ಒರಿದುಪ್ಪು ತಪ್ಪುಲೆನ್ನಪ್ಪೆ ಸಿರಿದಯೆ ದೀದ್
ಉಜ್ವಾಲ್ ಡೊಚ್ಚೋಡೆನನ್;
ಮರಮಟ್ಟ್ ಬಿದೆ ಬಿತ್ತ್ ನೆಲಯಿಲ್ಲ್ ಕಾಡ್ಗುಡ್ಡೆ
ಸಿರಿಗುಂಡೊ ಬದಿದೇವತಾನೊ ಗುಡಿಗೋಪುರೊಡು
ಒರಿದುಪ್ಪೊಡೆನನಾಡ್ ಜನಪ್ರೀತೆ ತುಳುಮಾತೆ
ನಿನಪಾದೊ ಪತ್ದ್ ಬರೆತೆ
5
ಕಣ್ಣ್ದಾಕಪ್ಪುಕಲೆ, ಕಣ್ಣ್ಗವು ತೋಜಂದ್,
ಎನ್ನ ಬರವುದ ತಪ್ಪು ಎಂಕಾದೆ ತೆರಿಯಂದ್,
ಮನ್ನಣೆದ ಕವಿಮಾಲೆ ತಿದ್ದ್ದೇ ತೆರಿಪಾಲೆ
ಯಾನೊರಿಯೆ ಕಿನ್ನಿಬಾಲೆ;
ಎನ್ನ ತುಳುನಾಡ್ಡ್ಲ, ಎನ್ನ ತುಳುಬಾಸೆಡ್ಲ
ಎನ್ನ ಪಿರ್ತಿನ್ ಬರೆದ್ ಬರೆದಿಂಚ ತೆರಿಪಾದೆ
ಎನ್ನವೀ ತುಳುವಸಾಹಿತ್ಯ ಸಾಮ್ರಾಜ್ಯೋಗೇ
ವಂದನೆದ ಸುರುತ ಸೇವೆ
6
ಏರೇರ್ ಶ್ರೀ ಭಾರತಾಂಬೆ ಬಂಙೊನ್ ಗಿರೆದ್
ಸೇರ್ದೆರೊ ಸ್ವಾತಂತ್ರ್ಯದಾಭಾಗ್ಯಬಂಧನೊಗ್
ಧೀರಗಾಂಧಿಮಹಾತ್ಮ ಪೂಜ್ಯಮೋಹನದಾಸ
ಸತ್ಯಶಕ್ತಿನ್ ನಂಬುದು;
ಏರೇರ್ ನಮ ರಾಷ್ಟ್ರದಾ ಪತಾಕೆನ್ ಪತ್ದ್
ನೂರೊಂದು ನುರ್ಕೊಂದು ಕಡಲುಪ್ಪು ಕಡೆವೊಂದು
ಸಾರ್ಯೆರೋ ಶಾಂತ್ಯಮೃತ ಭಾರತೇಯೆರೆಗಕುಲೆ
ಗಾ ವೀರೆರೆಗೆ ವಂದನೆ.
7
ವ್ಯಾಸವಾಲ್ಮೀಕಿ ಭಾರವಿಭಟ್ಟಿ ಶ್ರೀ ಕಾಳಿ -
ದಾಸ ವಾಮನ ಮಾಘ ಹರ್ಷ ಶೂದ್ರಕ ದಂಡಿ
ಭಾಸ ಶ್ರೀ ಭಟ್ಟನಾರಾಯಣಾ ಭವಭೂತಿ
ಭರ್ತೃಹರಿ ಬಾಣಾದ್ಯೆರ್;
ಆಸಮಸ್ತ ಪುನೀತ ಗೀರ್ವಾಣ ಕವಿಕುಲೊಕೆ
ಲೇಸಾದ್ ಸಂಪೂರ್ಣ ಸೊಲ್ಮೆನೇ ಸಂದಾವೆ,
ಬಾಸೆ ತುಳುವಾಂಡಲಾ ಭಾರತದ ಭಾಗ್ಯದಾ
ಸಂಸ್ಕೃತದ ಸಾಯೊ ಪತ್ದೆ.
ಕಯ್ಯಾರೆರ್ನ ಕಬಿತೆಲು
