ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಪನ್ಪುನಂಚಿನ ಎಡ್ಡೆ ಪಾತೆರದ ತಿರ್ಲ್ಡನ್ ಗಾದೆ ಒಂಜೇ ವಾಕ್ಯಡ್ ಚಿಟ್ಕ್ ಡ್ ಪನ್ಪುಂಡು. ಎಲ್ಲಿಡ್ ಮಲ್ಲೆ ಅರ್ಥ. ತೂವರೆ ವಾಮನೆ ಆಂಡಲಾ ಐತ ಅರ್ಥ ತ್ರಿವಿಕ್ರಮನ. ಅಂಚಾದ್ ತುಲು ಜನಪದೆರ್ ಗಾದೆಗ್ ಎಡ್ಡೆ ಮದಿಪು ಕೊರ್ತೆರ್.. ಜನ್ಮೊಗು ಬತ್ತಿನ ನರಮಾನಿ ಆಯೆ ಮಲೆಮಂಗೆ ಆಂಡಲಾ (ಬೊಂಧಲೆ) ತನ್ನ ಪಾತೆರ್ಕತೆಟ್ ಗಾದೆನ್ ಪನಂದೆ ಕುಲ್ಲಯೆ. ಗಾದೆ ಪನ್ಪುನವು ಜನಮಾನಿಲೆನ ಉಸಿಲ್, ಜನಮಾನಿನ ಬದ್ಕ್ ಗ್ ತುಡರಾಯಿನ ಗಾದೆಲು.. ಇನಿ ಕೋಡೆ ಸೃಷ್ಟಿ ಆಯಿನತ್ತ್., ಅಕುಲಾಕ್ಲೆನ ಅಪ್ಪೆನ ಭಾಷೆ.. ಮೂಡ್ನಗನೆ ಉಂಡಾಯಿನವು. ಸಾರ ಸಾರ ವರ್ಷದ ಪಿರವು ಬದ್ಕ್ ದ್ ಬಾಲ್ದಿನ ಜನಮಾನಿಲೆನ ಅನುಭವದ ತಿರ್ಲ್(ಮೌಲ್ಯ) ಗಾದೆ ಕರಗ್ದುಂಡು.
ಏಡ್ ಮೇಪಂದಿನ ತೊಪ್ಪಿಜ್ಜಿಂದ್ ಪಂಡಿಲೆಕ್ಕ ಗಾದೆ ಮುಟ್ಟಂದಿನ ವಿಷಯಲಿಜ್ಜಿ . ಜನಮಾನಿನ ಗುನ ಅವಗುನ, ಆಚಾರ-ವಿಚಾರ, ಎಡ್ಡೆ-ಪಡ್ಕೆ, ಕಸಬು, ಬುಲೆ, ನಕ್ಷತ್ರ- ಸಂಸ್ಕೃತಿ, ಕುಟುಮದ ಕಟ್ಟುಲು-ಬಾಷೆ, ನಂಬಲಿಗೆ. ನಮ ಬದ್ಕ್ ಬೆಂಞನಾಡಿತ್ತಿನ ಬೋನ್ನೆಯಿದಲೆಕ್ಕ ಗಾದೆದ ತಿರ್ಲ್ ನಿಂದೊಂದುಂಡು. ಅಂಚಾದ್ ಗಾದೆ ಪನ್ಪುನವು ಕೋಡೆ, ಇನಿ, ಎಲ್ಲೆದ ಸತ್ಯನ್ ಬಿರ್ಕ್ನಂಚಿತ್ತಿನವು. ಒಂಜೇ ಊರ್ಡ್ ಸೃಷ್ಟಿ ಆತಿನವತ್ತ್. ಇನಿ ಕೋಡೆದತ್ತ್. ತುಳುಜನಪದೆರ್..ಜೋಕ್ಲು ಬಾಲೆಲೆನ ಮಿತ್ತ್ ಜಿಂಜ ಗಾದೆಲೆನ್ ಉಂಡು ಮಲ್ತ್ದೆರ್.
• ಕಾಸಿತ್ತಿನಾಯೆಗ್ ಬಾಲೆಲಿಜ್ಜಿ.. ಬಾಲೆಲಿತ್ತಿನಾಯೆಗ್ ಕಾಸಿಜ್ಜಿ:- ಮಲ್ಲಸ್ತಿಗೆ ಬಡಪತ್ತ್.. ಇನಿ ಕೋಡೆದತ್ತ್. ಲೋಕಡ್ ಕಾಸ್ ಇತ್ತಿನಾಯೆಗ್ ಮಲ್ಲ ಮಣೆ ಪಾಡುನವು ಸತ್ಯ. ದೇವೆರ್ ತ್ರಾಸ್ಡ್ ಪರೀಕ್ಷೆ ಮಲ್ಪುನಲೆಕ್ಕ.. ಅಕುಲೆಗ್ ವರ್ಷಗೊಂಜಿ ಬಾಲೆನ್ ಕೊರ್ಪೆರ್. ಬೆನ್ಪುನ ಕೈ ಒಂಜಾಂಡಲಾ.. ತಿನ್ಪುನ ಬಾಯಿಲು ಪತ್ತ್..ಪದರಾಡ್. ಮಲ್ಲಾಕ್ಲು ಏತ್ ಪಟ್ಟ ಪರಕೆ, ಪೂಜೆ-ಪುನಸ್ಕಾರ, ಮರ್ದ್- ಮಾಯ ಮಲ್ತ್ಂಡಲಾ ಬಂಜಿಡ್ ಬಾಲೆ ಕೊಡಿಪುಜ್ಜಿ. ಅಕುಲೆನ ಸಂಪತ್ ಕರಗರೆಗ್ಲ ಬಾಲೆಲಿಜ್ಜಿ.. ಮಾತಾ ಭಾಗ್ಯಡ್ದ್ ಎಚ್ಚ ತನ್ನ ನೆತ್ತೆರ್ದ ಕೊಡಿದಾಂತಿನ ಬೇನೆ ತೈನಂಗೆಲಾ ಉಪ್ಪುಂಡ್.
•ಕೊಪ್ಪರಿಗೆ ಉಪ್ಪರಿಗೆ ಇತ್ತಂಡ ದಾನೆ? ಬಂಜಿಡೊಂಜಿ ಪುರಿ ಮಿಜಿಕ್ ಜ್ಜಿಡ! ಬಾಲೆ ಪೆದ್ದಂದಿನಾಕ್ಲೆನ ಬೇನೆನ್ ಪಂಡ್ದ್ ಪುಡಾಡ್ರೆಗಾವ!.
•ಬಾಲೆದಾಂತಿ ಇಲ್ಲಡ್ ಸನ್ಯಾಸಿ ಭಿಕ್ಷೆ ನಟ್ಟಯೆ:- ಪೊನ್ನನ ಬದ್ಕ್ ಅಪ್ಪೆಆಂಡ ಮಾತ್ರ ಸಾರ್ಥಕ. ದುಂಬುಡು ಮಲ್ಲ ಮಲ್ಲ ರಿಸಿಮುನಿನಾಕ್ಲು ಬಾಲೆಲು ಇತ್ತಿನ ಇಲ್ಲಡ್ ಮಾತ್ರ ಭಿಕ್ಷೆ ನಟೊಂದಿತ್ತೆರ್. ಉನಸ್ ಮಲ್ಪೆರ್. ಅಂಚನೆ ಧಾರ್ಮಿಕೊದ ಪೂಜೆ- ಪುನಸ್ಕಾರ ಲೇಸ್ಗಟೆಡ್ ಎಲ್ಯಕಂಜಿ ಇತ್ತಿನ ಪೆತ್ತದ ಪೇರ್ನ್ ಬಲಸ್ವೆರ್. ಇಲ್ಲಡ್ ಬಾಲೆದ ತೆಲ್ಕೆ ಅಲಿಕೆ ಕೇನ್ಂಡ ಮಾತ್ರ ಆ ಇಲ್ಲಗ್ ಗಲ್ಕ್ ದ ಲಚ್ಚನ. ಈ ಗಾದೆದ ಪಾತೆರ ಪುರಾಣ ಕತೆಕ್ಲಡ್, ಜನಪದ ಕತೆಕ್ಲಡ್ ಜಿಂಜ ಬರ್ಪುಂಡು.
113
