ತುಳುವೆರ್
ತುಳುವೆರೆನಾ ತುಳುನಾಡ್ಗ್ ಪೋಲೆ,
ತುಳುವೆರ್ ಬೇಲೆಡ್ ಬಿರ್ಸೆರ್ ತೂಲೆ;
ತುಳುವೆರೆಗೇ ದುಂಬುದ ಮರ್ಯಾದಿ,
ತುಳುವೆರೆ ಸುಕೊನೇ ಸತ್ಯದ ತಾದಿ
2
ತುಳುವೆರೆ ತಿಗಲೆದ ತಿರ್ಲ್ ನ್ ತೂದು
ತುಳುವೆರೆ ಜವ್ವನೊ ಜೀವನೊಗಾದ್;
ತುಳುವೆರೆ ದೇಬೆರೆಗವು ಕುಶಿಯಾಂಡ್
ತುಳುವೆರೆಗೀ ಬಿಂಕೊದ ಪುದರಾಂಡ್.
3
ತುಳುವೆರೆ ಜೀವನೊ ಬೆನ್ನಿದ ಬೇಲೆ
ತುಳುವೆರೆ ಬದ್ಕೇ ಮಣ್ಣ್ ದ ಮೂಲೆ;
ತುಳುವೆರೆಗೇ ನುಗೊ ನಾಯರ್ ಕೊಟ್ಟು,
ತುಳುವೆರೆಗೇ ಸುಕೊ ಸಂತೋಸು ಒಟ್ಟು
4
ತುಳುವೆರೆನಾ ಭಾಗ್ಯೊದ ಇಣೆಎರ್ಲ್
ತುಳುವೆರೆನಾ ಕಂಬುಲ ಕರೆ ಪೋರ್ಲು;
ತುಳುವೆರೆ ಜೀವನ ದಿಂಜಿದಿ ತಿರ್ಲ್
ತುಳುವೆರೆ ಬಿರ್ಸತಿಕೆಡೆ ಜನ ಮರ್ಲ್
5
ತುಳುವೆರೆ ಕಂಡೊದ ಕೋರಿಗ್ ಪೋಲೆ,
ತುಳುವೆರೆ ಪುಂಡುಡು ಮೈಮರ್ಲಾಲೆ;
ತುಳುವೆರೆ ಜನನೋನ್ ನೆನೆತ್ದ್ ತೂಲೆ
ತುಳುವರೆಗವು ಗುಣಕೀರ್ತನೆ ಮಾಲೆ
6
ತುಳುವೆರೆ ಬಾಲೆಳು ವಜ್ರೊದ ಪರೆಲ್,
ತುಳುವೆರೆ ಉಂಗಿಲೊದೆಂಗಿನ ಬಿರೆಲ್,
ತುಳುವೆರ್ ಬಂಗಾರ್ದ ಸಿರಿ ಕುರಲ್
ತುಳುವೆರ್ ನೀತಿಗ್ ನಿತ್ಯೊದ ನಿರೆಲ್.
(1932)
ಕಯ್ಯಾರೆಡ್ನ ಕಬಿತೆಲು / 12
