ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಇಲ್ಲಗ್ ಬಿನ್ನೆರ್ ಬರ್ಪೆರ್ ಪೋಪೆರ್. ಬೆನ್ನಿದ ಸಿರಿ ತುಪ್ಪೆ ಜಿಂಜಿದ್ ಉಪ್ಪುಂಡು. ಅಂಚನೆ ಜೋಕ್ಲೆನ ತೊದ್ದೆ ತೊದ್ದೆ ಪಾತೆರ ಕೇನರೆಗ್ ಪೊರ್ಲು. ಬಾಲೆದೊಟ್ಟುಗು ನಮಲ ಬಾಲೆ ಆದ್ ಬಪ್ಪೆ, ಪೋಪೆ, ಕೊಲ್ಲೆ, ಜಿಜ್ಜಿ, ಬೋಚಿ, ಚಚಿ, ಚೀಪೆ, ಕುಲ್ಲುಲೆ, ಮಮ್ಮ, ಮುನ್ನೆ ಇಂಚ ತೊದ್ದೆ ತೊದ್ದೆ ಪಾತೆರುನ ಪೊರ್ಲುಗ್ ಏರ್ಲಾ ಬಿಲೆ ಕಟ್ಟರೆಗ್ ಆಪುಜ್ಜಿ.
•ಬೇಲೆ ಕಂಡುಗು ಬಾಲೆದ ನೆವನ.
•ಬೇಲೆ ಕಲ್ವೆದಿ ಬಾಲೆದ ಪಿಂಕಾನ್ ಕಿನ್ಕ್ಯಲ್.
•ಬೇಲೆದಾಂತಿ ಆಚಾರಿ ಬಾಲೆದ ಪಿಂಕಾನ್ ಕೆತ್ತಿಲೆಕ್ಕ!
•ಬೇಲೆದಾಂತಿ ಕೂಚೆ ಬಾಲೆದ ಪಿಂಕನ್ ಕಿನ್ಕ್ ದ್ ಬುಲಿಪಾಯ :- ಉಂದು ಬೇಲೆ ಮಲ್ಪರೆ, ಉರು ಆತಿನಕ್ಲೆಗ್ ಚಬುಕುದಡರ್ಡ್ ಹಾಕ್ದ್ ಪನ್ಪುನ ಗಾದೆಲು. ಪೊನ್ನಾವಡ್ - ಆನಾವಡ್ ಬೆಂದ್ ದ್ ತಿನೊಡು. ಎಂಚಾಂಡಂಚ ಪೊರ್ತು ದೆಪ್ಪುನವು ನಿಯತ್ತ್ ದ ಬದ್ಕತ್ತ್. ಬೆಗರ್ ಸೀಂಟಂದೆ ಕುಲ್ಲುದು ತಿನ್ಪುನಾಕ್ಲೆಗ್ ಉಂಡಿ ನುಪ್ಪು ಮೈಕ್ ಪತ್ತಂದ್. ಅಂಚ ಆಚಾರಿ ಉಪಯೋಗಗ್ ಬರಂದಿನ ಬೇಲೆ ಮಲ್ತ್ ದ್. ಆಯೆ ಮಲ್ಪೊಡಾಯಿನ ಬೇಲೆಡ್ ಕಜ್ಜೆರುನ ಮಲ್ಲ ತಪ್ಪು.
•ಎಲ್ಯ ಬಾಲೆ ಇತ್ತಿನ ಅಪ್ಪೆಗ್ ಬೇಲೆ ಕಜ್ಜೆರ್ನೈಕ್ ಬಾಲೆ ಒಂಜಿ ನೆಪ. ಇಡೀ ದಿನಲಾ ಬಾಲೆಗ್ ಮಿರೆಪೇರ್ ಕೊರ್ಪುನನ, ಬಡವು, ಬಾಜೆಲ್ ಕೊರ್ಪುನನ, ತೊಟ್ಟಿಲ್ ತೂಂಕುನನ, ಕುಂಟು ಅರ್ದುನನ, ಪೀ-ಪಡ್ಡೆ ಗೋರುನನ, ಮಂಗಾಟಾವುನನ ಇಂಚ ದಾದಾಂಡಲ ಮಲ್ತೊಂದಿಪ್ಪುನಗ, ಇಲ್ಲದಾಕ್ಲಗ್ ಅಲೆಡಪ ಬೇಲೆ ಪನರೆಗ್ ಮನಸ್ ಬರಂದ್. ಒಂಜಿ ವೇಲೆ ಕಣ್ಣ್ ಕಟ್ಟ್ ಗ್ ಬೇಲೆ ಮಲ್ಪರೆಗ್ ಪೋಂಡಲಾ ಬಾಲೆದ ತುಡೆಕ್ ಅತ್ತಡ ಪುಕುಲಿಗ್ ಗಟ್ಟಿಡ್ ಕಿನ್ಕಿನ ಬೇನೆಗ್ ಬಾಲೆ ಕಿರ್ಕಟ್ಟಿದ್ ಬುಲಿಪುನಗ ಪೋ.. ಪೋ ಬಾಲೆನ್ ಬುಲಿಪಾವಡಂದ್ ಇಲ್ಲದಕುಲು ಪಿರ ಕಡಪುಡುವೆರ್. ಬಾಲೆಗ್ ಸತ್ಯನ್ ಪನರೆಗ್ ತೆರಿಪುಜ್ಜತ್ತ.
•ಪೆಟ್ಟ್ ಗ್ ಬಾಲೆನ್ ಅಡ್ಡ ಪತ್ತಿಲೆಕ್ಕಾಂಡ್:- ಕಂಡನೆನ ನೆರಡೆ ಪುರಡೆಗ್ ಬಾಲೆದ ನೆಪ ಮುಲ್ಪ ನೆಗೆತ್ ತೋಜುಂಡು, ಹಾಕರೆ ನೂಪರೆ ಬತ್ತ್ಂಡ ಬಾಲೆನ್ ಅಡ್ಡ ಪತ್ತ್ಂಡ ಕಂಡನೆನ ಏರ್ದಿನ ಗರ್ವ ಒರಾನೆ ಪಿರಿವುಂಡು.
•ಬೂರುಗು ಕಾಯಿ ದಿನ್ನ ಅತ್ತ್. ಅಪ್ಪೆಗ್ ಬಾಲೆ ದಿನ್ನ ಅತ್ತ್.
•ಎನ್ನ ಬಾಲೆ ಪುತ್ತೊಳಿ ಬಂಗಾರ್, ಅಕ್ಲೆನ ಬಾಲೆ ಕಕ್ಕೆ ಬಂಗಾರ್.
115
