ಆತಾನಗ ಅಜ್ಜೆರೆ ಕಣ್ಣಿಗ್ ಉಗ್ಗೆಲ್ ದ ಬಾಯಿ ಕಲ್ಲ್ಡಿಡಿತ್ತಿ ಬಚ್ಚಿರೆ ತೋಜಿ ಬತ್ತ್ಂಡ್. ಬಚ್ಚಿರೆಡ್ ಬರತ್ತಿ ಓಲೆ ದೆತ್ತೆರ್. ಓಲೆಡ್ ಬರತ್ತಿ ಒಕ್ಕಣೆ ಓದಿಯೆರ್.
ಅಬ್ಬಗ - ದಾರಗ ಉಗ್ಗೆಲ್ಗ್ ಬೂರ್ದಿನ ಸಂಗತಿ ತೆರಿಂಡ್. ಅಜ್ಜೆರ್ ತಡೆ ಬುಡಾರ ಮಲ್ಪಂದೆ ಉರ್ಕಿದೊಟ್ಟುದ ಬಂಗಾರದ ಜಲ್ಲ ಕನಪಾಯೆರ್.
ನೀಂದೊಂದಿತ್ತಿನ ಪಿಂಗಾರದ ರಡ್ಡ್ ಪಾಲೆಲೆನ್ ಮಿತ್ತ್ ಗೆತ್ತೆರ್. ಮಿತ್ತ್ ಬನ್ನಗ ಅವು ರಡ್ಡಲಾ ಅಬ್ಬಗ - ದಾರಗನ ಜೀವ ಪೋತಿನ ಪುನ ಆದ್ ತೋಜಿಂಡ್.
ಪುನ ಉಲಯಿ ಕನತ್ತೆರ್. ಚಾವಡಿ ತೆನ್ಕಯಿ ತರೆ ಬಡಕಯಿ ಕಾರ್ ಪಾಡ್ ದ್ ಜೆಪುಡಾಯೆರ್.
ಸೊನ್ನೆ ಮಾರ್ಲೆರ್ ಜೋಕುಲೆ ಪುನತ್ತ ಮಿತ್ತೇ ಬೂರುದು ತರೆಕ್ಕ್ ತರೆ ದರ್ತೊಂಡೆರ್. ಬುಲಿತ್ ಬುಲಿತ್ದೇ ಮತಿ ಕೆಟ್ಟಿಯೆರ್.
“ಓ ಬೆಮ್ಮೆರೇ ಅರ್ತಿಡ್ ಕೊರಿಯರ್. ಕುಡ್ತುದೇ ಕೊನೆಯರ್? ಪನ್ತಿ ಪರಕೆನ್ ಬಾಕಿ ದೀವೊಂದು ನಿಕಲೆ ಜೀವೊನು ಎಂಕಲೆ ಕೈಟೇ ದೆತ್ತನೆ ಮಗಾ? ಅಯ್ಯೋ ದೇವರೇ ಈ ಪೊರ್ಲುನು ಈ ಮರ್ಲಾಟಿಕೆದ ಗೊಬ್ಬುನು ನನ ಓಲು ತೂಪಿನಿ? ನಿಕಲೆ ತರೆಕ್ಕ್ ರಡ್ಡ್ ಅರಿ ಪಾಡುನ ಪುಣ್ಯಲಾ ದಾಂತೆ ಪೋಂಡೆ ಮಗಾ?
"ತೆಲಿತ್ ನಲಿಪುನ ಮದಿಮೆದ ಇಲ್ಲ್ ಮಸಣಾದ್ ಪೋಂಡೇ - ಓ ಅಜ್ಜೆರೇ ವಾ ಸುಖ್ಹೊಕ್ಕು ನನ ಬದುಕೊಡು? ಒವ್ವೆನ್ ತೂದು? ಒವು ನೆನೆಪುಡು ಬದುಕೊಡು? ಅಜ್ಜೆರೇ ಎಂಕಲೆಗ್ ವಾ ಗತಿ? ವಾ ನಿರಲ್?"
ಬುಲ್ತಿ ಬುಲಿತ್ ದ್ ಮತಿ ತತ್ತ್ ದ್ ನೆಲಟ್ ಬೂರ್ದೆರ್ ಸೊನ್ನೆ ಮಾರ್ಲೆ.
ಕೂಡ್ಲಿ ಊರುದಕುಲು ಕುಕ್ಕುದ ಮರ ಕಡ್ತೆರ್. ಸುಡ್ಕಲದ ಕಂಡೊಡು ಕಾಟ ಗೂರಿಯೆರ್. ಮಂಜೊಲು ನೀರ್ ಮೀಪಾಯೆರ್. ಸೊನ್ನೆ ಮಾರ್ಲೆರಡ ಪುನತ್ತ ಬಾಯಿಗ್ ತುಳಸಿ ನೀರ್ ಕೊರ್ಪಾಯೆರ್.
ಜೋಡು ಪಲಯಿ ಕನತ್ತೆರ್. ಸುಡ್ಕಲದ ಕಂಡೊಗು ತುಂಬಿಯೆರ್. ಕಾಟೊಡು ದೀಯೆರ್.
ಮತಿ ದಾಂತೆ, ಬಾಡ್ದಿ ಬಸಳೆದಂಚಾತಿನ ಸೊನ್ನೆ ಮಾರ್ಲೆರೆನ್ ಕೈ ಪತ್ತ್ದ್ ಕಾಟೊಗು ಮೂಜಿ ಸುತ್ತು ಬಲಿ ಕನತೆರ್! ತೆನ್ಕಾಯಿ ಮೋನೆ ಮಲ್ತ್ದ್ ಕಾಟೊಗು ತೂ ಕೊರ್ಪಾಯೆರ್!
34
