್ ಅಂದಾಜಾಪುಂಡು, ಸಿಮಗಾಲಿಗ್ ಒರಾನೇ ಧಂ ಕಟ್ಟಿದ್ ಬುಲಿಪರೆ ಸುರು ಮಲ್ಪ. ಆನ್ ಜೋಕ್ಲಾಂಡ ಬುಲಿಪಾಟಿಕೆಡ್ ಪೊತೆಲ್ದರಿಲಾ ಮಿತ್ತ್ ಪೋವು. ಕೆಲ ಜೋಕ್ಲು ನೆಕ್ಕ್ ಅಪವಾದಾದ್ ಕುಸಿಟ್ ತೆಲಿತೊಂದಿಪ್ಪ. ಪುರುಬಾಲೆಗ್ ಎನ್ನೆ ಪೂಜಿನಗ... ಮಾಣಾವುನ ಪದ.
ಬಾಲೆದ ಮಂಡೆ ಕುಮ್ಡದಾತ್ ಬಾಲೆದ ಮುಂಡ ತಾರಾಯಿದಾತ್
ಬಾಲೆದ ಕೆಬಿ ತಡ್ಪೆದಾತ್ ಬಾಲೆದ ಕಣ್ ಪುರ್ಕೊಟ್ಟೆದಾತ್
ಬಾಲೆದ ಮೂಂಕ್ ಗುವೆಲ್ದಾತ್ ಬಾಲೆದ ಪೂವೊಲು ಚಂಡೆಲ್ದಾತ್,
ಬಾಲೆದ ಮಿಮ್ಮಿ ಪೂಲ್ದಾತ್ ಬಾಲೆದ ಬಾಯಿ ಕೆದುತಾತ್
ಬಾಲೆದ ತೊಮ್ಮೆ ಮುಂಚಿದಾತ್ ಬಾಲೆದ ಶುಂಠಿ (ಪೊನ್ನು ಬಾಲೆಗ್)ಬಾವಡೆದಾತ್
ಇಂಚ ಬಾಲೆದ ಒಂಜೊಂಜಿ ಅಂಗಲೆನ್ ಮಕ್ಕರ್ ಮಲ್ತೊಂದು ಎಣ್ಣೆ ಪೂಜುವೆರ್. ಅಪಗ ಬಾಲೆ ದು:ಖನ್ ಮದತ್ತ್ ದ್ ಕಿಟಕಿಟ ತೆಲಿಪರೆ ಸುರುಮಲ್ಪುಂಡು.
ಎನ್ನೆ ಪೂಜುನ ನನೊಂಜಿ ಪದ ಇಂಚ ಉಂಡು.. ಬಾಲೆದ ನೆತ್ತಿಗೆ, ಮುಂಡಗ್ ಎಣ್ಣೆ ಪೂಜಿನಗ
“ಪದಪು ಏತ್ ಅಗಲಜೆ? ನಾಲ್ ಬಿರೆಲ್ದಾತ್! ಈ ಸಾಲ್ನ್ ರಾಗಡ್ ನಿಧಾನಡ್ ಪನೊಡ್ಗೆ.
ಪದೆಪು ಪೂಜಿ ಬ್ರಹ್ಮ ಬರೆತೆ! ಆಯುಷ್ಯ ಮಸ್ತ್ ಉಂಡುಕೆರೆ!
ಮುಂಡ ಅಗೆಲ ಉಂಡುಜೆ! ಮುಂಡು ಬೂಳೊಳಿ- ಪಂಡ ಆ ಮುಂಡ ಇತ್ತಿನ ಜಾಗೆಡ್ ಅಡ್ಡಬೂರುದು ನಮಸ್ಕಾರ ಮಲ್ಪುನಾತ್ ಜಾಗೆ ಉಂಡುಂದ್ ಅರ್ಥ. ಬಾಲೆದ ಕುಜಲ್ಗ್ ಎಣ್ಣೆ ತಿಕ್ಕನಗ:-
ಕೆನ್ನಿ ನಿಲ್ಕೆ ತರೆಕುಜಾಲ್.., ಪುಚ್ಚೆ ನೈಯೊಲಿ, ಮಲ್ಲಿಗೆ ಜಲ್ಲಿ ಪಾಡೊಲಿ, ಅಂಬಡೆ ಸೂಡಿ ಪಾಡೊಳಿ, ಪರ-ಪರ ಮಿಜುಕುನ, ಕುಡು-ಕುಡು ಪೇನ್ನ್... ಚಿಡ್ಜ್ ಚಿಡ್ಕ ಸೊಯ್ಪೊಳಿ, ಅಪಗ ಪೇನ್ನ್ ಸುಯ್ಪುನಲೆಕ್ಕ ಮಲ್ಪುನಗ-ಬುಲಿಪುನ ಬಾಲೆ ಕಣ್ಣ್ ಬಾಯಿ ಬುಡ್ಡು ಪಿಲಿಪಿಲಿ ತೂಪ.
139
