ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
•ಈ ತೈಪುನ ಸ್ಥಿತಿಟ್ತ್ತಿನ ಬಾಲೆನ್ ಒರಿಪೋವರೆಗಾತ್ರ ಬಡಕಾಯಿ ಮೈಟ್ ಗುಂಡಿತೋಡ್ದ್ ಐಕ್ ಗೋಂಕುರು ಕಪ್ಪೆ ಅತ್ತಡ ಅರಣೆನ್ ಪಾಡ್ದ್ ಐಕ್ ಪೂಜೆ ಮಲ್ತ್ ದ್ ಬಾಲೆಗ್ ತೊರತ್ದ್ ಐತಮಿತ್ತ್ ಪರ್ಂದ್, ಬಚ್ಚಿರೆ, ಪೂಲು, ಮಂಜಲ್, ಕುಂಕುಮ ಪಾಡ್ದ್ ಗುಂಡಿದ ಮಣ್ಣ್ ಮುಚ್ಚಿಬೊಕ್ಕ ಆ ಬಾಲೆನ್ ಗುಂಡಿದಮಿತ್ತ್ ಮೂಜಿ ಸರ್ತಿ ಅಂಚಿ ಇಂಚಿ ದಂಟೊಂಡ ಬಾಲೆ ತೈತ್ ಬದ್ಕುಂಡು, ಗೆರಚಾರ ದೋಷಲು ಪಿಡ್ಡ ಪಾಡುವಗೆ.
•ಗುಣ ಆವಂದಿನ ಬಾಲೆಲೆನ ಸೀಕ್ಗೆ ಕೊರಗೆರ್ ಗೋರೋಚನದ ಎಣ್ಣೆದ ಬೊಟ್ಟನ್ ನೀರ್ಗ್ ಪಾಡ್ದ್ ಪರ್ಪಾವೆರ್ಗೆ. ದುಂಬು ತೈದಿನ ಪೆತ್ತ, ಎರುತ ಮಾಸನ್ ಬಿಚ್ಚಾನಗ ಗೋರೋಚನ ತಿಕ್ಕುಂಡುಗೆ. ಅವೆನ್ ನುಂಗಾವೆರೆಗಾದ್ರ ದಿಕ್ಕೆಲ್ದಲ ಮಿತ್ತ್ ದ ಪಕ್ಕಾಸ್ಗ್ ಕದ್ದೊಂದಿತ್ತೆರ್ಗೆ. ಐತ ರಸತ ಒಂಜಿ ಬೊಟ್ಟನ್ ಪರ್ಪುನೈಟಾ ಉನ್ಪುನೈಟಾ ಪಾಡ್ದ್ ಕೊರ್ಪೆರ್ ಗೆ. ಅವ್ ಭಾರಿ ಕೈಪೆಗೆ .ಇತ್ತೆದ ಕೈ-ಕಂಜಿಲೆಡ್ದ್ ಗೋರೋಚನ ತಿಕ್ಕುಜ್ಜಿಗೆ.
•ಕೆಲಸರ್ತಿ ಜರ ಬುಡ್ತಿಜಡ ಎಣ್ಮೆದೆನ್ನೆದ ತುಡರ್ಡ್ ಕುಪ್ಪಿದ ಕಾಜಿದ ತುಂಡ್ನ್ ಕೆಂಪಾನಮುಟ್ಟ ಕಾಯ್ತದ್ ಬಾಲೆದ ನೆತ್ತಿಸುಲಿ, ಮುಂಡದ ಬರಿಟ್ ಕೊಂಬಬಿರೆಲ್ದ ನರತಮಿತ್ತ್ ದೀದ್ ಬರೆ ಪಾಡ್ವೆರ್. ಅಪಗ ಆ ಕಾಜಿ ತುಂಡುದ ಬೆಚ್ಚಗ್ ಬಾಲೆ ಅರೆಬಾಯಿ ಕೊರ್ದು ಬುಲ್ತುಂಡ ಸನ್ನಿ ಪೋಂಡುಂದು ಲೆಕ್ಕಗೆ.
•ಬಂಜಿ ಕುದ್ಪೆ, ಕೈ ಕಾರ್ ಸಪುರ ಉಪ್ಪುನ ಬಾಲೆಲೆಗ್ ಕಾಡ್ ಪುನುಗು ಪುಚ್ಚೆನ್ ಕೆರ್ದ್ ಐತ ಮಾಸನ್ ಪೊನ್ನೆದೆನ್ನೆಡ್ ಬೆಯ್ಪಾದ್ ಐತ ಎನ್ನೆಡ್ ತಿಕ್ಕದ್ ಪೂಜಿದ್ ಪುಲ್ಯಕಾಂಡೆದ ದೊಂಬುಗು ಬಾಲೆನ್ ಅರ್ಧ ಗಂಟೆದಿಂಡ ಪಕ್ಕಿದರೋಗ ಗುಣ ಆಪುಂಡುಗೆ.
•ಬಾಲೆಗ್ ಸೀಕ್ ಗುನ ಆಯಿಜಡ .. ಕೊರಗೆರೆನ್ ಲೆತ್ತ್ದ್ (ಅಮಾಸೆದಾನಿ) ಬಾಲೆನ್ ಪಾಲೆಡ್ ಜೆಪುಡಾವೆರ್, ಮಲ್ಲ ಪಾಲೆದ ದೊನ್ನೆನಿಲ್ಕೆ ಎನ್ಮೆದೆನ್ನೆ ಪಾಡ್ದ್ (ಐನ್ ಲೀಟರ್ ಪತ್ತೆನಾತ್) ಅಂಚಿ ಇಂಚಿಡ್ದ್ ಕೋಲ್ನೆನೆ ದೀದ್ .. ಬಾಲೆಗ್ ತೊರತ್ದ್ ಕೊರುಂಡ ಅಕುಲು ಪಿರ-ಮುಂಕುಡ್ದ್ ತೂವಂದೆ ಪೋನಗ ಅಕುಲೆನ ಬೆರಿಕೇ ಬಾಲೆದ ಗೆರಚಾರದೋಷ ಪೋಪುಂಡುಗೆ
•ಬಾಲೆನ್ ಉಪ್ಪುದ ಮರಾಯಿಡ್ ಪತ್ತ್ ನಿಮಿಷ ಕುಲ್ಲಾದ್ ಕೋಲ್ನೆನೆಟ್ ಮೂಜಿ ಸರ್ತಿ ತೊರತ್ದ್ ತಾದಿಡ್ ಗೂತುಂಡ ಮೈತಗಜ್ಜಿ ಗುನಆಪುಂಡುಗೆ,
•ಉಪ್ಪುನೀರ್ ದ ಬಾಜನನ್ ಬಾಲೆದ ಎದುರು ದೀದ್ ಬಾಲೆದ ಒಂಜೊಂಜೆ ಅಂಗೊನು ದೂರಡ್ದ್ ಮುಟ್ಟುದು ಐನ್ ಆಜಿ ಸರ್ತಿ ಪೂಜೆ-ಪೂಜಿದ್ ನೀರ್ಗ್ ಪಾಡ್ಡ್ ಬೊಕ್ಕ ಅವೆನ್ ತಾದಿಗ್ ಗೊತುಂಡ (ಉಂದು ಇತ್ತೆದ ರೇಖಿ ಚಿಕಿತ್ಸೆ) ಸೀಕ್ ಗುನ ಆಪುಂಡುಗೆ,
103
