ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ನನೊಂಜಿ ನಮುನೆಡ್ ಪುರುಬಾಲೆದೊಟ್ಟುಗು ಅಪ್ಪೆ ಬೊಕ್ಕ ಇಲ್ಲದಾಕ್ಲೆನ ಮೋಕೆದ ಪಾತೆರ-ಕತೆನೇ ಬಾಲೆಲೆನ ಸಾಹಿತ್ಯದ ಬುಲೆಚ್ಚಿಲ್ಂದ್ ಎನ್ನೊಲಿ.
1. ಪುರುಬಾಲೆಲೆನ್ ಗೊಬ್ಬಾವುನ ಅತ್ತಡ, ಬುಲಿಪುನಗ ಮಂಗಟಾವುನ, ಮೋಕೆ ಮಲ್ಪುನ, ಮಾನಾವುನ, ತೂಂಕುನ, ಇಂಚಿನ ನಡಾವಲಿದ ಆಚರನೆದ ಬೇತೆ-ಬೇತೆ ಮರ್ಗಿಲ್ದ ಪದಕುಲು ಮಲ್ಲ ಮಲ್ಲ ಕಬಿತೆದ ಉದಿಪನೆಗ್ ಮುಟ್ಟಿಗಲ್ಲಾದ್ ಉಲ್ಲಂದ್ ಜನಪದ ಕ್ಷೇತ್ರಡ್ ಬೆಂದಿನ ಖ್ಯಾತ ಸಿ.ಆರ್.ಕೆ. ಪನ್ತೆರ್. ಪೆದ್ದಿನ ಅಪ್ಪೆ ಅತ್ತಡ ಇಲ್ಲದಾಕ್ಲು ಪುರುಬಾಲೆಲೆನ್ ಮಾನಾನಗ, ಗೊಬ್ಬಾನಗ, ಎಣ್ಣೆ ಪೂಜಿದ್ ಮೀಪಾನಗ, ತೂಂಕುನಗ, ಬಂಜಿಗ್ ಕೊರ್ನಗ, ಪೊಸ-ಪೊಸ ವಿದ್ಯೆಲೆನ್ ಕಲ್ಪಾನಗ, ಪೆಜ್ಜೆದ ಅಜೆ ತತ್ತದ್ ಬೂರ್ನಗ, ಜರಟ್ ಸಂಕಟಡ್ ಅತ್ತಡ ಛದಿ ಪತ್ತ್ ದ್ ಬುಲಿಪುನಗ . . ಮಟ್ಟೆಲ್ಡ್ ಬೊಟ್ಟುನಗ, ಕಲ್ಪ ಕೋಮಾಟಿಕೆ ಮಲ್ಪುನಗ . .ಅಪ್ಪೆನ ಬಾಯಿಡ್ ಮೋಕೆಡ್ ಉದಿಪಿಂಚಿತ್ತಿನ ಪಾತೆರಕತೆನೇ ಬಾಲುಲೆನ ಸಾಹಿತ್ಯ. ಅಪ್ಪೆ ಆಯಿನಾಲೆಗ್ ಪುರುಬಾಲೆನ್ ಮಲ್ಲೆ ಮಲ್ಪುನವು ಒಂಜಿ ಭಂಜದ ಕೆಲಸ. ನುಪ್ಪು ನೀರ್ ಬುಡ್ಡು ನಿದ್ರೆ ಕಚ್ಚೆರ್ದ್ ಪುರುಬಾಲೆದೊಟ್ಟುಗೆ ಬಾಲೆ ಆದ್ ಅವ್ ಬುಲಿಪುನಗ ಬುಲ್ತೊಂದು, ತೆಲಿಪುನಗ ತೆಲಿತೊಂದು, ಜರ ಬನ್ನಗ ಅಕಲ್ ಪಾರ್ದ್... ಬೇನೆಡ್ ಆಲ್ ಮಲ್ಪುನಂಚಿನ ಬಾಲೆದ ಚಾಕರಿಗೆ ಬಿಲೆಕಟ್ಟರೆಗ್ ಏರೆಗ್ಲಾ ಸಾಧ್ಯ ಇಜ್ಜಿ. ದಾಯೆಪಂಡ ಸಂಬಲದಾಂತೆ ಬೇಲೆ ಮಲ್ಪುನವು ಅಪ್ಪೆ ಪನ್ಪುನ ಸಿರಿತುಪ್ಪೆಗ್ ಮಾತ್ರ ಸಾಧ್ಯ.
ಕಲು-ಕಪಟದಾಂತಿನ ಬಾಲುಲೆನ್ ನಮ್ಮ ಹೆರಿಯೆರ್ ದೇವೆರೆಗ್ ಸಮಂದ್ ಎನ್ನದಿತ್ತೆರ್. ಅಕುಲೆನ ತೆಲಿಕೆ, ನಲಿಕೆ, ಬುಲಿಪುನ, ಕಲ್ಪ ಕೋಮಾಟಿಕೆಲು . . ಜನಮಾನಿನ ಪುಗರಿಕೆಗ್ ತಿಕ್ಕಂದಿನವು. ಪೆದ್ದಿನಪ್ಪೆಗ್ ಬಾಲೆದ ಒಂಜೊಂಜಿ ಚರ್ಯೆಲಾ ಚೋಧ್ಯ ದಿನ- ದಿನಕ್ ಪೊಸತ್, ತೊಯಿನಾತ್, ಪುಗರಿನಾತ್ ಅಲೆಗ್ ಯಾವಂದ್, ಪನರೆ ಪೋಂಡ ಮುಗ್ಧಂದಿನವು. ಅಕುಲಾಕುಲೆನ ಬಾಲೆಲು ಅಕುಲಾಕೆಗ್ ಮಲ್ಲೆ. ಪೇರ್ ಜಿಂಜಿದ್ ಉರ್ಕುನ ಮಿರೆಕ್ ಬಾಲೆ ಒರಾನೆ ಬಾಯಿ ಕೊರ್ದು ಜುಂಬುನಗ ಒರಾನೆ ಪೇರ್ ನೆತ್ತಿಗೆ ಪೋದು ಬಾಲೆ ಗಾಲ್ಮೇಲ್ ಆನಗ... ಅಪ್ಪೆ ರಬಕ್ಕ ಐತ ನೆತ್ತಿಗೆ ಗಾಲಿ ಉರ್ತುದು . . .
ಸೊರ್ಕೆಲ್ದ ಪೇರ್, ಎನ್ನ ಒಕ್ಕೆಲ್ಡ್ ನೀರ್ ಇಜ್ಜಿ,
ನಿನನ್ ಒಕ್ಕನೂಲುಡ್ ಕಟ್ಟಿದ್... ಕಕ್ಕೆಗ್ ಪಾಡ್ ಉರ್ಪ್.ಉರ್ಪ್.ಉರ್ಪ್.
ಅಂಗಣಿ-ಮಂಗಣಿ, ದಡ್ಕ .. ಪೋಂಡು... ಇಂಚ ಪಂಡ್ದ್... ಬಾಲೆದ ಮೆತ್ತನೆದ ನೆತ್ತಿನ್ ಮೂಜಿ ಸರ್ತಿ ಗಟ್ಟಿಡ್ ಉರ್ಪುನಗ: ಪೊಸ ಪೊಸ ಶಬ್ದ ಕೇನಗನ ಅತ್ತಡ ಗಾಲಿ ಉರ್ತುನೈಕ ಆ ಬಾಲೆ ಒರಾನೇ ಅಲ್ಕ್ ದ್ ಉಸಿಲ್ ಬುಡ್ಪುಂಡು.
138
