ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ಬಾಲೆ ಮಲ್ಪರೆಗ್ ಗುರು ಬೊಡ್ಚಿ, ಉರು ಆಪುಂಡ್ಂದ್ ಬಾಲೆ ಮಲ್ತೆ:- ಈ ಗಾದೆ (ಲೈಂಗಿಕತೆ) ಬಪ್ಪರಾಂಡಲಾ ಪ್ರಕೃತಿದ ಸಹಜವಾತಿನ ಗುನಧರ್ಮ ಉಂಡು.
•ಸಿಂಹದ ಬಂಜಿಡ್ ಕುದ್ಕೆ ಪುಟ್ಟಲೆಕ್ಕ . ಪಿಲಿತ ಬಂಜಿಡ್ ಎಲಿ ಪುಟ್ಟಲೆಕ್ಕ,
•ಆನೆದ ಬಂಜಿಡ್ ಏಡ್ ಪುಟ್ಟಲೆಕ್ಕ:- ಅಪ್ಪೆ ಅಮ್ಮೆ ಬಿರ್ಸೆರಾದ್ ಮಲ್ಲಪುದಾರಿತ್ತಿನಾಕ್ಲೆನ ಜೋಕುಲು ಎರ್ಮೈಂದಲೆಕ್ಕ ಬೂರ್ನಾಸ್ ಆಂಡ ಜನಮಾನಿಲು ಇಂಚಿನ ಪಾತೆರಡ್ ದಡಿತ ಪಡಿ ಕೊರ್ಪೆರ್.
• ಜೋಕ್ಲೆನ ಪಾತೆರೆಗ್ ಇಲ್ಲ್ ಬುಡಿಯೆ.
•ಜೋಕ್ಲೆನ ಎಲ್ಯ ಪಾತೆರನೇ ಇಲ್ಲ್ ದರ್ತ್ಂಡ್
•ಜೋಕ್ಲೆನ ಪಾತೆರೆಗ್ ಬಿಲೆ ಕೊರ್ರೆ ಬಲ್ಲಿ.
•ಜೋಕ್ಲಾಟಿದಾಯೆಗ್ ಬಾಲೆ ಆಂಡ್ಗೆ:- ಜಿಂಜಿನ ಕುಟುಮದ ಕೂಡುಕಟ್ಟ್ದ ಇಲ್ಲ್ ಭಾಗ ಆಪುನಿ, ಜೋಕ್ಲೆಡ್ಡಾವರ. ಜೋಕ್ಲೆನ ಲಡಾಯಿ-ಪುಡಾಯಿ ಅಕುಲೆನ ಲತ್ತ್ ಪ್ರಾಯಗಿತ್ತಿನವು. ಅವ್ ಒಂಜಿ ಗಲ್ಗೆ ಮಾತ್ರ. ಬೊಕ್ಕ ಅಕ್ಲು ಒಂಜೇ ಮಲ್ಲಕ್ಲೆ ಬೇತೆ. ಆಂಡ ಜೋಕ್ಲೆನ ದೂರ್ ಕೇನ್ದ್ ಮಲ್ಲಕ್ಲು ಲಡಾಯಿ ಮಲ್ತ್ಂಡ ಅಕುಲೆನ ಮನಸ್ಸೇ ಏಪಲಾ ಕಲಂಕಿನ ನೀರ್. ಒಂಜಿ ಕೋಪಗ್ ಗುವ್ವಲ್ ಲಾಗಿಲೆಕ್ಕ, ತುಂಡಾಯಿನ ಮನಸ್ಸೇ ಒಂಜಾವೆರೆಗ್ ಜಿಂಜ ಕಷ್ಟ ಉಂಡು. ಅಂಚಾದ್ ಜೋಕ್ಲೆನ ದೂರುಲೆಗ್ ಮಲ್ಲಕ್ಲು ಕೆಬಿ ಕೊರ್ರೆ ಬಲ್ಲಿಂದ್ ಈ ಗಾದೆಲು ಪನ್ಪುಂಡು.
•ಬಾಲೆ ಬುಲಿಪ್ಪಂದೆ ಪೇರ್ ಕೊರಯೆರ್ :- ಬಾಲೆದಪ್ಪೆಗ್ ಗಲ್ಗೆ ಪುರುಸೊತ್ತುದಾಂತೆ ಕೈ ನಿಲ್ಕೆ ಬೇಲೆ ಉಪ್ಪುನಗ ಅಲೆಗ್ ಬಾಲೆದ ನೆಂಪುಲಾ ಮಾತೃದ್ ಪೋವು. ಬಾಲೆ ಬುಲ್ತುಂಡ ಮಾತ್ರ ಪಾರೊಂದು ಬರುವಲ್.
•ಎನ್ನ ಬಾಲೆದ ಗುನ ಎಂಕ್ ತೆರಿದುಂಡು: ಬಾಲೆದ ಛದಿ, ರಿಚಿ, ಬುಲಿಪು, ಬಡವು, ಪಿಸ್ಂಟ್ ಉಂದು ಮಾತಾ ಬಾಲೆದಪ್ಪೆಗತ್ತಾವಂದೆ ಬೊಕ್ಕ ಏರೆಗ್ ತೆರಿವು? ಇಡೀ ದಿನಲಾ ಬಾಲೆದೊಟ್ಟುಗು ಉಪ್ಪುನಾಲ್ ಆಲ್. ಪೊರ್ತು ಪೊರ್ತುಗು ಬಂಜಿಗ್ ಕೊರ್ಪುನಾಲ್, ಪೀ-ಪಡ್ಕೆ ಗೋರುನಾಲ್ ಆಲ್.
•ಎನ್ನ ಬಾಲೆನ್ ತಟೊನ್ಲ .. ನಿನ್ನ ಬಾಲೆನ್ ನಡಪೊಲ :- ಈ ಗಾದೆಡ್ ಅಪ್ಪೆನ ಸ್ವಾರ್ಥ ತಮೆಲೊಂದುಂಡು. ಅಕುಲಕ್ಲನ ಬಾಲೆ ಅಕುಲಕೆಗ್ ಮಲ್ಲ. ಆಲ್ ಇಂಚ ಪನೊಡಾಂಡ ಕುಡ ಒರ್ತಿ ಅಲೆನ ಚಾಕ್ರಿದಾಲ್ ಆದಿಪೊಡು. ಅತ್ತಡ ಬಡಪತ್ತೇದಾಲ್ ಆದಿಪೊಡು.
118
