ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ಒಂಜಿ ತುಡರ್ ತುಡರತ್ತ್, ಒಂಜಿ ಬಾಲೆ ಬಾಲೆ ಅತ್ತೆ :- ಬದ್ಕ್ ದ ಸತ್ಯಡ್ ಮೂಡ್ದ್ ಬತ್ತಿನ ಈ ಗಾದೆದ ತಿರ್ಲ್ ದ ಲೆಕ್ಕ ಒಂಜಿ ತುಡರ್ ಗಾಲಿಗಾ, ಎನ್ನೆದಾಂತೆನ, ಬತ್ತಿ ಕರಂಚ್ ದ ಪಾಂತೆಬೂರ್ದ ತೆಕ್ಕದ್ ಪೋವು. ನನೊಂಜಿ ಸಾನಾದಿಗೆಡ್ ತುಡರ್ ಅರ್ಲೊಂದಿತ್ತ್ಂಡ ಆ ತುಡರ್ಡ್ ಇಲ್ಲದ ಕತ್ತಲೆನ್ ಅಲಿತ್ದ್ ಬೊಲ್ಪು ಮಲ್ಲೊಲಿ. ಅಂಚನೆ ಇತ್ತಿನ ಒಂಜಿ ಬಾಲೆ ಸೀಕ್ ಡಾ, ಅಪಘಾತೊಡಾ ತೀರ್ದ್ ಪೋಂಡ ಇಲ್ಲದಕ್ಲಗ್, ಕುಟುಮದಲ್ಲೆಗ್ ಬದ್ಕ್ ಕತ್ತಲೆ. ವಂಶ ಬೆಲಗಾವೆರೆಗ್ ನನೊಂಜಿ ಬಾಲೆ ಇತ್ತಂಡ ಎಡ್ಡೆಂದ್ ಈ ಗಾದೆ ಪನ್ಪುಂಡು.
•ಅಪ್ಪೆ ತೈತಿ ಬಾಲೆದ ಬದ್ಕ್ ಪೊಂಗಾರ್ಲ ಆವು. ಅಮ್ಮ ತೈತಿ ಬಾಲೆದ ಬದ್ಕ್ ಬಂಗಾರ್ಲ ಆವು.
•ಬಾಲೆ ಎಡ್ಡೆ ಇತ್ತಂಡ ಯಾವಂದ್ ಶೀಲ ಎಡ್ಡೆ ಬೋಡು.
•ಬಾಲೆಡೇ ತಿದ್ದಂಡ ಪಾಲೆಮರತಲೆಕ್ಕ ಆವು :- ಈ ಗಾದೆಲು ಎಡ್ಡೆ ಸಂಸ್ಕೃತಿದ ಮೈಮೆನ್ ಬದ್ಕ್ ಕೊರ್ತುಂಡು. ಎಲ್ಲಿಡ್ ಕಲ್ತಿನ ಬುದ್ಧಿಲು ಅಖೇರಿಮುಟ್ಟ ಬರ್ಪುಂಡು.
•ಬಾಲೆ ಬುಲೆತಿ ಬೊಕ್ಕ ಐಕ್ ಛದಿ ಗರ್ವ ಎಚ್ಚ.
•ಬಾಲೆದ ಪುಟ್ಟುದ ಗುನ ತೈನಂಗೆ:- ಆ ಗಾದೆದ ಆಶಯ ಅಂಚಿನನೆ.
•ಕಂಡನೆ ಬುಡ್ತಿನಾಲೆಗ್ ಜೋಕ್ಲೇ ಗತಿ:- ಉಂದು ಲೋಕೋದ ಸತ್ಯ, ಬಂಜಿ ಬಾಯಿ ಕಟ್ಟಿದ್ ಬಾಲೆಲೆನ್ ಅಪ್ಪೆ ಮಲ್ಲೆ ಮಲ್ಪುನವು..ಅಪ್ಪೆನ ಬೇಲೆ ಆಂಡ, ಆ ಜೋಕ್ಲು ಮಲ್ಲೆ ಆದ್, ರಿನ ಊಟರೆಗಾದ್ರ ಅಪ್ಪೆನ್ ತಾಂಕ್ನವು ಜೋಕ್ಲೆನ ಧರ್ಮ,
•ತೊಟ್ಟಿಲ್ ತೂಂಕುನ ಕೈ ..ಪಟ್ಟೊದ ಖಡ್ನಲೆನ್ ಪತ್ತೊಲಿ:- ಅಧಿಕಾರದ ಗದ್ದುಗೆಗ್ ಪೊನ್ನು ಆನ್ ಪನ್ಪುನ ಪರಬೇಧ ಇಜ್ಜಿ. ಅವುಲ ತುಲುನಾಡ ತುಲುವೆರ್ನ ಮಾತೃ ಮೂಲ ಸಂಸ್ಕೃತಿಡ್ ಅರಸ್ತಾನದ ಅತ್ತಡಲ ಮಲ್ಲ ಮಲ್ಲ ಗುತ್ತು ಬರ್ಕೆದ ಅಧಿಕಾರಲ ಪೊನ್ನಗುಂಡು. ಉಳ್ಳಾಲದ ರಾನಿ ಅಬ್ಬಕ್ಕನ್ ಉದಾರ್ಮೆಗ್ ಕೊರೊಲಿ. ಇಂಚಿನ ಗಾದೆಲು ರಾಜಕೀಯದ ಚರಿತ್ರೆನ್ಲ ತೆರಿಪಾವುಂಡು.
•ಪೊನ್ನು ಬಾಲೆ ಪೆದ್ದಿ ಅಪ್ಪೆಗ್ ಏಪಲಾ ಸುಖ ಇಜ್ಜಿ:- ದುಂಬು ಪೊನ್ನನ ಬದ್ಕ್ ಪಂಡ ಕನ್ನನೀರ್ದ ಕಡಲ್ಂದೇ ಲೆಕ್ಕ.
•ಮಗಲೆಗ್ ಭಂಜ ಬತ್ತ್ಂಡ್ ಅಪ್ಪೆಗ್ ಏಪಲಾ ಬೇನೆ. ತಾನ್ ಗಂಜಿ ಉನ್ನಗಲಾ ಮಗಲ್ ಉಂಡಲಾ ಇಜ್ಜಂದ್ ಆಲೆನ ದು:ಖ, ಅಪ್ಪೆನ ಮನಸ್ಸ್ ಪಂಡ ಸಿರಿ ತುಪ್ಪೆದ ಲೆಕ್ಕ.
119
