ಈ ಪುಟೊನು ಪ್ರಕಟಿಸದ್ ಆಂಡ್
ಗೋಮಟ
ಪೊರ್ಲಕಂಟ್ದ ಮೈಮೆ ನಿನ್ನವು
ಕಾರ್ಲದಾ ಸಿರಿ ಗೋಮಟ;
ಏರ್ಲ ನಿನ್ನನ್ ತೂಪಿನಕ್ಲೆಗ್
ಮರ್ಲ್ ಮದೆಪನ ಗೋಮಟ?
ವರ್ಸೊವರ್ಸೊದ ಬರ್ಸೊ ಬರ್ಸೋದ
ತೆಡಿಲ್ ಮಿಂಚಿಡೆ ಮಿಂಚಿದ;
ಧ್ಯಾನನಿಶ್ಚಲ ನಿತ್ಯಮೂರುತಿ
ಇಂಚನಿಜ ನಿಲೆ ಸಾರ್ದ
ಪಗೆಲ್ ದೊಂಬುಗು ರಾತ್ರಿ ಕತ್ತಲೆ
ಗಾಳಿಚಳಿಕ್ಲ ಬತ್ತಲೆ;
ನಿನ್ನ ಸಮ್ಯಕ್ ತತ್ವ ಜೈನೆರೆ
ಬದ್ಕ್ ಭಾಗ್ಯೊಗೆ ಆಸರೆ.
ದಬಲತ್ ತಿರ್ತ್ಮಿತ್ತಗ್
ಪತ್ತೆದಿಸ್ಕ್ಗ್ ಮುತ್ತುದ;
ಕಾಮರೂಪಿ ದಿಗಂಬರಾಕೃತಿ
ಮೌನಮಂತ್ರೋಡೆ ಉಂತುದ.
ಏತ್ ವರ್ಸೊಗು ದುಂಬು, ರಾಮ
ಸಮುದ್ರೆಡೀ ಮೂದಿತ್ತನ?
ಏತ್ ಕಾಲೊಡು ಪ್ರಕೃತಿದೇವಿನ
ಸತ್ಯಶಕ್ತಿಡ್ ಮೆರೆಯನ?
ನಿನ್ನ ತುಳುವೆರೆ ಭಕ್ತಿ ಶಕ್ತಿದ
ಕಡಲ್ ತೆರೆನುರೆಯೇರಡ್;
ನಿನ್ನ ತುಳುವೆರೆ ಧೈರ್ಯಸಾಹಸ
ಗಟ್ಟೋದಾ ತರೆಏರಡ್
ನಿನ್ನ ಗಟ್ಟಿದ ರಟ್ಟೆ ತುಳುವೆರೆ
ಭೂಮಿ ಬದ್ಕ್ನ್ ಕಾಪೊಡು;
ನಿನ್ನ ತಪಸ್ದ ಶಕ್ತಿ ಲೋಕೋದ
ಭಾಗ್ಯಬುಳೆಪಿನ ತೂವೊಡು.
(1932)
ಕಯ್ಯಾರೆರ್ನ ಕಬಿತೆಲು / 13
-
