"ಅಜ್ಜೆರೇ ಈ ಬಾಲೆನ್ ಇರೆ ಕೈಟ್ ಪಾಡೊಡೂಂದು ಸತ್ಯನಾಪುರದ ಸತ್ಯದ ಮಗಲ್ ಸಿರಿ ಪಂತಲ್" ಉಂದು ಸಿರಿ ಪೆದ್ದಿನ ಬಾಲೆ.
ಈ ಬಾಲೆಗ್ ಸಿರಿಯೇ 'ಸೊನ್ನೆ' ಪನ್ಪಿ ಪುದರ್ ಪಾಡ್ದಲ್. ಇರೆ ಕೈಕ್ ಬಾಲೆನ್ ಕೊರುಡು ಪಂಡಿ ಸಿರಿ ಮಾಯಾತಲ್! ಬಾಲೆನ್ ಕಣ್ ಕಾವಲ್ ದೀದ್ ಈರ್ ತಾಂಕೊಡು. ಪಂಡಿನ ಸಾಮು ಸೊನ್ನೆನ್ ಅಜ್ಜೆರ್ನ ಕೈಟ್ ಕೊರಿಯಲ್.
ಸಿರಿ ಪೆದ್ದು ಬೇನೆನ್ ಜಾರಾವೊಂದಿನಂಚ, ಸಾಮು ತುಂಬಿ ಪುದೆನ್ ಜಾರಾವೊಂಡಲ್!
ಅಜ್ಜೆರ್ ಸೊನ್ನೆನ್ ಕೈ ನಿಲ್ಕೆ ಅರಾಪತೊಂಡೆರ್! ಮೈ ನಿಲ್ಕೆ ಮುತ್ತು ಕೊರಿಯರ್. ಸಾಮುನು ಬಾಮಿದ್, ಅಸರ್ಗ್ ಪೇರ್ ಕೊರಿಯೆರ್. ಬೇಸರ್ ಮಾಜುನ ಪಾತೆರ ಪಾತೆರ್ಯೆರ್. ಸಾಮು ಉಂತಂದೆ ಊರಂದೆ ಕಾನೊಟ್ಟುಡು ಪಿದಡ್ದ್ ಬತ್ತಲ್.
ಕಾನ ಬೊಟ್ಟುದ ಅಜ್ಜೆರ್ ಸೊನ್ನೆಗ್ ಕಣ್ಣೆಡ್ ಕಣ್ ದೀದ್ ತೂಕಿಯೆರ್. ಅಪ್ಪೆದಾಂತಿ ಬಾಲೆ, ತಿರ್ತ್ ದೀಂಡ ಪಿಜಿನ್, ಮಿತ್ ಪತ್ಂಡ ಗಿಡಿ ಕೊನೋವು ಪನ್ಪಿನಂಚ ಜೋಕೆ ಮೋಕೆಡ್ ತಾಂಕಿಯೆರ್.
ಅಜ್ಜೆರೆ ತಾಂಕನೊಡು ಸೊನ್ನೆ ಬುಲೆದ್ ಬಲಿಕೆ ಆತಲ್. ಪೊಣ್ಣು ಪೋದು ಪೊಂಜೊವಾಪಿನ ಪೊರ್ತು.
ಕಣ್ಣ ದುಂಬು ಬುಲೆಯಿನ ಸೊನ್ನೆನ್ ತೂದು-
ನನಲಾ ಸೊನ್ನೆನ್ ಇಲ್ಲಡ್ ಕುಲ್ಲಾವುನ ಸಮ ಅತ್ತೆ. ಅಲೆಗೊಂಜಿ ಒಪ್ಪ ತಪ್ಪದ ಆಣ್ ಗೊತ್ತು ಮಲ್ಪೊಡು ಪಂಡೆರ್. ಪೊದು ನಾಡಿಯೆರ್.
ಕೆದಿಂಜೆಪರಾಡಿ ಗುತ್ತು ಬಾರಿಕೆದ ಇಲ್ಲ್. ಅವುಲು ಜಾರು ಮಾರ್ಲನ ಮೆಗ್ಗೆ, ಉರ್ಕಿದೊಟ್ಟು ಗುರು ಮಾರ್ಲೆ. ಸೊನ್ನೆನ್ ಗುರು ಮಾರ್ಲಗ್ ಸಂಬಂದ ಪಾತೆರ್ದ್ ಪೊದು ನಿಶ್ಚಯ ಮಲ್ತೆರ್.
ಅಜ್ಜೆರ್ ಸೊನ್ನೆಗ್ ಬೋಡುತ್ತಿನ ಪದ್ದೆಯಿ ಬಂಗಾರ್ ಮಲ್ಪಾಯೆರ್. ನೆತ್ತಿಗ್ ನೆತ್ತಿ ಬೈತಲೆ, ಜಡೆಕ್ಕ್ ಜಡೆ ಗೊಂಡೆ. ಸೊಂಟೊಗು ಸೊಂಟ ಪಟ್ಟಿ, ಉರಿ ಗೆಜ್ಜೆ, ಕಾರ್ಗ್ ಕಾರ್ಂಗಿಲ, ಕೈಕ್ ಮುದ್ರೆದುಂಗಿಲ, ಕೆಕ್ಕಿಲ್ಗ್ ಮುತ್ತುದ ಕಂಠಿ, ಚಕ್ರಸರ, ಪವನ್ ಸರ, ಬಗೆ ಬಗೆ ಬಣ್ಣದ ಬಂಗಾರ್ ಪಾಡಿಯೆರ್.
ಊರು ಪರ ಊರುಗು ಓಲೆ ಕಾಡಾಯೆರ್. ನೆರೆ ಕರೆ ಕೂಡಾಯೆರ್. ಒಕ್ಕೆಲ್ ಸಕ್ಕಲ್
ಲೆಪ್ಪುಡಾಯೆರ್.
7
