ತುಳುಗೀತೆ
ತುಳುತುದೆತ ಮೀನಾದ್ ತುಳುಕಡಲ್ ನೀಂದೊನುವೆ
ತುಳುನೆಲತ ಬುಲೆಸೆಲೆತ ಬಿದೆಬಿತ್ತ್ ಬೆಂದೊನುವೆ
ತುಳುನಾಡಬುಲೆಗಾದ್ ನುಗೊ ನಾಯೆರ್ಗೆ ಆದ್ ಎನ್ನ ಈ ಕಾಯೊ ಕೊರುವೆ;
ತುಳುವಪ್ಪೆ ಪುಣ್ಯದಾ ಪಾದೊದಡಿ ಪುರೆಲೊನುವೆ,
ತುಳುರಾಣಿ ರೂಪೊದಾ ಪೊರ್ಲುನೇ ಪಂಡೊನುವೆ,
ತುಳುನಿತ್ಯ ಕೀರ್ತಿದಾ ಕೊಡಿಮರತ ಕೊಡಿಯೇರ್ದ್ ಪತ್ತೊನುವೆ ತುಳುಪತಾಕೆ.
ತುಳುನಾಡ ರೀತಿನೇ ಮರಪಂದೆ ಒರಿತೊಂದು.
ತುಳುನಾಡ ನೀತಿನೇ ನಂಬೊಂದು ತುಂಬೊಂದು,
ತುಳುನಾಡ ಬದ್ಕ್
ಬೆಂದೊಂದು ತಿಂದೊಂದು, ತುಳುಮಾತೆ ಸತ್ಯಪುತ್ರೆ;
ತುಳುಶಕ್ತಿದಿಂಜಿನಗ ತುಳುಬಯಲ್ ನಡತೊಂಡೆ,
ತುಳುಗುಡ್ಡೆಗೇರೊಂಡೆ, ತುಳುಮರನ್ ಮಗ್ರೊಂಡೆ,
ತುಳುನಾಡ್ದಾನಂದಲೋಕನಾಕದ ಮಿತ್ತ್ ನಡುಪತ್ದ್ ನಡತ್ಪೋಪೆ
ತುಳುಬಾಸೆ ಪಂಡೊನಡ್ ,ತುಳುಕವಿತೆ ಕಟ್ಟೊನಡ್,
ತುಳುಘೋಷೋ ಕೇಂಡೊನಡ್, ಪಗೆತಿಗಲೆ ಕಟ್ಟೋನಡ್,
ತುಳುಬಾಲೆ ಜವ್ವನೊದ ಶಕ್ತಿಡೇ ದಿಂಜೊನಡ್ ರಟ್ಟೊನಡ್ ಬಿಗಿನ ಬೀಗ,
ತುಳುತತ್ವ ತೆರಿತೆರಿದ್ ತುಳು ತಿರ್ಳ್ ತೋಜೊನಡ್,
ತುಳುಮಂದಿ ಗೆಲವಂದಮಾಲೆಡೇ ಗೆಂದೊನಡ್,
ತುಳುರಾಣಿ ಮಾರಾಣಿ ಭಾಗ್ಯೊದಾ ಭೂರಾಣಿ ಗೇರೊನಡ್ ಶುಭ್ರಕೀರ್ತಿ
ತುಳುಸರವು ಬರವಾದ್ ವಿದ್ಯೆವೈಭವೊ ಮೆರೆದ್
ತುಳುವಪ್ಪೆ ಪೇರಾದ್ ಪೊಸ ಜೀವಕಲೆ ಕೊರ್ದ್
ತುಳುಜನತೆ ಜವ್ವನೊಡೆ ತಿಗಲೆನೇ ಗದ್ದೊಂದು ಮೈಮಾತ ಮರ್ಲ್ ಮದೆದ್,
ತುಳು ಸತ್ವಶಕ್ತಿದಾ ಕ್ರಾಂತಿಮಯ ನೆತ್ತೆರ್ಡ್
ತುಳು ಸತ್ಯಭಕ್ತಿದಾ ಶಾಂತಿ ದಯೆ ಬಿತ್ತೊನಡ್
ತುಳುಮಾತೆ ಜಯಜಯ ಜಯಾವಡೇರಡ್ ನಿನ್ನ ವಿಜಯವೈಭವ ಪತಾಕೆ
(1930)
ಕಯ್ಯಾರೆರ್ನ ಕಬಿತೆಲು / 5
