ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಪ್ರಾಸದ ಪೊರ್ಲುದೊಟ್ಟುಗು ಅಲಂಕಾರ ಉಪಮೆ ಜಿಂಜಿನ ಇಂಚಿನ ಗಾದೆಲು, ಜನಮಾನಿಗ್ ಬದ್ಕೆರೆಗ್ ತಾದಿ ತೋಜಾವುನ, ಈ ಗಾದೆಲು ವಿವರನೆ ಕೊರ್ಪುಂಡು. ಅಪ್ಪೆ ತೈತ್ಂಡ ಅತ್ತಡ ಬುಡ್ದ್ ಪೋಂಡ ಬಾಲೆಗ್ ತಮೆರಿ ಏರ್? ಲೋಕಾಪವಾದಗ್ ಪೋಡಿದ್ ಅಮ್ಮೆ ಅತ್ತಡ ಬೇತೆ ಏರಾಂಡಲಾ ಕಣ್ಕಟ್ಟ್ ಗ್ ತಾಂಕುಂಡಲಾ ಅಪ್ಪೆನ ಜಾಗೆನ್ ತುಂಬರೆಗ್ ಏರೆಗ್ಲ ಸಾಧ್ಯಯಿಜ್ಜಿ.,
•ಬಾಲೆದ ಅಪ್ಪೆಗ್ ರಾತ್ರಿ ಪಗೆಲ್ ಒಂಜೇ.
• ಪೆದ್ದಿ ಕರ್ಲ್ ಗ್ ಕುರ್ತೆಲ್ ಇಜ್ಜಿ.
• ಇತ್ತಿನ ಬಾಲೆಲೆನ ಬಂಜಿಗಜ್ಜಿ, ನನ್ನೊಂಜಿ ಕೊರ್ಲೆಂದ್ ದೇವೆರೆಡ ನಟ್ಟಿಯೆರ್:- ಬಾಲೆನ್ ಉಂಡು ಮಲ್ತಿ ದೇವೆರ್ ಬಂಜಿಗ್ ಗಂಜಿ ಜಿಂಜಾವಂದೆ ಬುಡುವೆರೆ? ದುಂಬುದಾಕ್ಲೆನ ಬದ್ಕ್ ದ ಐಸಿರಿ ಪಂಡ ಇಲ್ಲ್ ನಿಲ್ಕೆ ಜೋಕ್ಲು ಬಾಲೆಲು. ದೇವೆರ್ ಕೊರ್ತಿನ ಧರ್ಮದ ಬುಲೆ. ಇಲ್ಲ್ ನಿಲ್ಕೆ ಜೋಕ್ಲು ಉಪ್ಪಡಪ್ಪಾಂದ್ ದೇವೆರ್ಡಪ್ಪ ನಟ್ಟುನಂಚಿನ ಆ ಕಾಲ. ಇತ್ತೆದಲೆಕ್ಕ ಒಂಜಿ ಬಾಲೆಗೇ ಖೈದ್ ಮಲ್ಪುನಂಚಿನ ಕಲ್ಜಿಗ ಅದಗತ್ತ್.
•ಬಾಲೆನ್ ತಿರ್ತ್ ದೀಂಡ ಪಿಜಿನ್ ಕೊನೊವು, ಮಿತ್ತ್ ದೀಂಡ ಕಕ್ಕೆ ಕೊನೊವು:- ಈ ಗಾದೆಡ್ ಬಾಲೆಡಿಪ್ಪುನ ಇಲ್ಲದಾಕ್ಲೆನ ಮೋಕೆ ಗಮೆಲುಂಡು.
•ಇಂಚಿದ ಇಲ್ಲದಾಲ್ ಬಾಲೆ ಪೆದ್ದ್ಂಡ ಆಪೆದಿಲ್ಲದಾಲೆಗ್ ಬಂಜಿಬೇನೆ.
ಜನಮಾನಿನ ಸೂಕ್ಷ್ಮ ಭಾವನೆಲೆನ್ ಈ ಗಾದೆ ಬೊಟ್ಟು ಮಲ್ತ್ ದ್ ತೋಜಾವುಂಡು. ಬಂಜಿದ ಕಿಚ್ಚಿ ತೂ-ದಾಂತೆ ಇಡೀ ಬದ್ಕ್ ನ್ ಜೀವೊನ್ ಪೊತ್ತಾವುನೈಕ್ ಈ ಗಾದೆ ಒಂಜಿ ಉದಾರ್ಮೆ. ಒಂಜಾ ಆಪೆದಿಲ್ಲದಾಲೆಗ್ ಮದಿಮೆ ಆತಿಜ್ಜಿ ಅತ್ತಡ ಮದಿಮೆ ಆಂಡಲಾ ಬಾಲೆಲು ಆತಿಜ್ಜಿ ಅತ್ತಡ ಪುಟ್ಟುದಿನ ಬಾಲೆ ನೈದಿಪ್ಪು. ಪನರೆಗ್ಲ ಅತ್ತ್. ಪನರೆಗಾವಂದಿನ ತಡೆವೆರೆಗಾವಂದಿನ ಬಂಜಿ ಬೇನೆಗ್, ಕಿಚ್ಚಿ ಮಚ್ಚರಗ್ ಮರ್ದಿಜ್ಜಿ. ಕಡಿವಾನದಾಂತಿನ ಮನಸ್ಸೇ ನಮ್ಮ ಯೋಚನೆ ಮಲ್ತಿಲೆಕ್ಕ ಬಲಿಪುಂಡು
•ಒಂಜೇ ಅಪ್ಪೆ ಬಂಜಿಡ್ ಪುಟ್ಟುಂಡಲಾ ಜೋಕ್ಲೆನ ಗುನ ಬೇತೆ-ಬೇತೆ.
• ಪುಟ್ಟುನಗ ಬಾಲೆಲು .. ಬುಲೆನಗ ಕುಲೆಕ್ಲು
•ಪೆಲತರಿನ್ ಬಂಜಿಡ್ ದಿವೊನೊಲಿ ಆಂಡ ಪೆಲಕಾಯಿನತ್ತ್.
• ಒಪ್ಪ ಪುಟ್ಟಿನ ಬಾಲೆಲು .. ಮಲ್ಲನಗ ಪಾಲ್ಪಟ್ಟಿದಕ್ಲು.
•ಬಾಲೆ ಪೋದು ಬಬ್ಬರಿಯೆ ಆಯೆ.
117
