ಸೊನ್ನೆ ಮಾರ್ಲೆರ್ ಇಲ್ಲಗ್ ಬನ್ನಗ...
ಸೊನ್ನೆ ಮಾರ್ಲೆರ್ ಮದಿಮೆ ಲೆತ್ತ್ದ್ ಬೋಳಡ್ದ್ ಪಿರ ಬನ್ನಗ ಅವ್ವೇ ಅಬ್ಬನಡ್ಕದ ಗೋಳಿದ ಕಟ್ಟೆಗ್ ಬತ್ತೆರ್.
ಪೋನಗ ತಿಕ್ದಿ ಬೆರಣೆ ಅವ್ವೇ ಕಟ್ಟೆಡ್ ಅಟ್ಟೆ ಪೊಯ್ದ್ ಕುಲ್ಲುದೆರ್. ಬಾಯಿಡ್ ಮಣ ಮಣ ಮಂತ್ರ ಕೇನುಂಡು.
ಸೊನ್ನೆ ಬೆರಣನ್ ತೂಯಲ್. ಕೇಂಡಲ್ "ಒಂಚಿ ಪೋಯರ್ ಭಟ್ರೇ? ಊರು. ಜತ್ತ್ ಪೋಯರಾ? ದಾನೆ ಪನುವೆರ್? ದಾನೆ ಕೇನೊಲಿ?"
“ಅಮ್ಮ ಸೊನ್ನೆ ಪೋನಗ ತಿರ್ತ ಕೂಟಾಯಿಗಾದ್ ಪೋಯೆ. ಬನ್ನಗ ಮಿತ್ತ ಕೂಟಾಯಿಡೆ ಬತ್ತೆ. ಅಲ್ಪ ಬರ್ಪಿನ ಪೊರ್ತು ಉರ್ಕಿದೊಟ್ಟ ಇಲ್ಲ ಜಾಲ್ಡ್ ಮಾನಿಸ್ವರ. ಮನುಷ್ಯ ಬೊಬ್ಬೆ ಕೇನೊಂದುಂಡು.
ನಿರಕರೆತ್ತಕುಲು ಕೂಡ್ದೆರ್. ಜೋಕುಲು ಇಜ್ಜ. ಜೋಕುಲು ಇಜ್ಜ ಪನ್ಪಿನ ಕೇನುಂಡು. ಕುಚ್ಚಿ ಪುದೆಲ್. ತೋಡು ಒರುಂಕು ನಾಡುವೆರ್. ಈತ್ ಮಾತ್ರ ಗೊತ್ತು ಪಂಡೆ ಬೆರಣೆ ಬೂಕುದ ಕಟ್ ಬುಡ್ಪಾವೆರ್.
ಉಂದೆನ್ ಕೇಂಡಿನ ಸೊನ್ನೆ ಮಾರ್ಲೆರೆಗ್ ಕಣ್ಣಿಗ್ ಮಂಜೊಲ್ದ ಪೊಡಿ ಬಿರ್ಕಿನಂಚಾಂಡ್. ಬೂಮಿ ಅಕ್ಕಸ ಒಂಜಾದ್ ತೋಜಿಂಡ್.
ಜೀವ ಕೈಟ್ಟೇ ಪತೊಂದು, ಕಾರ್ದ ಧೂಳು ತರೆಕ್ಕಾಪಿನಂಚ ಪಾರೊಂದು ಬತ್ತೆರ್.
ಉರ್ಕಿದೊಟ್ಟ ಕೈತಲಾನಗ ಪೊಣ್ಣ ಬೊಬ್ಬೆ, ಆಣ ಸ್ವರ, ಬೊಬ್ಬೆ, ಬುಲಿಪು ಕೇನುಂಡು.
ತೂನಗ ಊರುಗು ಊರೇ ಕೂಡುದು ಮಾತೆರ್ಲಾ ನಾಡೊಂದುಲ್ಲೆರ್.
ಸೊನ್ನೆ ಪಾರ್ ಬತ್ತಿನಾಲೇ ಅಜ್ಜೆರೆನ್ ಅರಾಪತಿಯಲ್. ಬಾಯಿ ಕೊರೆದು ಬುಲಿತಲ್.
ಓಲುಲ್ಲ ರ್ ಮಗಾ? ಓ ಅಬ್ಬಗಾ- ಓ ದಾರಗಾ? ಓ ಬೆಮ್ಮೆರೇ ಎನ್ನ ಜೋಕುಲೆನೊರ ಕಣ್ಣಿಗ್ ತೋಜಾಲೆ. ಕೈಕ್ ಕೊರ್ಲೆ! ಸೊನ್ನೆ ಅರ್ ಮುರೆಡ್ದ್ ಮತಿ ತತ್ತ್ ಬೂರಿಯಲ್.
33
